ეს არის ახალი ფურცელი ენერგეტიკაში და ძალიან მნიშვნელოვანი და წინ გადადგმული ნაბიჯი, - ასე აფასებს ენერგეტიკული ინფრასტრუქტურის მშენებელ კომპანია „ბემონის“  მმართველი პარტნიორი გიორგი მირცხულავა ენერგეტიკის სექტორში მოქმედი კომპანიებისთვის, რომლებიც ჩართულები არიან განახლებადი ენერგიის პროექტების განვითარების პროცესში, კონკრეტული დათქმით სახელმწიფოს წინაშე დაგროვილი ჯარიმების ჩამოწერას. 

როგორც მირცხულავა განმარტავს, ეს არის ერთგვარი ბიძგი სექტორისთვის, რათა წინ წავიდეს და სხვადასხვა პროექტები განახორციელოს.

„ალბათ უმნიშვნელოვანესი ნაბიჯია სექტორისთვის, რადგანაც ეს არის რეალური ბიძგი, რაც სექტორს საშუალებას მისცემს, რომ წინ წავიდეს. იმიტომ, რომ ქართული ეკონომიკა დღესაც დგას და მომავალშიც იდგება ენერგეტიკაზე და იმისათვის, რომ ჩვენ გავხდეთ თვითკმარი და ექსპორტზე დავიწყოთ მუშაობა და თავიც დავაკმაყოფილოთ - რეალური საექსპორტო პროდუქტი შევქმნათ უნდა განვავითაროთ ენერგეტიკა. შესაბამისად ეს არის უმნიშვნელოვანესი გადაწყვეტილება და ამაზე დიდი ხანი მიდიოდა მუშაობა - ჩართული იყო სახელმწიფო კომპანიები, ჩართული იყო მთელი ენერგეტიკული სექტორი და მიდიოდა მიდიოდა მსჯელობა საკმაოდ დიდი ხანი. მადლობის მეტი სექტორს არ ეთქმის. 

ეს დავალიანება დაგროვდა წლების განმავლობაში, რომელიც უკავშირდება ხშირ შემთხვევაში სექტორში დეველოპერებს, რომლებიც რაღაცა ეტაპებზე ვერ ახერხებდნენ თავიანთი ვალდებულებების შესრულებას მემორანდუმის კუთხით. ეს ეხება თანხების მოძიებას, პროექტების დაწყებას და ასე შემდეგ. თუმცა ზოგიერთ შემთხვევაში წინაღობებიც იყო სახელმწიფოს სხვადასხვა ორგანოების მხრიდან წინა წლებში, არ იყო ერთობლიობა. შეიძლება ერთი სახელმწიფო ორგანიზაცია აძლევდა რაღაცის დაწყების ნებართვას, ამ დროს მეორე იგვიანებდა და ხელშეკრულებით დეველოპერზე უკვე ჯარიმა იყო. ეს არის ახალი ფურცელი ენერგეტიკაში და ძალიან მნიშვნელოვანი და წინ გადადგმული ნაბიჯი. ახლა უკვე ბურთი უკვე დეველოპერების მხარესაა და რეალური, პოტენციური ინვესტორები ისინი არიან ვინც მზად არიან, რომ მშენებლობა დაიწყონ და გარკვეულ ვადებში მიიყვანონ თავიანთი პროექტი. ახლა ამის შესაძლებლობა აქვთ ამ ჯარიმების გარეშე და ეს გამოიწვევს ერთგვარ ბიძგს“, - აცხადებს გიორგი მირცხულავა.

ქვეყნის პრემიერ-მინისტრის განმარტებით, ენერგეტიკის სექტორში მოქმედ ყველა კომპანიას, რომელიც ჩართულია განახლებადი ენერგიის პროექტების განვითარების პროცესში, კონკრეტული დათქმით ჩამოეწერება სახელმწიფოს წინაშე დაგროვილი ჯარიმები, რომლის ჯამური მოცულობა 1 მილიარდი ლარია.

ირაკლი კობახიძის თქმით, დავალიანებები, ჯარიმებისა თუ საურავების სახით, რომლებიც კომპანიებს გასული წლების განმავლობაში დაუგროვდა, ენერგეტიკის სისტემის განვითარებას ერთ-ერთ დაბრკოლებას უქმნის.

მისივე განმარტებით, დავალიანებების პატიება უნდა გახდეს ახალი, ორმხრივ თანამშრომლობაზე დაფუძნებული, თუმცა, ამასთანავე, პასუხისმგებლობით გაჯერებული პროცესის დასაწყისი.

„ეს ნიშნავს ახალ შეთანხმებებს, ახალ გრაფიკს და ახალ გონივრულ ურთიერთვალდებულებებს სახელმწიფოსა და კომპანიებს შორის. ჩვენ მკაცრად მივუდგებით ახალ შეუსრულებელ ვალდებულებებს ან ახალ დავალიანებებს სახელმწიფო ბიუჯეტის წინაშე.

ჩვენი ახალი მიდგომით, ვიწყებთ ისეთი ენერგეტიკული პოლიტიკის დანერგვას, რომელიც მისაღები იქნება ენერგეტიკის სფეროში ჩართული კომპანიებისათვის და რომლიდანაც მაქსიმალურ სარგებელს მიიღებს ქვეყანა. ჩვენი დღევანდელი გადაწყვეტილება ახალ სტიმულს მისცემს ენერგეტიკის სისტემის განვითარებას, რასაც ქვეყნის ეკონომიკური განვითარებისა და ეკონომიკური დამოუკიდებლობის განმტკიცებისთვის გადამწყვეტი მნიშვნელობა ენიჭება.

მადლობას ვუხდი საქართველოს ეკონომიკისა და მდგრადი განვითარების მინისტრს, ქალბატონ მარიამ ქვრივიშვილს და სამინისტროს გუნდს ამ უმნიშვნელოვანესი გადაწყვეტილების მომზადებისთვის. ენერგეტიკულ კომპანიებს მინდა ვუსურვო წარმატებები განახლებადი ენერგიის პროექტების განხორციელების პროცესში", - განაცხადა პრემიერმა.