Photomate Caucasus-ის რეგიონული დირექტორის, დავით ტყეშელაშვილის განცხადებით, მიუხედავად იმისა, რომ ჰიდროენერგეტიკის განვითარება ქვეყნისთვის სტრატეგიულად მნიშვნელოვანია, პარალელურად საჭიროა ქარისა და მზის ენერგიის პროექტების დაბალანსებული განვითარებაც, რათა ინვესტორებისთვის გრძელვადიანი პროგნოზირებადი გარემო შეიქმნას.

როგორც ტელეკომპანია „მაესტროს“ ეთერში, გადაცემა Business Insider Georgia-ში სტუმრობისას, დავით ტყეშელაშვილმა აღნიშნა, ასევე მნიშვნელოვანია ქვეყნის შიგნით ელექტროენერგიის მოხმარების ზრდა, რაც იმპორტზე დამოკიდებულების შემცირებასა და ენერგოსისტემის სტაბილურობას შეუწყობს ხელს.

„კიდევ ერთხელ მინდა აღვნიშნო, რომ როდესაც სახელმწიფო მოდიოდა ბიზნესთან სალაპარაკოდ, ძალიან მისასალმებელია, რომ ისინი იყვნენ ღია და გულწრფელები. ქალბატონმა მინისტრმა ხაზგასმით აღნიშნა და ყველას მოუწოდა, პირდაპირი სათქმელი ეთქვათ ბიზნესთან - ეს იქნება ჰიდრო, ქარი თუ მზე - რათა დაენახათ, რა გამოწვევებისა და პრობლემების წინაშე შეიძლება დადგნენ 10-წლიან გრძელვადიან პერიოდში. ისინი აპრიორიტეტებენ ჰიდროს, რაც, რა თქმა უნდა, სწორია ჰიდრო უნდა იყოს ჩვენი ქვეყნის სავიზიტო ბარათი და ნამდვილად უნდა განვავითაროთ ის, რაც ყველაზე მეტად შეგვიძლია. თუმცა ჩვენს ქვეყანაში არის შესაძლებლობა, რომ ასევე განვითარდეს ქარიც და მზეც. სახელმწიფო ფიქრობს, რომ ჯერ უნდა განვითარდეს ქარი, შემდეგ მზე.

მე, როგორც მზის სექტორის წარმომადგენელი, ვფიქრობ, რომ ამ ნაწილში კიდევ უფრო აუცილებელია მსჯელობა, ექსპერტების ჩართვა, ჰიდროსა და ქარის შედარება, სიმულაციების ჩატარება, რათა ზუსტად დავინახოთ, რამდენად შეესაბამება ეს რეალობას. საჭიროების შემთხვევაში, როცა იქნება ჭარბი ენერგია, უნდა მოხდეს შეზღუდვები და პრიორიტეტი დაინიშნოს ჰიდროსთვის, შემდეგ  ქარისთვის, ხოლო მზის ენერგია გამოყენებული იქნას მხოლოდ ჭარბი სიმძლავრის დროს. ეს პროცესი ასე არ უნდა განხორციელდეს, რადგან როგორც ინვესტორი, რომელიც გეგმავს ძალიან დიდ პროექტებს, მნიშვნელოვანია, რომ 10-წლიან გეგმაში არ ვდგე ისეთ პრობლემებთან, რომ მომიწიოს ენერგიის შეზღუდვა ან გათიშვა. მესმის, რომ ჰიდრო უნდა განვითარდეს და ქვეყანა უნდა გახდეს თვითკმარი, თუმცა ამავე დროს აუცილებელია ელექტროენერგიის მოხმარების ზრდა“, - აცხადებს დავით ტყეშელაშვილი.

ტყეშელაშვილის განცხადებით, ენერგეტიკის სექტორის განვითარებისთვის მნიშვნელოვანია როგორც საექსპორტო მიმართულებების დივერსიფიკაცია, ისე ქვეყნის შიგნით ელექტროენერგიის მოხმარების ზრდა. მისი თქმით, ისეთი პროექტები, როგორიცაა შავი ზღვის წყალქვეშა კაბელი და მწვანე ენერგიის დერეფანი, საქართველოს ექსპორტის შესაძლებლობებს გააფართოებს, თუმცა პარალელურად სახელმწიფომ ხელი უნდა შეუწყოს ადგილობრივი მოხმარების ზრდასაც, მათ შორის შესაბამისი სტიმულებისა და სუბსიდიების მეშვეობით. ეს ხელს შეუწყობს ბიზნესს, ელექტროენერგიის მოხმარებაზე გადასვლასა და განახლებადი ენერგიის, განსაკუთრებით მზის პროექტებში ინვესტიციების ზრდას.

„მე მხარს ვუჭერ იმას, რომ ქვეყანაში გაიზარდოს ელექტროენერგიის თვითმოხმარება. ვფიქრობ, სახელმწიფო ამაზე დაიწყებს ზრუნვას. ყველაფერი ერთად ვერ მოხდება, ამიტომ აუცილებელია სუბსიდიები, რომ მე, როგორც საწარმოს მფლობელს, გამიჩნდეს ინტერესი გადავიდე ელექტროენერგიის მოხმარებაზე. შედეგად, სახელმწიფოსა და ბიზნესს ექნება ნაკლები პრობლემა და მეც უფრო მეტად მომინდება მზის ინვესტიციების განხორციელება ქვეყანაში“, - განმარტავს Photomate Caucasus-ის რეგიონული დირექტორი.