ტურიზმს აქვს უდიდესი გავლენა ჩვენი ქვეყნის ეკონომიკაზე, - ამის შესახებ გადაცემა „იმედის დილაში“ რუბრიკა Business Insider Georgia-ში სტუმრობისას ქვეყნის ეკონომიკისა და მდგრადი განვითარების მინისტრმა განაცხადა. მარიამ ქვრივიშვილის თქმით, მას აქვს ასევე გადამდები ეფექტი.

„ჩვენ ვხედავთ, რომ ტურიზმი ერთ-ერთი გამორჩეულად მზარდი სექტორია, რომელიც ასევე ქმნის ახალ სამუშაო ადგილებს. ჩვენ ვამბობთ, რომ ტურიზმი მნიშვნელოვანია რამდენადაც ხელს უწყობს ქვეყანაში უცხოური ვალუტის შემოდინებას. და ასევე ჩვენ ვხედავთ, რომ ეს ყველაფერი პირდაპირპროპორციულად ისახება კეთილდღეობაზე. ჩვენი ამოცანაც ეს არის, რომ უზრუნველყოთ ტურიზმის სექტორი განვითარდეს მდგრადად, უზრუნველყოთ ის, რომ შემოვიყვანოთ კიდევ უფრო მეტი მსყიდველუნარიანი ტურისტი. შემდგომში ვიზრუნოთ იმაზე, რომ ერთი ტურისტის დანახარჯი თანაბრად გადანაწილდეს სხვადასხვა რეგიონში, დაბასა თუ სოფელში. ასევე სახელმწიფო აგრძელებს აქტიურ ჩარევას ამ სექტორის განვითარების კუთხით და მეორეს მხრივ მჭიდრო თანამშრომლობას კერძო სექტორთან. ჩვენ გვაქვს ძალიან აქტიური, მასშტაბური და ვიტყოდი საკმაოდ ეფექტური მარკეტინგული კამპანიები იმისთვის, რომ საქართველომ განაგრძოს იყოს ერთ-ერთი კონკურენტუნარიანი მიმართულება - ტურისტული მიმართულება იმისთვის, რომ შევინარჩუნოთ მოთხოვნადობა. მეორეს მხრივ, ჩვენ იცით პარალელურ რეჟიმში ძალიან ბევრი რამ გავაკეთეთ იმისთვის, რომ ჩვენს ქვეყანაში ოპერირებდეს 70-ზე მეტი ავიაკომპანია 120 მიმართულებით. ეს არის ფაქტობრივად ის ხელშესახები შედეგი, რაც გულისხმობს იმას, რომ ეს არის ისტორიული მაქსიმუმი ჩვენი ქვეყნის სამოქალაქო ავიაციის ისტორიაში. რატომ არის ეს ორი რამ მნიშვნელოვანი, რამდენადაც იზრდება პირდაპირი ფრენები, ჩვენ ვხედავთ, რომ ყოველ წელს არაერთი ახალი ავიაკომპანია გვემატება და საქართველოში იწყებს ოპერირებს. ეს ნიშნავს, რომ მათ სჯერათ ჩვენი ქვეყნის ტურიზმის ინდუსტრიის, სჯერათ, რომ ეს სექტორი იზრდება მდგრადად. აქედან გამომდინარე ჩვენ შევძელით და შემოვიყვანეთ British Airways, კვირაში უკვე 6 სიხშირით პირდაპირი ფრენა დიდი ბრიტანეთთან, შვეიცარიასთან, საფრანგეთთან, გერმანიასთან, ყურის ქვეყნებთან, ჩინეთთან“, - აცხადებს მინისტრი.