მარტის ეკონომიკური ზრდის ტემპი ჩვენს მოლოდინთან თანხვედრაშია, - ამის შესახებ Business Insider Georgia-სთან Galt & Taggart-ის ეკონომისტმა ლაშა ქავთარაძემ განაცხადა. მისივე განმარტებით, ამ ეტაპზე მაღალი ეკონომიკური ზრდის ტემპი ნარჩუნდება.

„2025 წლის მარტში საქართველოს რეალური მშპ 9.0%-ით გაიზარდა, თებერვლის 7.7%-იანი ზრდის შემდეგ, რაც თანხვედრაშია ჩვენს მოლოდინთან. ჯამურად, 2025 წლის პირველ კვარტალში, საქართველოს ეკონომიკა 9.3%-ით გაიზარდა, ანუ ამ ეტაპზე მაღალი ეკონომიკური ზრდის ტემპი ნარჩუნდება.

მოგეხსენებათ, 2025 წლის მარტში სავალუტო შემოდინებები წინა თვესთან შედარებით მნიშვნელოვნად გაუმჯობესდა, ამასთან ლარის კურსის გამყარების ტრენდი გაგრძელდა, რამაც სავარაუდოდ დადებითად იმოქმედა სამომხმარებლო განწყობებზე. ამასთან, მარტში იურიდიულ პირებზე გაცემული სესხების ზრდის ტემპი მაღალ დონეზე შენარჩუნდა, წლიურად 17.9%-ით გაიზარდა გაცვლითი კურსის ეფექტის გამორიცხვით, რაც საინვესტიციო აქტივობის ნაწილს წარმოადგენს. დეტალურად, სამომხმარებლო და საინვესტიციო კომპონენტების კონტრიბუციას ეკონომიკურ ზრდაში დავინახავთ, როცა საქსტატი გამოაქვეყნებს პირველ კვარტლის მშპ-ის ანგარიშს დანახარჯების მეთოდით“, - აცხადებს ლაშა ქავთარაძე.

საქსტატის მონაცემების თანახმად, წინასწარი შეფასებით, 2025 წლის მარტში, წინა წლის შესაბამის პერიოდთან შედარებით, რეალური მთლიანი შიდა პროდუქტის (მშპ) ზრდამ 9.0 პროცენტი შეადგინა, ხოლო I კვარტლის საშუალო რეალური ზრდა 9.3 პროცენტით განისაზღვრა.

2025 წლის მარტში, წინა წლის შესაბამის პერიოდთან შედარებით, ზრდის მიმართულებით მნიშვნელოვანი წვლილი შეიტანა შემდეგმა დარგებმა: ინფორმაცია და კომუნიკაცია, პროფესიული სამეცნიერო და ტექნიკურ საქმიანობები, საფინანსო და სადაზღვევო საქმიანობები, ტრანსპორტი და დასაწყობება, მშენებლობა. კლების ტენდენცია დაფიქსირდა დამამუშავებელი მრეწველობის სექტორში.