„ენერგეტიკული სექტორისთვის 1 მლრდ. ლარის ჩამოწერა სახელმწიფოს მხრიდან უმნიშვნელოვანესი გადაწყვეტილებაა. ეს ინვესტორებს, მცირე, საშუალო და მსხვილ მეწარმეებს საშუალებას მისცემს, ენერგეტიკული პროექტები კიდევ უფრო სწრაფად განახორციელონ. გადაწყვეტილება პროცესის გამჭირვალობას უზრუნველყოფს. ამით სახელმწიფო კერძო სექტორთან მიმართებაში სრულიად ახალ პასუხისმგებლობაზე დაფუძნებულ თანამშრომლობაზე გადადის," - განაცხადა ეკონომიკისა და მდგრადი განვითარების მინისტრმა მარიამ ქვრივიშვილმა საქართველოს პრემიერ-მინისტრის ინიციატივის თაობაზე სახელმწიფოს წინაშე დაგროვილი 1 მლრდ ლარის ოდენობის ჯარიმის დათქმით ჩამოწერასთან დაკავშირებით. აღნიშნული გადაწყვეტილება შეეხება ენერგეტიკის სექტორში მოქმედ ყველა კომპანიას, რომელიც განახლებადი ენერგიის პროექტების განვითარების პროცესში მონაწილეობს.

როგორც მინისტრმა განმარტა, ენერგეტიკის სექტორს საქართველოს ეკონომიკაში გამორჩეულად დიდი ღირებულება და მნიშვნელობა აქვს. აქედან გამომდინარე, მისი თქმით, სახელმწიფო ცდილობს, მაქსიმალურად უზრუნველყოს ყველა იმ არსებული ბერკეტისა და შემაფერხებელი გარემოების აღმოფხვრა, რაც ენერგეტიკული პროექტების განხორციელების ტემპის დაჩქარებას განაპირობებს.

მარიამ ქვრივიშვილმა ხაზი გაუსვა იმ გარემოებას, რომ ენერგეტიკული კომპანიებისთვის ჯარიმის ჩამოწერა განსაზღვრული დათქმით ხდება.

„დათქმა ითვალისწინებს ინვესტორების მხრიდან ვალდებულების შეუსრულებლობის შემთხვევაში ჩამოწერილი ჯარიმის სრულად აღდგენას, ისევე როგორც ახალი საურავების დარიცხვას, რომელიც დაკავშირებული იქნება, მათ შორის, შეუსრულებელ ვალდებულებასთან. ჩამოწერილი ჯარიმები სრულად უნდა მოხმარდეს ენერგეტიკული პროექტების განხორციელებას, რაც ჩვენი ქვეყნის ენერგოდამოუკიდებლობის უზრუნველყოფას დააჩქარებს," - აღნიშნა მინისტრმა.