რამდენიმე დღეში საქართველოს  Emaar-ის ჯგუფისა და Eagle Hills-ის დამფუძნებელ მოჰამედ ალი ალაბარი ეწვევა. ის „თბილისის აბრეშუმის გზის ფორუმს“ დაესწრება. როგორც გადაცემა „იმედის დილაში“ რუბრიკა Business Insider Georgia-ში სტუმრობისას ეკონომიკისა და მდგრადი განვითარების მინისტრის მოადგილემ გენადი არველაძემ განაცხადა, ის ფორუმის მონაწილეებს საქართველოში საკუთარ გეგმებზე მოუყვება და დეტალურ ინფორმაციას მიწვდის. 

ცნობილია, რომ „თბილისის აბრეშუმის გზის ფორუმს“ გალფის ქვეყნებიდან საკმაოდ ბევრი ბიზნესმენი დაესწრება. 

„უპრეცედენტო მასშტაბის ინვესტიციაა. ჩვენ ველოდებით როგორც გალფის ქვეყნებიდან, ისევე როგორც რეგიონის ქვეყნებიდან მაღალი დონის სტუმრებს, მათ შორის კერძო სექტორიდან. ჩვენ გვექნება შესაძლებლობა, რომ ბატონ მოჰამედ ალი ალაბარის Eagle Hills-ისა და Emaar-ის ჯგუფის დამფუძნებელს ვუმასპინძლოთ. მას დაეთმობა სპეციალური პანელი, სადაც გვექნება საშუალება, რომ პირადად მოვუსმინოთ. ასე ვთქვათ „ერთი ერთის“ ფორმატში მოდერატორთან ერთად და მას ექნება საშუალება, რომ წარმოადგინოს იმ გეგმების შესახებ ინფორმაცია თუ რას გეგმავს მომავალი წლების განმავლობაში ქვეყნის ეკონომიკაში, რომ წვლილი შეიტანოს Eagle Hills-ის ჯგუფმა ამ მსხვილი პროექტებით, რომელიც დაგეგმილია მომავალი წლების განმავლობაში“, - განაცხადა გენადი არველაძემ.

შეგახსენებთ, რომ „თბილისის აბრეშუმის გზის ფორუმს“ საქართველოს დედაქალაქი 22-23 ოქტომბერს მასპინძლობს. 

ღონისძიებას 50-ზე მეტი ქვეყნიდან 2000-მდე დელეგატი დაესწრება, მათ შორის მაღალი რანგის პოლიტიკური პირები. 22 ოქტომბერს 7 პანელური სესია გაიმართება, რომლებსაც მოდერატორობას მსოფლიოს წამყვანი და აღიარებული წარმომადგენლები გაუწევენ.