საქართველო საჰაერო სივრცის გამტარუნარიანობის ზრდას გეგმავს, რაც თავის მხრივ სივრცის გამოყენებაზე გაზრდილ მოთხოვნაზე დამოკიდებული. როგორც რადიო „სივრცის“ ეთერში, გადაცემა Business Insider Georgia-ში სტუმრობისას საქაერონავიგაციის გენერალური დირექტორის მოადგილემ ზურაბ ავალიშვილმა განაცხადა, ინფრასტრუქტურულად დღეს ვართ დალაგებული ისე, რომ საათში პირობითად 75 საჰაერო ხომალდის გატარება ხდება. თუმცა არსებული სტატისტიკით, 2024 წლის ზაფხულში იყო გარკვეული დღეები, როცა საქაერონავიგაციის მიერ 24 საათში 1000 ფრენის მომსახურება ხდებოდა.

„ევროპული ავიაციისთვის ყველა მეტი ფრენა 2019 წელს იყო და მაშინ ყველა დავფიქრდით, რომ უფრო მეტი ადგილი იყო მოსაძებნი საჰაერო სივრცეში, ვინაიდან თუ ასე განვითარდებოდა ფრენების რაოდენობა უფრო მეტი ფრენისთვის გვექნებოდა მისახედი. 2019 წლის შემდეგ პანდემია იყო და თითქმის 0-ზე დავიდა ყველაფერი. პანდემიამ არამარტო ჩვენ, ყველა სერიოზულად შეგვაფერხა. კადრების აყვანის კუთხით, განვითარების კუთხით. როგორც აღვნიშნე ეს ეკონომიკასავით არის ციკლური. შეიძლება რაღაც ჩავარდნა იყოს, მაგრამ განვითარებას და ფრენების მომატებას ვერაფერი წინ ვერ დაუდგება. არის ასეთი მოსაზრება, რომ 2050 წლისთვის ფრენების რაოდენობა მსოფლიოში უნდა გაორმაგდეს. ამ ეტაპიდან, დღევანდელი გადასახედიდან ჩვენ გვაქვს ორი მიმართულება არჩეული. ერთი მიმართულება არის კადრების აყვანა და მათი მომზადება. ავიამეთვალყურეების აყვანა და მომზადება ერთ დღეში არ ხდება. პირველი გასაუბრებიდან, მეთვალყურის პოზიციაზე რომ აგვყავს ადამიანი, ალბათ სამი წლის თავზე ხდება მისი დამოუკიდებლად დაჯდომა სამუშაო პულტთან და საჰაერო ხომალდებთან მუშაობა. აქედან გამომდინარე, როგორც აღვნიშნე ამ მიმართულებით სერიოზულად შეგვაფერხა პანდემიამ, მაგრამ როგორც კი პანდემია მორჩა, ფრენებმა მოიმატა და უკვე მესამე წელია მეთვალყურეები აგვყავს. წელსაც გვიდევს ბიზნეს გეგმაში. ერთი მნიშვნელოვანი ნაწილი ეს არის მეთვალყურეები და კადრები და მეორე ჩვენი საჰაერო სივრცის დიზაინის გადაკეთება. არის უამრავი შესაძლებლობა, რაზეც ჩვენი ექსპერტები საერთაშორისო პარტნიორებთან ერთად მუშაობენ. რაღაც გამოცდილებას აქეთ ჩვენ ვუზიარებთ.
გეგმა გვაქვს, რომ საქართველოს საჰაერო სივრცის გამტარუნარიანობა გავზარდოთ. მიმდინარე წელს და ზოგადად სამი წლის ჭრილში რა მოლოდინიც გვაქვს არსებული გამტარუნარიანობა სავსებით საკმარისია. ამ პერიოდის მერე რა გეგმაც გვაქვს, რა რაოდენობის ადამიანის აყვანაც გვინდა და ინფრასტრუქტურულ პროექტებთან ერთად განვახორციელებთ საჰაერო სივრცის დიზაინის კიდევ პატარა ჩასწორებას. არსებულ პოტენციალსაც გავზრდით“, - აცხადებს საქაერონავიგაციის გენერალური დირექტორის მოადგილე.