2026 წლის მარტი-აპრილის პერიოდში საქართველო ევრობონდების გამოშვებას აპირებს. აღნიშნულ საკითხზე ფინანსთა მინისტრმა ეკონომიკური ფორუმის რიგით მეორე დისკუსიის ფარგლებში გამართულ შეხვედრაზე ისაუბრა, რომლის თემაც „საქართველოს საფინანსო და საინვესტიციო პოლიტიკა“ იყო.

ლაშა ხუციშვილმა თქვა, რომ ბონდებზე ინტერესი მაღალია.

„საქართველოს ეკონომიკას საკმაოდ კარგი პერსპექტივები აქვს. მნიშვნელოვანია, რომ გაგრძელდეს საინვესტიციო პროექტების განხორციელება. მათ შორის ისეთი დიდი პროექტები, როგორიც არის ანაკლია, სხვადასხვა საგზაო-ურბანული ინფრასტრუქტურა, ასევე მნიშვნელოვანია კერძო სექტორის მიმართულებით გაგრძელდეს მნიშვნელოვანი პროექტები - ენერგეტიკის სექტორში, ლოგისტიკის სექტორში. ეს ის სექტორებია, რომელსაც დღესდღეობით საკმაოდ პერსპექტიული მიმართულებები აქვს. ბუნებრივია არის მიმართულებები, რომელიც ასევე ძლიერი რგოლია ჩვენი ეკონომიკური ზრდის, როგორიცაა მაგალითად IT სექტორი. ამ მიმართულებით ძალიან ბევრი ახალი ინიციატივებიც არის.

გარდა საფინანსო სექტორის წარმომადგენლებისა ამ შეხვედრებზე ვცდილობთ ასევე შევხვდეთ ინვესტორებს. თქვენ იცით, რომ 2026 წლის მარტ-აპრილში საქართველოს აქვს გამოსაშვები ევრობონდები. ჩვენ გვქონდა როუდ შოუები, სადაც ყველა დიდ საინვესტიციო ბანკებს შევხვდით“, - აღნიშნა ფინანსთა მინისტრმა ეკონომიკურ ფორუმზე სიტყვით გამოსვლისას

მისი თქმით, ბოლო პერიოდში ქვეყანამ საერთაშორისო ინსტიტუტების წლიური შეხვედრების ფარგლებში სხვადასხვა საინვესტიციო ბანკების წარმომადგენლებსაც შეხვდა და აღნიშნულ ემისიაზე მიაწოდა ინფორმაცია.

„ძალიან მნიშვნელოვანი გზავნილი საინვესტიციო ბანკებისგან იქნა მიღებული, რომ ნებისმიერ საინვესტიციო კომპანიას საქართველოს ბონდები შეუძლიათ იყიდონ იყიდონ იმ პირობით, როგორც არასაინვესტიციო ბონდი, მაგრამ რეალურად ეს არის საინვესტიციო ბონდი. ჩვენ ვაგრძელებთ მუშაობას. მივიღეთ შემოთავაზებები თითქმის ყველა საინვესტიციო კომპანიისგან, რომ გახდნენ საქართველოს პარტნიორები. ბუნებრივია, რომ ეს აიხსნება იმით და მე დარწმუნებული ვარ, რომ ეს იქნება ძალიან წარმატებული გამოშვება“, - განაცხადა ფინანსთა მინისტრმა.