მოხარულები ვართ, რომ ბიზნესი ფესტივალებიდან მნიშვნელოვან შემოსავალს იღებს, რომელიც შემდეგ ისევ ადგილობრივ ეკონომიკაში ბრუნდება და ადამიანების დასაქმებას უწყობს ხელს, - ამის შესახებ ტელეკომპანია „მაესტროს“ ეთერში გადაცემა Business Insider Georgia-ში სტუმრობისას თბილისის მერიის ეკონომიკური განვითარების საქალაქო სამსახურის უფროსმა, ვახტანგ ლომჯარიამ განაცხადა. 

„ძალიან საინტერესო ფესტივალები გვქონდა ბოლო ორი შაბათ-კვირის განმავლობაში. ასევე, მიკრო და მცირე მეწარმეობის ხელშეწყობის პროგრამასაც მიმოვიხილავ. გუშინ დასრულდა „თბილისი ფუდ-გენი 2026“.

შაბათ-კვირას პირველად გაიმართა ეს ფესტივალი და მომავალშიც ტრადიციული იქნება, მუდმივად გაძლიერდება, განვითარდება და კიდევ უფრო საინტერესო გახდება. წარმოუდგენლად დიდი ინტერესი დაიმსახურა. მიუხედავად ამინდის გარკვეული ცვალებადობისა, პირველ დღეს მომარაგებული ორი დღის მარაგიც კი ოპტიმისტურად და პესიმისტურად შეფასებული მეწარმეების მიერ ფაქტობრივად საღამოს უკვე თითქმის ყველას გაყიდული ჰქონდა, ამოიწურა და იქ შეიქმნა მეორე დღისთვის სამზადისთან დაკავშირებული შფოთი. იყო ძალიან საინტერესო სანახავი. შეიქმნა მთელი რიგი კულინარიული და გასტრონომიული ფეიერვერკები და კულტურის მასტერკლასები, რაც კარგია. ჩვენ გვქონდა როგორც თეორიული, ასევე პრაქტიკული ნაწილიც, გვქონდა სემინარებიც, მასტერკლასებიც და, პლუს, ადგილზე კეთდებოდა ყველაფერი, რისი დაგემოვნებაც ადგილზე შეიძლებოდა და ის, რისთვისაც შეიძლება მთელი საქართველო მოიარო, რომ დააგემოვნო, შეიძლებოდა ერთ ადგილზე, ერთ მოედანზე, ორბელიანზე, გაგვესინჯა.

გუშინ კარგი გამოხმაურება ჰქონდა როგორც მოსახლეობისგან, ასევე ტურისტებისგან და თვითონ ადგილზე მოსული დაინტერესებული პირებისგან. მომხმარებლებიც კი მეტყველებდნენ იმაზე, თუ როგორი საინტერესო რამ ხდებოდა. მათ შორის საინტერესო ის არის, რომ საკმაოდ ძლიერ წვიმაშიც კი, ქოლგებით ხელში, იდგნენ და არ ტოვებდნენ ადგილს, რომ მასტერკლასი ბოლომდე ენახათ სხვადასხვა პროდუქტებთან დაკავშირებით. მაგრამ შაბათს შეიძლება ითქვას, რომ გაგვიმართლა ასე თუ ისე მაინც გამოდარების კუთხით.

ჩვენ პირველ რიგში ის გვიხარია, რომ ეს, ერთი მხრივ, კარგი იყო როგორც მცირე და საშუალო ბიზნესისთვის, პატარა მეწარმეებისთვის, რომლებიც ახლა ვითარდებიან. შეიძლება ზოგს ახლად შექმნილი ობიექტი აქვს, ზოგს ობიექტი საერთოდ არ აქვს და მარტო ფესტივალებზე გამოდის. მათ ძალიან ეწყობათ ხელი, იმიტომ რომ ჩვენთან არ იხდიან არც ფართთან დაკავშირებულ იჯარას, არც ელექტროენერგიისა და დასუფთავების ხარჯებს. ყველაფერს თბილისის მერიის შესაბამისი სამსახურები უზრუნველყოფენ, ორგანიზებაც ჩვენია და ეს ყველაფერი, რა თქმა უნდა, მათთვის ხელშეწყობაა.

ამას გარდა, ჩვენ ვზრუნავთ იმაზეც, რომ თბილისელებისა და თბილისის სტუმრებისთვის გვქონდეს ადგილი, სადაც შეიძლება მიხვიდე და გემრიელად დააგემოვნო მეგობრებთან თუ ოჯახის წევრებთან ერთად ქართული კულინარიის სხვადასხვა შედევრი და, თან, საუკეთესო შესრულებით. რაც მთავარია, ჩვენ მოწვეული გვყავდა, თუ ვინმე საუკეთესო იყო, ისინი სხვადასხვა ობიექტებიდან. დაწყებული მესხური ხაჭაპურის ცომის გაშლის წარმოუდგენლად ლამაზი სანახაობიდან, დამთავრებული კუბდარით, გურული ბრინჯულათი თუ იმერული ხაჭაპურით კეცზე, თუ სხვა კერძებით, ჩვენ ნამდვილად საინტერესო სანახაობა გვქონდა.

მიუხედავად იმისა, რომ ძირითადად მაინც ასე თუ ისე ცომეული იყო, უზარმაზარი მრავალფეროვნება გვქონდა და ძალიან მოხარული ვართ, რომ ესეთი წარმატებული გამოდგა პირველი ღონისძიება. შემდეგ წლებში კიდევ უფრო განვავითარებთ და უფრო საინტერესო ელემენტებს შევძენთ, რაც დაეხმარება როგორც ბიზნესს განვითარებაში, ასევე იქნება ადგილობრივი მოსახლეობისთვის საყვარელი ადგილი, რომ მიხვიდე და დრო სასიამოვნოდ გაატარო.

წელიწადში მხოლოდ ერთ ღონისძიებას ვგეგმავთ ამ ეტაპზე. ამისგან განსხვავებით, „გაუსინჯე თბილისს გემო“, რომელიც წინა შაბათ-კვირასაც გვქონდა, ორშაბათი-პარასკევის ჩათვლით გვექნება ამ შაბათ-კვირასაც. პარასკევი-შაბათი-კვირა, პირველიდან 11 საათამდე, ვგეგმავთ, რომ ორბელიანზე - თუ ადრე დედაენის ბაღში იყო ახლა დავტოვეთ ფუდ-გენის ადგილზე, ანუ ორბელიანის მოედანზე, იმიტომ რომ ტურისტული ნაკადიც საკმაოდ კარგი იყო და მისადგომადაც, როგორც დავინახეთ, უფრო მარტივი გამოდგა მოსახლეობისთვის.

პირველიდან ღამის 11:00 საათამდე გვექნება შესაძლებლობა, რომ უკვე ეგრეთ წოდებული ქუჩის საკვები ვცადოთ, გვინდა ვნახოთ, აქ როგორი გამოგვივა.
რაც შეეხება მიკრო და მცირე ბიზნესს, ძალიან გვიხარია. პირველ რიგში, ეს გვიხარია, რომ იქ მნიშვნელოვან შემოსავალს პოულობს ბიზნესი, რომელიც მერე ისევ ადგილობრივ ეკონომიკაში ბრუნდება, ასაქმებს ადამიანებს, იყიდება მთელი რიგი პროდუქტები, რომლებიც იქ შექმნილი საბოლოო პროდუქტებისთვის არის საჭირო. მოხარული ვართ, მოკლედ, რომ გიმასპინძლოთ ყველას, როგორც თბილისელებს, ასევე თბილისის სტუმრებს, ადგილზე“, - აცხადებს ვატანგ ლომჯარია.