საქართველოს ენერგეტიკისა და წყალმომარაგების მარეგულირებელი ეროვნული კომისიის (სემეკი) თავმჯდომარემ, დავით ნარმანიამ, გადაცემა „იმედის დილაში“ რუბრიკა Business Insider Georgia-ში სტუმრობისას ენერგოდამოუკიდებლობას, სექტორში ინვესტიციების ზრდის სამი ძირითადი მიმართულებას გამოყო და დარგის განვითარების ახალ ფაზაზე ისაუბრა.

ნარმანიას განცხადებით, შავი ზღვის კაბელის პროექტმა ევროპული სტრუქტურებისგან მნიშვნელოვანი ენერგეტიკული ობიექტის სტატუსი მიიღო, რაც მას ორმხრივი ინტერესის პროექტად აქცევს.

„პირველ რიგში, ეს არის შავი ზღვის კაბელის პროექტი, სადაც მნიშვნელოვანი ინვესტიციები განხორციელდება. ამ პროექტმა სულ ახლახან, რამდენიმე კვირის წინ, მიიღო მნიშვნელოვანი ენერგეტიკული ობიექტის სტატუსი, რაც მიანიჭა ევროპის შესაბამისმა სტრუქტურებმა. ეს ნიშნავს, რომ პროექტი გადავიდა განვითარების სხვა ფაზაზე და ის არის ორმხრივი ინტერესის პროექტი. შესაბამისად, ახლა დაიწყება უფრო ინტენსიური სამუშაოები: შავი ზღვის ქვედა ფსკერის ტექნიკური კვლევა, ტექნიკური პროექტის მოსამზადებელი სამუშაოები და სხვა შესაბამისი პროცედურები.

ჩვენ, როგორც მარეგულირებელი კომისია, ჩვენს რუმინელ კოლეგებთან ერთად აქტიურად ჩავერთეთ პროცესში, რათა ერთობლივი რეგულირების ინსტრუმენტები შევიმუშაოთ. გავაფორმეთ მემორანდუმი კოლეგებთან და გვექნება პერიოდული შეხვედრები, დისკუსიები. ასევე შევისწავლით საერთაშორისო პრაქტიკას ამ თვალსაზრისით და აქტიურად ვიმუშავებთ.

მეორე ნაწილი საინვესტიციო აქტივობისა - ეს არის შეღავათები, რაზეც მთავრობამ მიიღო გადაწყვეტილება, და პროექტები, რომლებიც სხვადასხვა დროს ინიცირებული იყო სხვადასხვა ეტაპზე და გარკვეული გარემოებების გამო ვადაგადაცილებული ჰქონდათ, ახლა ვალდებულებები ჩამოეწერა. ეს ნიშნავს, რომ პროექტების დიდი ნაწილი ამოისუნთქავს და უფრო სიცოცხლისუნარიანი გახდება. ახლა კარგად გამოჩნდება, ვის აქვს პროექტების შემდგომი განხორციელების უნარი და ვის არა. პროექტები, რომლებსაც ასეთი უნარი აქვთ, სავარაუდოდ უფრო სწრაფი ტემპით განვახორციელებთ.

და მესამე ნაწილი ინვესტიციების - ეს არის ის, რასაც მარეგულირებელი კომისია აკონტროლებს და უყურებს: განაწილების ქსელში და გენერაციაში უკვე არსებულ ობიექტებში განხორციელებულ ინვესტიციებს. ჩვენ დავეთანხმეთ გამანაწილებელი კომპანიების წინადადებებს, გვქონდა არაერთი სამუშაო შეხვედრა და საინვესტიციო პაკეტი მნიშვნელოვნად იზრდება, როგორც თელასისთვის, ასევე ენერგო-პროსთვის. რატომ? იმიტომ, რომ ავარიები დიდწილად უკავშირდება მოძველებულ ინფრასტრუქტურას - ბოძები, სადენები უნდა გამოიცვალოს, ტრანსფორმატორები, ქვესადგურები უნდა შეკეთდეს და შემდგომ სისტემას ეტაპობრივად გახდება უფრო მდგრადი და ავარიების რაოდენობა შემცირდება.

მათ შორის, სახელმწიფო ელექტროსისტემამაც საკმაოდ მნიშვნელოვანი საინვესტიციო პაკეტი წარმოადგინა და გეგმავს მნიშვნელოვანი პროექტების განხორციელებას, რაც სისტემის სტაბილურობასა და მდგრადობას შეუწყობს ხელს. აქედან გამომდინარე, ამ ნაწილშიც საინვესტიციო აქტივობა მაღალი იქნება. მე, როგორც ეკონომისტი, ვვარაუდობ, რომ ენერგეტიკა, ისევე როგორც ბოლო პერიოდში ინვესტიციების თვალსაზრისით, ეკონომიკის სხვადასხვა დარგებს შორის ერთ-ერთი მოწინავე იყო, მომდევნო წლებში კიდევ უფრო მოწინავე გახდება, როცა საქსტატი შესაბამის წლიურ მაჩვენებლებს შეაჯამებს და გამოაცხადებს. ვინაიდან, როგორც გენერაციაში, ასევე განაწილებასა და გადაცემაში ინვესტიციების მოცულობა უპრეცედენტოდ მაღალია, დაგეგმილი ინვესტიციების მოცულობა მნიშვნელოვანი იქნება“, - განაცხადა დავით ნარმანიამ.