ეკონომიკური ფორუმის ფარგლებში ძალიან საინტერესო დისკუსია შედგა მიმდინარე ეკონომიკურ მდგომარეობასთან დაკავშირებით, - ამის შესახებ ფინანსთა მინისტრმა ლაშა ხუციშვილმა ეკონომიკური ფორუმის მე-20 დისკუსია დასრულების შემდეგ განაცხადა, რომლის თემაც „საქართველოს საფინანსო და საინვესტიციო პოლიტიკა“ იყო.

ფინანსთა მინისტრთან ერთად პანელურ დისკუსიაში მონაწილეობდნენ საქართველოს პარლამენტის დარგობრივი ეკონომიკისა და ეკონომიკური პოლიტიკის კომიტეტის თავმჯდომარე შოთა ბერიკაშვილი და „ორბი ჯგუფის“ გენერალური დირექტორი ირაკლი კვერღელიძე.

ღონისძიებას მოდერაციას უწევდა საქართველოს ეკონომიკური ფორუმისა და Business Insider Georgia-ს დამფუძნებელი და ხელმძღვანელი გიორგი აბაშიშვილი.

„ეკონომიკური ფორუმის ფარგლებში ძალიან საინტერესო დისკუსია შედგა მიმდინარე ეკონომიკურ მდგომარეობასთან დაკავშირებით. ასევე, იმ სტრუქტურულ რეფორმებზე და იმ ეკონომიკურ მიმართულებებზე, რომელიც ძალიან აქტუალურია დღეს ქვეყანაში. დღეს საქართველოს ეკონომიკა არის ერთ-ერთი ყველაზე სწრაფად მზარდი მსოფლიოში და მნიშვნელოვანია, რომ ასეთი დონის ეკონომიკური ზრდა მიიღწევა იმ პირობებში, როდესაც ქვეყანა სრულად ინარჩუნებს მაკროეკონომიკურ სტაბილურობას, დაბალი ვალის დონეს, დაბალი დეფიციტის დონეს, დაბალი მიმდინარე ანგარიშის დეფიციტის მაჩვენებელს და მიზნობრივ მაჩვენებელთან ძალიან ახლოს მყოფ ინფლაციას. ამ მიმართულებით საქართველო არის ძალიან გამორჩეული ქვეყანა მსოფლიოში, რაც კიდევ ერთხელ შესაძლებლობას გვაძლევს, რომ კიდევ უფრო მეტი ინვესტიცია მოვიზიდოთ საქართველოში, როგორც საჯარო ისე კერძო სექტორში“, - განაცხადა ფინანსთა მინისტრმა.