ჩინეთი არის გამორჩეულად საინტერესო მიმართულება და მე შემიძლია თამამად ვთქვა, რომ ჩვენი ქვეყნისთვის ჩინეთი მიმდინარე წელს არის მთავარი პრიორიტეტული ახალი სამიზნე ქვეყანა ტურიზმის კუთხით, ავიაციის კუთხით, - ამბობს ეკონომიკისა და მდგრადი განვითარების მინისტრი მარიამ ქვრივიშვილი, რომელიც დღეს  „იმედის დილაში“ რუბრიკა Business Insider Georgia-ში სტუმარი იყო.

მინისტრის განმარტებით,  ჩინეთსა და საქართველოს შორის სტრატეგიული თანამშრომლობის ხელშეკრულების გაფორმებამ ხელშესახები შედეგები უკვე მოიტანა. 

„პირველ რიგში უნდა აღინიშნოს, რომ სტრატეგიული თანამშრომლობის ხელშეკრულების გაფორმება ამ ორ ქვეყანას შორის ძალიან დიდი სტიმული მისცა და პრაქტიკულად ხელშესახები შედეგები მოგვცა ჩვენ ქვეყნის ეკონომიკაში. პირველ რიგში ეს იყო უმნიშვნელოვანესი გადაწყვეტილების - უვიზო მიმოსვლის ამოქმედების ორივე ქვეყნის მხრიდან. რა თქმა უნდა ჩვენ დავინახეთ, რომ ამ გადაწყვეტილების მიღებისთანავე ძალიან მალე შევძელით და უზრუნველვყავით მეორე ავიაკომპანიის Air China-ს შემოყვანა. რა თქმა უნდა ეს არის მიმდინარე პროცესი.

გულწრფელი ვიქნები და გეტყვით, რომ ჩვენს ქვეყანას ნამდვილად სჭირდება ცნობადობის ამაღლება ჩინეთში, რადგან წინა პერიოდების განმავლობაში კეთდებოდა გარკვეული სამუშაოები, თუმცა არა ამ მასშტაბურობით. ჩვენ მიმდინარე წელს ყველაზე მოცულობითი მიმართულებით ვახდენთ ქვეყნის პოპულარიზაციას ჩინეთში, ჩვენ ძალიან აქტიურად ვგეგმავთ კერძო სექტორთან ერთად მივიღოთ მონაწილეობა მნიშვნელოვან ღონისძიებებში. თავად დავაორგანიზოთ იმისთვის, რომ ჩინურ ბიზნესსა და ქართულ ბიზნესს შორის გავაჩინოთ მჭიდრო კავშირები, იმისთვის, რომ კერძო სექტორმა ჩვენთან ერთად უზრუნველყოს, მოიზიდოს მეტი ჩინელი ტურისტი. რატო ჩინელი ტურისტი? რამდენადაც საერთაშორისო ტურიზმის სექტორში ეს არის გამორჩეულად მარდი ქვეყანა ტურიზმის მიმართულებით, ჩინელი ტურისტები გამოირჩევიან დარჩენის ხანგრძლივობით ქვეყანაში, ისევე როგორც მსყიდველუნარიანობით. რა თქმა უნდა ეს მოემსახურება ჩვენი ქვეყნის დივერსიფიკაციის პოლიტიკას და სექტორის მდგრად განვითარებას“, - აღნიშნავს მინისტრი.