ჩვენი ერთ-ერთი უმნიშვნელოვანესი მთავარი პრიორიტეტი კვლავ იქნება ტურიზმის განვითარება, რომელსაც დიდი როლი აქვს ჩვენი ქვეყნის განვითარებაში, - აღნიშნა ეკონომიკური ფორუმის 22-ე დისკუსიაზე სიტყვით გამოსვლისას ეკონომიკისა და მდგრადი განვითარების მინისტრმა მარიამ ქვრივიშვილმა.

მინისტრის განმარტებით, ტურიზმის მიმართულებით საქართველომ შეძლო ის, რაც ვერ შეძლო ბერმა განვითარებულმა ქვეყანამ. 

„გვაქვს ძალიან ამბიციური გეგმები და მე ძალიან ამაყი ვარ, რომ გასული რამდენიმე წლის განმავლობაში ჩვენმა ქვეყანამ შეძლო ის, რაც ვერ შეძლო ძალიან ბევრმა განვითარებულმა ქვეყანამ ამ სექტორების განვითარების კუთხით, იქნება ეს უშუალოდ სექტორის ინდუსტრიული განვითარება, ავიაციის მიმართულება, იქნება ახალი ავიაკომპანიების შემოყვანა. მათ შორის ჩვენთვის სასიხარულოა, რომ ძლიერდება ადგილობრივი ქართული ავიაკომპანიები, რასაც მივესალმებით და მაქსიმალურად ვიქნებით მოტივირებულები, რომ ხელი შევუწყოთ ჩვენი ავიაციის გაძლიერებას და ეს ყველაფერი პირდაპირ პროპორციულად აისახება საერთაშორისო ვიზიტორების დივერსიფიცირებულ ზრდაში. ეს არის ძალიან მნიშვნელოვანი, რადგანაც ჩვენი ქვეყნის მთავარი დეკლარირებული სტრატეგია არის ის, რომ ჩვენს ქვეყანაში მოვიზიდოთ კიდევ უფრო მეტი მსყიდველუნარიანი ტურისტი. მსყიდველუნარიანი ტურისტი ვიცით, რომელი ქვეყნებიდან ჩამოდის. ჩვენ რა თქმა უნდა გარკვეული პერიოდის განმავლობაში გვქონდა გამოწვევა, რაც იყო პირდაპირი რეისების არარსებობა არც თუ ისე ჭარბად. დღეს გულწრფელები შეიძლება ვიყოთ და სიამაყით შემიძლია ვთქვა, რომ ჩვენი ქვეყნის გამოწვევა დღეს ეს აღარ არის. ჩვენი სამომავლოდ უნდა ვიმუშაოთ იმაზე, რომ გავზარდოთ სიხშირეები, მაგრამ გამოწვევა, როგორც ასეთი არ გვაქვს პირდაპირი ფრენა რომელიმე ჩვენთვის სტრატეგიულად მნიშვნელოვან ქვეყანასთან. ცხადია თუ არ ჩავთვლით აშშ-ს, რომელიც გრძელვადიანი სამუშაო პროცესია და ვაგრძელებთ მუშაობას და დარწმუნებული ვარ, რომ არც თუ ისე შორეულ მომავალში ჩვენ ამას ერთად ვიზეიმებთ. მაგრამ ძირითადი ის მიმართულებები, რომელიც არ ითვლება შორი მანძილის მიმართულებებად უკვე დაფარულია. წლევანდელი წელი იყო წარმატებული, ვიხილეთ ავიაკომპანია British Airways, ვიხილეთ EasyJet-ი ჩვენი ქვეყნის საავიაციო ბაზარზე, ვხედავთ SWISS-ის შვილობილ ავიაკომპანიას, რომელმაც დაიწყო ჟენევიდან ფრენა. ასევე Air Serbia, რომელიც რამდენიმე დღის წინ შემოვიდა და ყველა ის მიმართულება, რომელიც უზრუნველყოფს ჩვენი ქვეყნის ეკონომიკის მდგრად და სტაბილურ განვითარებას, განსაკუთრებით ტურიზმის სექტორში რა თქმა უნდა კვლავ რჩება ჩვენს მთავარ პრიორიტეტად და ასევე ინვესტიციების მოზიდვა ჩვენს სექტორში“, - აღნიშნა მინისტრმა ეკონომიკურ ფორუმზე სიტყვით გამოსვლისას.