მაღალი სავალუტო შესყიდვების შემთხვევაშიც კი ლარის გაცვლითი კურსი აშშ დოლართან მიმართებით ₾2.7/1$-ის ფარგლებშია მოსალოდნელი 2026 წელს, - ამის შესახებ რადიო „სივრცის“ ეთერში, გადაცემა Business Insider Georgia-ში სტუმრობისას, Galt & Taggart-ის მთავარმა ეკონომისტმა ლაშა ქავთარაძემ განაცხადა.

მისი თქმით, 2025 წელს ეროვნული ბანკი რეზერვების დაგროვების მიზნით ბაზარზე აქტიურ შესყიდვებს ახორციელებდა, რაც შეიძლება პოლიტიკის შედარებით “აგრესიულ” ხასიათზე მიუთითებს.

„2025 წელს რეზერვები რომ არ ყოფილიყო შესავსები და ჩვენ რეზერვების კუთხით ადეკვატურ დონეზე ვყოფილიყავით, უფრო მეტად დავინახავდით გამყარებულ კურსს - 2025 წელს კურსი 4%-ით მაინც გამყარდა. წელსაც ვფიქრობთ, რომ ისეთი გარემო არის, რომ გაცვლითი კურსი მინიმუმ შენარჩუნდება სტაბილურ დონეზე - 2.7-ის ფარგლებში. არ არის გამორიცხული, რომ გარკვეულ თვეებში უფრო დაბალი კურსიც ვიხილოთ. 2025 წელს ეროვნული ბანკის პოლიტიკა შესყიდვების მიმართულებით “აგრესიული” იყო რეზერვების დაგროვების კუთხით.

რამდენად აგრესიული იქნება ეს მიმდინარე წელს, ესეც მნიშვნელოვანი ფაქტორია. თუ მაღალი დონის შესყიდვები წელსაც გაგრძელდება, რაც 2025 წელს ვიხილეთ, შეგვიძლია ვთქვათ, რომ კურსი გარკვეულწილად 2.7-ის ფარგლებში იმერყევებს - საბაზისო სცენარში. თუმცა სხვა ბევრი ფაქტორიაცაა რაც კურსზე მოქმედებს. ამასთან, არ არის გამორიცხული, რომ მიმდინარე წელს ცოტათი გამყარებული კურსიც ვიხილოთ, რომელიც შესაძლოა გახდეს უფრო მეტად არგუმენტი იმისა, რომ მონეტარული პოლიტიკა შემდგომ იყოს შერბილებული 2026 წლის განმავლობაში“, – განაცხადა ლაშა ქავთარაძემ.