საქართველოს ფინანსთა მინისტრის განცხადებით, ევროობლიგაციების გამოშვება ყველა ძირითადი პარამეტრით წარმატებული აღმოჩნდა. მისი თქმით, სახელმწიფომ დამატებით 500 მილიონი აშშ დოლარი მოიზიდა, რომელიც 2021 წელს გამოშვებული ევროობლიგაციების რეფინანსირებას მოხმარდება.

როგორც გადაცემა „იმედის დილაში“ რუბრიკა Business Insider Georgia-ში სტუმრობისას ლაშა ხუციშვილმა აღნიშნა, ტრანზაქციაში 100-ზე მეტი საერთაშორისო ინვესტორი მონაწილეობდა. 

„ეს იყო ევროობლიგაციების წარმატებული გამოშვება ყველა შეფასებით და ყველა იმ პარამეტრით, რითაც ღია ბაზარზე ევროობლიგაციების გამოშვება ფასდება. ბუნებრივია, პირველ რიგში საუბარია იმაზე, რომ ქვეყანამ შეძლო და საკმაოდ მარტივად მოიზიდა დამატებით 500 მილიონი დოლარის ოდენობით თანხა, რომელიც გამოიყენება 2021 წელს გამოშვებული ევროობლიგაციების რეფინანსირებისთვის. თუმცა, გარდა ამისა, არის ორი ძირითადი პარამეტრი, რისთვისაც მნიშვნელოვანია ევროობლიგაციების გამოშვება ლონდონის საფონდო ბირჟაზე: ეს არის ქვეყნის რისკიანობის მაჩვენებელი და ქვეყნის ნდობის მაჩვენებელი საერთაშორისო ინვესტორების მხრიდან. ორივე პარამეტრით ძალიან წარმატებული იყო გამოშვება, იქიდან გამომდინარე, რომ რისკიანობის მაჩვენებელი არის წინა გამოშვებასთან შედარებით მნიშვნელოვნად შემცირებული - დაახლოებით ეს სხვაობა 50 საბაზისო პუნქტია, რაც ქვეყნის რისკიანობის მაჩვენებლის 25%-ზე მეტით შემცირებაა. ხოლო, მეორეს მხრივ, მოთხოვნა დაფიქსირდა უპრეცედენტოდ მაღალი - ეს იყო 5,5-ჯერ მეტი ოდენობა, ვიდრე შეთავაზებული იყო ბაზარზე. და აქ არ არის საუბარი ერთ და ორ ინვესტორზე, უშუალოდ ტრანზაქციაში 100-ზე მეტმა საერთაშორისო ინვესტორმა მიიღო მონაწილეობა და ისინი მზად იყვნენ საქართველოში, საქართველოს მიერ გამოშვებულ ფასიან ქაღალდებში 2.8 მილიარდი  დოლარის ინვესტირება განეხორციელებინათ“, - აცხადებს ლაშა ხუციშვილი.

მისი განმარტებით, მნიშვნელოვანია ის, რომ საერთაშორისო ინვესტორები ენდობიან ქვეყანას და ეს ნდობა გამოიხატება იმაშიც, რომ ისინი ავად აფასებენ ქვეყნის რისკიანობას უფრო დაბალ ნიშნულზე, ვიდრე ეს წინა პერიოდში იყო

„ბუნებრივია, ეს არის ნდობა, რომელსაც საერთაშორისო ინვესტორები ამჟღავნებენ ქვეყანაში მიმდინარე რეფორმების მიმართ - ეს იქნება ფისკალურ ნაწილში, მონეტარულ ნაწილში, ეკონომიკური რეფორმების მიმართ. იმის გათვალისწინებით, რომ გამოშვება ხუთწლიანი ევროობლიგაციების ფორმატში განხორციელდა, ინვესტორები აფასებენ არა მხოლოდ ეკონომიკის მიმდინარე მდგომარეობას, არამედ მომდევნო ხუთი წლის პერსპექტივასაც. შესაბამისად, ამ პროცესში გამოიკვეთა საქართველოს ეკონომიკისა და ქვეყანაში განხორციელებული ეკონომიკური რეფორმების მიმართ მაღალი ნდობა“, - აცხადებს ლაშა ხუციშვილი.