იტალიის გამოცდილება ინჟინერიის, დიზაინისა და პროექტების მართვის სფეროში იდეალურად შეესაბამება საქართველოს მიმდინარე ინფრასტრუქტურული განვითარების პროცესებს და მის ამბიციას გახდეს რეგიონული სატრანზიტო ჰაბი, - აცხადებს Business Insider Georgia-სთან ექსკლუზიურ ინტერვიუში საქართველოში იტალიის ელჩი.

მასიმილიანო დ'ანტუონოს განმარტებით, ამ მიმართულებით მზარდი პოტენციალი არსებობს IT სერვისებში, მსუბუქ მრეწველობასა და წარმოებაში.

„ეკონომიკური თანამშრომლობის გაღრმავებისთვის მნიშვნელოვან სექტორებს წარმოადგენს ინფრასტრუქტურა და მშენებლობა, განახლებადი ენერგია, აგროსასურსათო გადამუშავება, ტურიზმი და სტუმართმოყვარეობა, ლოგისტიკა და წარმოება. ამ კონტექსტში, იტალიის გამოცდილებამ ინჟინერიის, დიზაინისა და პროექტების მართვის სფეროში იდეალურად შეესაბამება საქართველოს მიმდინარე ინფრასტრუქტურული განვითარების პროცესებს და მის ამბიციას გახდეს რეგიონული სატრანზიტო ჰაბი.

მზარდი პოტენციალი არსებობს IT სერვისებში, მსუბუქ მრეწველობასა და  წარმოებაში, სადაც იტალიური ტექნოლოგიური ცოდნა და მცირე და საშუალო საწარმოების გამოცდილება ეფექტურად შეიძლება გაერთიანდეს საქართველოს კონკურენტულ სამუშაო ძალასთან. დამატებით, თანამშრომლობა განათლების, პროფესიული მომზადებისა და ინოვაციების ეკოსისტემებში კიდევ უფრო შეუწყობს ხელს ორი ქვეყნის შორის გრძელვადიან, მდგრად პარტნიორობას.

ამ ხედვის გათვალისწინებით, იტალიის საელჩომ, იტალიური სავაჭრო სააგენტოს ოფისთან მჭიდრო კოორდინაციით, 2024 და 2025 წლებში თბილისში წარმატებით მოაწყო ორი ბიზნეს-ფორუმი, რომლებმაც შეკრიბეს იტალიური კომპანიები და საქართველოს ორგანიზაციები და შესაბამისი უწყებები, რომლებიც აგროსასურსათო სექტორში და ინფრასტრუქტურის სფეროში მოქმედებენ, რაც მიზნად ისახავდა თანამშრომლობის გაღრმავებას ამ პერსპექტიულ მიმართულებებში“, - აცხადებს იტალიის ელჩი.