საწვავის ბაზარზე კონკურენცია გაქვს, - ამის შესახებ რადიო „სივრცის“ ეთერში გადაცემა Business Insider Georgia-ში სტუმრობისას კონკურენციის სააგენტოს ხელმძღვანელმა ირაკლი ლექვინაძემ განაცხადა.

მისი თქმით, 2025 წლის მაისი საწვავის ფასების კლების თვალსაზრისით პოზიტიური იყო, რაც განსაკუთრებით აშკარად აისახა მცირე ქსელებზე.

„მნიშვნელოვანი ცვლილებები დავაფიქსირეთ აპრილის მეორე ნახევრიდან. მაისში ბენზინის ფასმა დაახლოებით 17–22 თეთრით, ხოლო დიზელის ფასმა — 24–27 თეთრით იკლო. პირველ კვარტალში უკვე აშკარად გამოჩნდა, რომ არსებობდა ფასების კლების რესურსი, რაც იმპორტის გაიაფებით იყო განპირობებული. მცირე ქსელებში ეს ცვლილება შედარებით სწრაფად აისახა, ხოლო მსხვილმა კომპანიებმა ფასების გადახედვა მარაგების მიხედვით ეტაპობრივად დაიწყეს. მაისი ამ მხრივ ნამდვილად პოზიტიური თვე იყო“, — განაცხადა ლექვინაძემ.

მისი თქმით, ამ ეტაპზე საქართველოში საწვავის იმპორტით 50-ზე მეტი კომპანია არის დაკავებული, ხოლო საცალო რეალიზაციაში 400-ზე მეტი ოპერირებს. ბაზრის დაახლოებით 65% ხუთ მსხვილ კომპანიაზე მოდის, ხოლო დარჩენილი ნაწილი — მცირე ქსელებზე.

„ფასნამატების, იმპორტის თვითღირებულებისა და ბაზრის სტრუქტურის ანალიზი საშუალებას გვაძლევს ვთქვათ, რომ საწვავის ბაზარზე რეალურად მოქმედებს კონკურენცია. არსებული ფასები თავსებადია გლობალურ ტენდენციებთან და არ იკვეთება არაბაზროვანი ზეწოლა. ლარის კურსი სტაბილურია და გამყარების ტენდენციაც შეინიშნება. სავარაუდოდ, მეორე კვარტლის ბოლოს კიდევ უფრო სრულ სურათს მივიღებთ“, — აღნიშნა სააგენტოს ხელმძღვანელმა.

კონკურენციის სააგენტო აგრძელებს საწვავის ბაზრის მუდმივ მონიტორინგს და აცხადებს, რომ ბაზარზე არსებული ფასები საბაზრო მექანიზმების მოქმედებით ყალიბდება.