აქტიურად ვიმუშავეთ კონტრაქტორ კომპანიებთან და ანაკლიის ღრმაწყლოვანი პორტის სამშენებლო სამუშაოების ჯამური ღირებულება $52 მილიონით შემცირდა - მარიამ ქვრივიშვილი
„ანაკლიის ღრმაწყლოვანი პორტი მნიშვნელოვანია არა მხოლოდ ჩვენი ქვეყნისთვის, არამედ ყველა პარტნიორი ქვეყნისთვის, რომლებიც აქტიურად არიან ჩართულები შუა დერეფნის მიმართულებით" - ამის შესახებ განცხადება საქართველოს ეკონომიკისა და მდგრადი განვითარების მინისტრმა გააკეთა.
მარიამ ქვრივიშვილის განცხადებით, ანაკლიის ღრმაწყლოვანი პორტის პროექტის ოპტიმიზაციის შედეგად 52 მილიონი დოლარის დაზოგვა გახდა შესაძლებელი, ხოლო უახლოეს დღეებში პორტის ტერიტორიაზე აქტიური სამშენებლო სამუშაოები დაიწყება.
„ანაკლიის ღრმაწყლოვანი პორტის მშენებლობას ჩვენი ქვეყნისთვის სტრატეგიული მნიშვნელობა აქვს, განსაკუთრებით კი შუა დერეფნის კონტექსტში. გასული თვეების განმავლობაში ჩვენ დეტალურად შევისწავლეთ არსებული გენგეგმა და აქტიურად ვიმუშავეთ კონტრაქტორ კომპანიებთან, რის შედეგადაც სამშენებლო სამუშაოების ჯამური ღირებულება 52 მილიონი დოლარით შემცირდა. დავასრულეთ სამშენებლო-სამობილიზაციო სამუშაოები და უახლოეს რამდენიმე დღის განმავლობაში უშუალოდ ანაკლიის ტერიტორიაზე დაიწყება აქტიური სამშენებლო სამუშაოები", - აცხადებს მარიამ ქვრივიშვილი.
მინისტრის თქმით, ანაკლიის ღრმაწყლოვანი პორტის ამუშავება ქვეყანას საშუალებას მისცემს, გაზარდოს ტვირთების მიმოცვლა როგორც ქვეყანაში, ისე საზღვრებს გარეთ.
„ანაკლიის ღრმაწყლოვანი პორტის ამუშავებით განვაგრძობთ ვიყოთ მნიშვნელოვანი პარტნიორი შუა დერეფნის კონტექსტში, რაც საშუალებას მისცემს საქართველოს, მიიღოს კიდევ უფრო მეტი ტვირთი და ხელი შეუწყოს ტვირთნაკადების გადაადგილებას ევროპისა და სხვა მიმართულებებით", - აღნიშნა მარიამ ქვრივიშვილმა.
დღის ტოპ 10 სიახლე
სხვა სიახლეები
დამოუკიდებელი საქართველოს ისტორიაში პირველად შევისყიდით ახალ ლოკომოტივებს - ეს გადაწყვეტილება სრულად გარდაქმნის საქართველოს რკინიგზას, მნიშვნელოვნად გაზრდის სისწრაფეს, საიმედოობას და ქვეყნის ტრანზიტულ შესაძლებლობებს l თამარ იოსელიანი
08.04.2026.16:31
საქართველოს მთავრობის გადაწყვეტილებით, რკინიგზის სექტორის განვითარება ერთ-ერთ პრიორიტეტულ მიმართულებად განისაზღვრა, რადგან ჩვენ მას ვუყურებთ როგორც ქვეყნის სატრანსპორტო და ლოგისტიკური სისტემის საკვანძო ელემენტს. სწორედ ამ ხედვიდან გამომდინარე, საქართველოს რკინიგზამ 2026–2028 წლების განვითარების ამბიციური გეგმა შეიმუშავა, - განაცხადა ეკონომიკისა და მდგრადი განვითარების მინისტრის მოადგილე თამარ იოსელიანმა.
როგორც მინისტრის მოადგილემ აღნიშნა, რკინიგზის განვითარების გეგმის ფარგლებში, პირველად დამოუკიდებელი საქართველოს ისტორიაში ახალი ლოკომოტივების შესყიდვა მოხდება - 50-მდე ახალი ლოკომოტივის შესაძენად მთავრობა დაახლოებით 1 მლრდ ლარის დახარჯვას გეგმავს.
„შედეგად, გაიზრდება სისწრაფე, საიმედოობა და ქვეყნის ტრანზიტული შესაძლებლობები. ამასთან, შევისყიდით 1,500 ახალ ვაგონს და თანამედროვე სარკინიგზო სისტემებს დავნერგავთ, რაც მნიშვნელოვნად გააუმჯობესებს საოპერაციო პროცესებს და პრაქტიკულად, გააორმაგებს რკინიგზის გამტარუნარიანობას“, - აღნიშნა მინისტრის მოადგილემ.
ამასთან, თამარ იოსელიანის განცხადებით, 2026 წელს განსაკუთრებული ყურადღება დაეთმობა სამგზავრო მიმართულებასაც, რაც საერთო ჯამში, საქართველოს რკინიგზას თანამედროვე, ეფექტიან და ახალი შესაძლებლობებით აღჭურვილ სისტემად აქცევს.
„მოდერნიზებული, თანამედროვე რკინიგზა კიდევ უფრო გააძლიერებს საქართველოს, როგორც რეგიონული სატრანსპორტო ჰაბის პოზიციას და მნიშვნელოვნად გაზრდის ჩვენს კონკურენტუნარიანობას“, - განაცხადა თამარ იოსელიანმა.
