საქართველოს საერთაშორისო აეროპორტებში ავიარეისების დაგვიანების გამო მგზავრთა საერთო უკმაყოფილების შესამცირებლად, ეკონომიკისა და შს სამინისტროებმა, საქართველოს აეროპორტების ჩართულობით, ერთობლივი გადაწყვეტილება მიიღეს და იმ მგზავრების გამო, რომელსაც სახელმწიფოში შესვლის უფლება არ მიეცათ ავიარეისების შეყოვნება აღარ მოხდება.

როგორც Business Insider Georgia-სთან კომპანია Voyager-ის ("ვოიაჟერი") დირექტორმა სოფო აზარაშვილმა განმარტა, აღნიშნული გადაწყვეტილება უპირველეს ყოვლისა უმნიშვნელოვანესი იყო თავად საავიაციო ბიზნესისთვის, რადგანაც ამ გზით კომპანიებს ხარჯები აღარ გაეზრდებათ.

„გადაწყვეტილებას ძალიან დადებითად ვაფასებ, რადგანაც ბევრი პრობლემა მოგვიგვარდა ყველას. წლების განმავლობაში დიდი პრობლემები იყო იქიდან გამომდინარე, რომ თითოეულ რეისზე ასეთი ბევრი მგზავრი შეიძლება ყოფილიყო, რომლებიც სხვადასხვა მიზეზების გამო ქვეყანაში ვერ შემოდიოდნენ. ამიტომ საზღვრის დეპარტამენტს უწევდა, რომ ეს მგზავრები უკან გაებრუნებინა. შესაბამისად ვიდრე ეს ყველაფერი მგზავრთან მიმართებაში არ გაირკვეოდა, ის იგივე ბორტით უნდა დაბრუნებულიყო უკან. ამას კი სჭირდებოდა გარკვეული დრო. აქედან გამომდინარე ეს იწვევდა რეისების დაგვიანებას, რაც ავიაკომპანიებისთვის არის უდიდესი პრობლემა. იცით, რომ თითოეული ავიაკომპანია და ბორტი გაწერილი გრაფიკით ოპერირებს და საქართველოდან დანიშნულების ადგილზე ჩამოსვლის შემდეგ, მისი გადამისამართება ხდება სხვა რეისებზე, რაც მთლიანობაში ავიაკომპანიას არამხოლოდ საქართველოში, არამედ გლობალურად უქმნიდა პრობლემას.

ავიაკომპანიების მხრიდან აღნიშნულ საკითხზე საუბრები დიდი ხანია დაწყებულია. ეკონომიკისა და მდგრადი განვითარების სამინისტროს, საქართველოს აეროპორტების გაერთიანების ჩართულობით და ასევე საზღვრის დაცვის სამსახურის მონაწილეობით მიღებულ იქნა ერთობლივი გადაწყვეტილება და ეს მგზავრები, რომელსაც საქართველოში არ შემოუშვებენ რამდენიმე საათს, ან დღეს გაატარებენ თბილისის, ბათუმის და ქუთაისის აეროპორტებში, მომდევნო რეისამდე. გადაწყვეტილება ძალიან კარგია ბიზნესისთვის, ავიაკომპანიებისთვის, რადგანაც რეისები აღარ დაიგვიანებს და ავიაკომპანიის მხრიდანაც უკმაყოფილება ჩვენი საზღვრის, თუ ქვეყნის მიმართ აღარ იქნება“, - აღნიშნა სოფო აზარაშვილმა.

აღსანიშნავია, რომ კომპანია Voyager-ი ავიაკომპანიების flydubai-ს, Gulf Air-ის, Jazeera Airways-ის, Flynas-ის და Indigo-ს გენერალური დისტრიბუტორია საქართველოში.