„ევროკომისიამ ორმხრივი ინტერესის მქონე პროექტების სტატუსის მისაღებად ჩამონათვალი გამოაქვეყნა, სადაც საქართველო-რუმინეთის ერთობლივი შავი ზღვის წყალქვეშა კაბელის პროექტიც შეიყვანა. ეს ძალიან მნიშვნელოვანია, რადგან სტატუსის მოპოვების შემთხვევაში, შესაძლებელი ხდება პროექტმა მიიღოს საგრანტო დაფინანსება, რაც იმას გულისხმობს, რომ სამშენებლო სტადიაზე, სპეციალური ნებართვების, რეგულაციების, სამართლებრივი ჩარჩოს მოპოვება და შესრულება ბევრად გამარტივებულ ფორმატში გადავიდეს და სწრაფად მოხდეს პროექტის განხორციელება" - ამის შესახებ ეკონომიკისა და მდგრადი განვითარების მინისტრის მოადგილემ, ინგა ფხალაძემ ევროკომისიის მიერ გამოცემული მარეგულირებელი აქტის შეფასებისას განაცხადა.

როგორც ინგა ფხალაძემ აღნიშნა, ამ ეტაპზე უკვე დასრულებულია შავი ზღვის წყალქვეშა კაბელის პროექტის ტექნიკურ-ეკონომიკური კვლევა, შემდეგი ფაზა ითვალისწინებს შავი ზღვის ფსკერის გეოტექნიკურ და გეოფიზიკურ შესწავლას, რის შემდეგაც მოხდება სამშენებლო ეტაპზე გადასვლა.

„პროექტი საქართველოს აძლევს შესაძლებლობას, გახდეს რეგიონის ენერგეტიკული ჰაბი და წყალქვეშა კაბელის გავლით შეძლოს ევროკავშირის ქვეყნებთან ელექტროენერგიით ვაჭრობა. სამხრეთ კავკასიიდან საჭირო რაოდენობის ელექტროენერგიის მიღების შესაძლებლობით აღნიშნული პროექტი ასევე ხელს შეუწყობს ევროკავშირის ენერგოუსაფრთხოების გაზრდას" - განაცხადა ეკონომიკის მინისტრის მოადგილემ.

შავი ზღვის კაბელის პროექტმა აქტიური ტექნიკურ-ეკონომიკური შემოწმება გაიარა ევროკომისიის ენერგეტიკის დირექტორატში, რომელმაც კიდევ ერთხელ დაადასტურა მისი მნიშვნელობა, საჭიროება და პოტენციალი. დოკუმენტის რეგულაციად ქცევის შემთხვევაში, კაბელის პროექტი მოექცევა ევროკავშირის ენერგეტიკული კანონმდებლობის ქვეშ. ამ გადაწყვეტილებით პროექტს გაუჩნდება წვდომა ევროკავშირის სპეციალურ საგრანტო დაფინანსების ინსტრუმენტებთან, რომელიც დაკავშირებადობის ხელშესაწყობად საერთო და ორმხრივი მნიშვნელობის პროექტებს აფინანსებს. აღნიშნულის გარდა, ორმხრივი მნიშვნელობის პროექტის სტატუსი უაღრესად მნიშვნელოვანი რეპუტაციული ბენეფიტი იქნება პროექტისთვის ბიზნეს და საინვესტიციო მოდელის ჩამოყალიბების კუთხით.