ეკონომიკური ზრდის პროგნოზის მნიშვნელოვანი ფაქტორი ქვეყანაში სტაბილური ფონია - აცხადებს საქართველოს პარლამენტის დარგობრივი ეკონომიკისა და ეკონომიკური პოლიტიკის კომიტეტის თავმჯდომარე. შოთა ბერეკაშვილი Business Insider Georgia-სთან განმარტავს, რომ ქვეყნის ეკონომიკის სტრუქტურა ჯანსაღია და თითოეული სექტორების მიმართულებით ზრდის დიდი პოტენციალი არსებობს.

„როგორც მოგეხსენებათ სსფ-ს პროგნოზით, 2025 წელს საქართველოს ეკონომიკური ზრდა 7,3%-ი იქნება. ეს მნიშვნელოვანი გაუმჯობესებაა 6%-დან და მინდა აღვნიშნო, რომ ამის მნიშვნელოვანი ფაქტორი არის ქვეყანაში სტაბილური ფონი. ეს არის სტაბილურობის და სიმშვიდის გამოძახილი, რომ ეკონომიკური ზრდის პროგნოზი 6%-დან 7,3%-მდე გაიზარდა. მეორეს მხრივ, რეგიონი არის საინტერესო ინვესტიციებისთვის. არსებობს ეკონომიკური სექტორები, რომელსაც დიდი განვითარების შესაძლებლობები აქვს. აქ გამოვყოფდი, რომ საქართველოს აქვს პოტენციალი, რომ გახდეს პოტენციური ჰაბი. როგორც იცით რამდენიმე დღის უკან გაიხსნა თბილისის მშრალი პორტი, სადაც ძალიან ცნობილი და საინტერესოდ აღიარებული ოპერატორი შემოვიდა აბუ დაბის პორტების ჯგუფის სახით. ასევე მნიშვნელოვანი შესაძლებლობაა ენერგეტიკის განვითარების მიმართულებით. ამ სექტორში განვითარების დიდი შესაძლებლობები არსებობს. აღვნიშნავდი ასევე ტურიზმს, უძრავ ქონებას და დეველოპმენტს, ასევე IT ტექნოლოგიებს, საერთო ჯამში უნდა აღვნიშნო, რომ ჩვენი ეკონომიკის სტრუქტურა ძალიან ჯანსაღია და თითოეული სექტორების მიმართულებით ზრდის დიდი პოტენციალი არსებობს, რაც გახდება იმის საფუძველი, რომ შემდეგი 4 წლის განმავლობაში ქვეყანა გააგრძელებს დინამიკურ ეკონომიკურ ზრდას და ის საარჩევნო დანაპირები, რომელიც არის, რომ ორნიშნა ციფრთან ახლოს შევინარჩუნოთ ეკონომიკის ზრდა და 2028 წელს ეკონომიკა ერთ სულ მოსახლეზე გავხადოთ 13500 დოლარი ეს არის შესაძლებელი მიზანი. ამისთვის ვიბრძვით და ამისკენ არის მიმართული ჩვენი ეკონომიკური საინვესტიციო პოლიტიკა“, - აცხადებს შოთა ბერეკაშვილი.