ეკონომიკური ფორუმი არის ძალიან მნიშვნელოვანი, სადაც ბიზნესსექტორს და მთავრობის ეკონომიკური ბლოკის წარმომადგენლებს აქვთ შესაძლებლობა უშუალოდ განიხილონ ქვეყნის წინაშე არსებული საჭიროებები, პერსპექტივები და ის მომავლის ხედვები, - ამის შესახებ „ამბასადორი აილენდ ბათუმის“ გენერალურმა დირექტორმა გოჩა კამკიამ განაცხადა, რომელიც ეკონომიკური ფორუმის 22-ე დისკუსიის ერთ-ერთი სპიკერი იყო.

დისკუსიის თემა „ქვეყნის ტურისტული და საინვესტიციო პოტენციალი, სტრატეგიული პროექტების და ინიციატივების მნიშვნელობა | შესაძლებლობები და გამოწვევები“ იყო.

პანელურ დისკუსიაში მონაწილეობდა საქართველოს პარლამენტის დარგობრივი ეკონომიკისა და ეკონომიკური პოლიტიკის კომიტეტის თავმჯდომარე შოთა ბერეკაშვილი და ამბასადორი აილენდ ბათუმის გენერალური დირექტორი გოჩა კამკია. ღონისძიებას მოდერაციას უწევდა საქართველოს ეკონომიკური ფორუმისა და Business Insider Georgia-ს დამფუძნებელი და ხელმძღვანელი გიორგი აბაშიშვილი.

„დღეს გაიმართა მნიშვნელოვანი ეკონომიკური ფორუმი, სადაც განხილული იქნა საქართველოში ტურისტული პოტენციალი და სტრატეგიული ობიექტების განვითარების მნიშვნელობა ქვეყნის განვითარებაში. აგრეთვე, გვქონდა შესაძლებლობა მოგვესმინა საქართველოს ეკონომიკის და მდგრადი განვითარების მინისტრისთვის, თუ რა პრიორიტეტები ექნება საქართველოს მთავრობას მომავალში. ჩვენის მხრივ მოგვეცა შესაძლებლობა, საზოგადოებისთვის მოგვეხდინა ინფორმირება ბათუმის ხელოვნური კუნძულის განვითარების ეტაპებთან დაკავშირებით, სადაც ჩვენ გვაქვს ნამდვილად შთამბეჭდავი შედეგები. კერძოდ, მიმდინარე წელს, ზაფხულში ვაპირებთ 26 ჰექტარი მიწის ნაკვეთის ექსპლუატაციაში მიღებას და ორი ულტრათანამედროვე შენობა-ნაგებობის განვითარებას. ჯამური საინვესტიციო პოტენციალით დაახლოებით, 600 მილიონი აშშ დოლარი. რაც შეეხება თავად ფორუმს, ეს არის ძალიან მნიშვნელოვანი, სადაც ბიზნესსექტორს და მთავრობის ეკონომიკური ბლოკის წარმომადგენლებს აქვთ შესაძლებლობა უშუალოდ განიხილონ ქვეყნის წინაშე არსებული საჭიროებები, პერსპექტივები და ის მომავლის ხედვები, რომელსაც გეგმავს ეკონომიკური ბლოკი და უნდა იყოს მხარდაჭერილი აგრეთვე ბიზნესის მიერ“, - აღნიშნა „ამბასადორი აილენდ ბათუმის“ გენერალურმა დირექტორმა გოჩა კამკიამ.