წლიდან წლამდე მწვანე ენერგიის წილი ჩვენი ენერგიის წარმოებაში იზრდება, - ამის შესახებ გადაცემა „იმედის დილაში“ რუბრიკა Business Insider Georgia-ში სტუმრობისას სემეკის თავმჯდომარემ დავით ნარმანიამ განაცხადა.

„ბოლო წლების განმავლობაში, თუ რამე შენდება და შედის ექსპლუატაციაში საქართველოში, ეს არის მხოლოდ განახლებადი ენერგიის წყაროები. უკვე მერამდენე წელია, არაგანახლებადი ენერგიის წყარო ექსპლუატაციაში არ შესულა. ძირითადად, აქამდე მცირე და საშუალო ჰესები შენდებოდა და შედიოდა ექსპლუატაციაში, ახლა კი ბოლო პერიოდში უფრო წინ წამოვიდა ქარის სადგურები და მზის სადგურები.

ერთ ქარის სადგურზე ჩვენ უკვე გავეცით რამდენიმე თვის წინ ელექტროენერგიის წარმოების ლიცენზია კასპის მუნიციპალიტეტში. ახლა მზადდება და ექსპლუატაციაში შედის ქარის დიდი სადგური, 200 მეგავატზე მეტი დადგმული სიმძლავრით, რომელიც ასევე შემოვა ჩვენთან განაცხადით და უნდა გავცეთ მასზე ელექტროენერგიის წარმოების ლიცენზია.

ასევე, სხვა ქარის სადგურები შენდება მარნეულის მუნიციპალიტეტში. შენდება რამდენიმე მზის სადგურიც, რომლებიც არ იქნება მცირე - 50 მეგავატი დადგმული სიმძლავრის და მეტი. ამ ეტაპზე ორი სადგური შენდება, რომლებიც ასევე მშენებლობის დასრულების შემდეგ შემოვლენ ჩვენთან შესაბამისი ლიცენზიის გაცემის მოთხოვნით.

ამიტომ ბოლო პერიოდში ასეთი განახლებადი ენერგიის წყაროების, როგორიც არის მზისა და ქარის სადგურები, აქტივობა უფრო მეტად შეინიშნება. ასევე, შენდება, რა თქმა უნდა, მცირე და საშუალო ჰიდროელექტროსადგურებიც, რომლებიც ეტაპობრივად შედის ექსპლუატაციაში.

ამდენად, წლიდან წლამდე მწვანე ენერგიის წილი ჩვენს ენერგიის წარმოებაში იზრდება და მიხარია. კიდევ ერთხელ ხაზს ვუსვამ იმას, რომ ამ საერთო კალათაში ეტაპობრივად უფრო მეტი წილი ექნება ქარისა და მზის სადგურებს“, - აცხადებს დავით ნარმანია.