დიდი ბრიტანეთი აბსოლუტურად რჩება ერთ-ერთ ყველაზე მნიშვნელოვან ინვესტორად საქართველოს ეკონომიკაში, - აღნიშნა ლონდონში გამართულ საინვესტიციო ფორუმზე გამოსვლისას დირექტორის მოადგილემ ცენტრალური აზიასა და აღმოსავლეთ სამეზობლოში, ბრიტანეთის ყოფილმა ელჩმა საქართველოში. ფორუმზე მარკ კლეიტონის გამოსვლას კი Business Insider Georgia ექსკლუზიურად გთავაზობთ. 

მარკ კლეიტონის თქმით, 2024 წელს დიდი ბრიტანეთი იყო საქართველოში პირდაპირი უცხოური ინვესტიციების ყველაზე დიდი წყარო.

„როგორც გაერთიანებული სამეფოს ელჩი საქართველოში 2020 წლიდან 2024 წლამდე, ამ როლში დიდი პატივი იყო გაერთიანებული სამეფოსა და საქართველოს შორის მზარდი სავაჭრო და ეკონომიკური ურთიერთობების მხარდაჭერა. შემიძლია ვისაუბრო დიდი ბრიტანეთის მთავრობის სახელით ჩემს ახალ ამპლუაში. სტატისტიკის მიხედვით დიდი ბრიტანეთი აბსოლუტურად რჩება ერთ-ერთ ყველაზე მნიშვნელოვან ინვესტორად საქართველოს ეკონომიკაში. 2024 წელს დიდი ბრიტანეთი იყო საქართველოში პირდაპირი უცხოური ინვესტიციების ყველაზე დიდი წყარო. გასულ წელს დიდი ბრიტანეთის ინვესტიციები გაიზარდა 23%-ით, რაც დაახლოებით 500 მილიონ დოლარს შეადგენს. ჩვენ პასუხისმგებლები ვართ კიდევ უფრო მეტ ინვესტიციაზე და ეს მართლაც შთამბეჭდავი რიცხვებია. ასე რომ, გაერთიანებულ სამეფოს სურს, რომ საქართველოს ეკონომიკა წარმატებული იყოს და დარჩეს გაერთიანებულ სამეფოსთან ევროპაში ინტეგრირებული.
ჩვენ ვხედავთ დიდ ინტერესს დინამიური ქართული კომპანიების მხრიდან დიდ ბრიტანეთთან თანამშრომლობისთვის. წელს ჩვენმა ბიზნესისა და ვაჭრობის დეპარტამენტმა 100-ზე მეტი ქართული კომპანია შემოიყვანა დიდი ბრიტანეთის ფინტექში, არქიტექტურაში, მწვანე ენერგიასა და ტექნოლოგიებში, რაც ჩვენი თანამშრომლობის პოტენციალის რეკორდული რაოდენობა და მტკიცებულებაა. ასევე მოხარული ვარ, რომ ვხედავ ამდენი ბრიტანული კომპანიის შესვლას ქართულ ბაზარზე“, - განაცხადა მარკ კლეიტონმა.

აღნიშნული საინვესტიციო ფორუმი ლონდონის საფონდო ბირჟისა და საქართველოს საელჩოს ინიციატივით გაიმართა, სადაც საქართველოს საინვესტიციო მიმზიდველობა, სხვადასხვა ბიზნეს-სექტორების განვითარების პოტენციალი და ამ კუთხით არსებული მხარდამჭერი პროგრამები განიხილეს. წლევანდელ ფორუმში სხვადასხვა საინვესტიციო კომპანიებიდან და ჯგუფებიდან 180-ზე მეტი წარმომადგენელი მონაწილეობდა.