ბათუმის საერთაშორისო აეროპორტში პრაქტიკული სწავლება ჩატარდა

ეკონომიკა

ბათუმის საერთაშორისო აეროპორტში პრაქტიკული სწავლება ჩატარდა

12.12.2025.15:58

ბათუმი 2025“ - ასე ერქვა პრაქტიკულ სწავლებას, რომელიც 5 დეკემბერს ბათუმის საერთაშორისო აეროპორტში ჩატარდა. სწავლების მიზანი საგანგებო სიტუაციების დროს რეაგირების უნარების გაუმჯობესება და იმის შემოწმება იყო, თუ რამდენად მზად არის აეროპორტი სხვადასხვა მსგავს შემთხვევებში სწრაფი და კოორდინირებული რეაგირებისთვის.

სწავლება მოდელირებული სცენარის ორ ეტაპს მოიცავდა. პირველი ფაზის ფარგლებში მონაწილეებმა მოდელირებული სცენარის მიხედვით, რეალური ფრენისას წარმოშობილი საგანგებო მდგომარეობის მართვის პაქტიკული უნარები დახვეწეს. ეს ნაწილი ფოკუსირებული იყო საჰაერო ხომალდთან დაკავშირებული კრიზისის დროს სწრაფ და სწორ რეაგირებაზე. მეორე ნაწილი კი ტერმინალის გაფრენის დარბაზში ჩატარდა და სტიქიური უბედურებისა და ხანძრის სცენარს შეეხებოდა.

სწავლებაში ბათუმის აეროპორტის საავარიო-სამაშველო ჯგუფები და შესაბამისი სამსახურები, „საქაერონავიგაცია“, IMC კლინიკის სამედიცინო ჯგუფი და დაცვის პოლიციის დეპარტამენტის საავიაციო უშიშროების ბათუმის განყოფილების თანამშრომლები მონაწილეობდნენ. სხვადასხვა სტრუქტურის ჩართულობამ სწავლების პროცესი ბევრად ნაყოფიერი გახადა და კოორდინირებული ქმედებების უნარების გაუმჯობესებაც უზრუნველჰყო.

თბილისისა და ბათუმის საერთაშორისო აეროპორტებში, რომლებსაც ტავ ჯორჯია მართავს, ამ ტიპის სწავლება რეგულარულად ტარდება. წვრთნების მიზანი საგანგებო შემთხვევებზე რეაგირების ეფექტურობის ამაღლებაა.