საქსტატი საერთაშორისო სტანდარტებს ეყრდნობა და აქტიურად თანამშრომლობს საერთაშორისო ორგანიზაციებთან. როგორც საქსტატის აღმასრულებელმა დირექტორმა გოგიტა თოდრაძემ აღნიშნა, უწყება ყოველწლიურად მონაწილეობს გაეროს სტატისტიკის კომისიის სესიებში, რაც გახლავთ უმაღლესი დონის სამთავრობოთაშორისი ფორმატი, რომელიც ოფიციალური სტატისტიკის წარმოებასთან არის დაკავშირებული.

„გასული კვირის განმავლობაში იმართებოდა, ეს წლიური შეხვედრა გახლავთ გაეროს სტატისტიკის კომისიის შეხვედრა, რომელშიც მონაწილეობს 200-მდე ქვეყნის სტატისტიკის სამსახურის ხელმძღვანელი პირი. ეს გახლავთ უმაღლესი დონის სამთავრობოთაშორისი ფორმატი, რომელიც ოფიციალური სტატისტიკის წარმოებასთან არის დაკავშირებული და აღნიშნულ სესიაზე ზოგადად განიხილება ოფიციალური სტატისტიკის სფეროში მნიშვნელოვანი საკითხები და მტკიცდება ის საერთაშორისო სტანდარტები, რომელსაც იყენებს შემდეგ სხვადასხვა მიკრო თუ მაკროეკონომიკური მაჩვენებლის გაანგარიშებისას მთელი მსოფლიო. რაც შეეხება ჩვენს თანამშრომლობას საერთაშორისო ორგანიზაციებთან, კვლავ გრძელდება და ყოველწლიურად ახალი და ახალი თემატური მიმართულებები ემატება ამ ყველაფერს.

ჩვენ ვთანამშრომლობთ არა მხოლოდ საერთაშორისო ორგანიზაციებთან, არამედ განვითარებული ქვეყნების სტატისტიკის სამსახურებთან და ამას ვამყარებთ ხშირ შემთხვევაში გაფორმებული მემორანდუმებითაც.

ბოლო პერიოდის განმავლობაში გავაფორმეთ მემორანდუმი ბულგარეთთან, რამდენიმე კვირის განმავლობაში გაეროს სტატისტიკის კომისიის ფარგლებში უნგრეთთან, ასევე ვგეგმავთ გავაფორმოთ სერბეთთან. ეს არის მნიშვნელოვანი იმისთვის, რომ ჩვენს მიერ გამოყენებული მეთოდოლოგია კიდევ უფრო მეტად იყოს შესაბამისი საერთაშორისო სტანდარტებთან და საერთაშორისოდ აღიარებულ საუკეთესო პრაქტიკასთან“, - განაცხადა გოგიტა თოდრაძემ.