„ინვესტორებს აქვთ საკუთარი დღის წესრიგი და ამ დღის წესრიგში ჯდება ისეთი ტიპის საინვესტიციო გარემოს მოძებნა, სადაც შეიძლება უკუგება უფრო მაღალი იყოს, ვიდრე ის სადაც დღეს სტაბილური უკუგებაა“, - აღნიშნულის შესახებ „იმედის დილაში“ რუბრიკა Business Insider Georgia-ში სტუმრობისას საქართველოს ბიზნეს ასოციაციის აღმასრულებელმა დირექტორმა ლევან ვეფხვაძემ განაცხადა, რომელმაც ლონდონში გამართულ საინვესტიციო ფორუმზე ისაუბრა, სადაც ქართულ კომპანიებს და ბიზნესს ჰქონდათ შესაძლებლობა საკუთარი პროექტები და გეგმები წარედგინათ.

ლევან ვეფხვაძის თქმით, ბრიტანეთისთვის საქართველო საინტერესოა.

„რისკების კუთხით არ უნდა იყოს იმაზე მნიშვნელოვნად მაღალი, ვიდრე დაბალი რისკების მქონე ქვეყნებში. ამ კუთხით ბრიტანეთისთვის საქართველო საინტერესოა, რადგანაც უკუგების ნაწილში ინვესტორებისთვის მაღალია და მარეგულირებელი გარემო არის, რეგიონში საუკეთესო. ამიტომ ამ კუთხით მათთან კომუნიკაცია და მათი დაინტერესება მნიშვნელოვანია. კონკრეტულ პროექტებზე ამ ეტაპზე საუბარი რთულია, მაგრამ ამ ყველაფერს გარკვეული პერიოდის შემდეგ ვიხილავთ, როდესაც უკვე კონკრეტულად გარდაისახება ეს კომუნიკაცია, რაღაცა ერთობლივ ბიზნეს ოპერაციებსა და საქმიანობებში. არ უნდა დაგვავიწყდეს, რომ ის შენობა სადაც ჩვენ ვიმყოფებოდით, საფონდო ბირჟა, იქ სამი კომპანია უკვე წარმოდგენილია. იცით, რომ ჩვენი 2 მსხვილი ბანკი ლონდონის საფონდო ბირჟაზე უკვე ივაჭრება და მათი წარმატების მაგალითი არის ძალიან მნიშვნელოვანი ბრიტანელი ინვესტორებისთვის. იმიტომ, რომ მათი კაპიტალიზაცია 5-ჯერ, 6-ჯერ-7-ჯერ გაიზარდა, მას შემდეგ რაც ისინი საფონდო ბირჟაზე გავიდნენ. ეს არის იმის ინდიკატორი, რომ ინვესტორებს აქვთ ნდობა საქართველოში ბიზნეს ოპერაციების მიმართ. ეს, რომ არ იყოს სხვანაირად ისინი აქციებს არ იყიდდნენ. და აქციებს თუ არ იყიდის ინვესტორი ბუნებრივია კომპანიის კაპიტალიზაცია ამ მასშტაბებს აქამდე ვერ მიღწევდა“, - აღნიშნა ლევან ვეფხვაძემ.