სახელმწიფო განაგრძობს იყოს კარგი პარტნიორი სამშენებლო სექტორისთვის, რადგან ჩვენ გვაქვს არაერთი უმსხვილესი და უმნიშვნელოვანესი ინფრასტრუქტურული პროექტი, - განაცხადა საქართველოს ეკონომიკისა და მდგრადი განვითარების მინისტრმა მარიამ ქვრივიშვილმა.

2025 წლის შეჯამებისას, ქვრივიშვილმა აღნიშნა, რომ საქართველოს აქვს რეკორდული მაჩვენებლები მნიშვნელოვან სექტორებში, მათ შორის ექსპორტსა და ტურიზმში.

“აღნიშნულ ინვესტიციას [6,6 მლრდ აშშ დოლარი] ეკონომიკაზე ექნება უდიდესი დადებითი გავლენა. მეორე მხრივ, ჩვენ უკვე ვხედავთ, რომ ამ გადაწყვეტილებამ ძალიან დადებითი ეფექტი მოიტანა ჩვენი ქვეყნის პოზიციონირებასა და პოპულარიზაციაზე, რამაც ასევე უკვე განაპირობა, რომ ჩვენი ქვეყნისადმი უცხოელი ინვესტორების მხრიდან გაზრდილია ინტერესი. რაც შეეხება იმ სარგებელს, რასაც ჩვენ ასეთი მსხვილი ინვესტიციიდან თითოეული ჩვენი ქვეყნის მოქალაქისთვის ველოდებით, პირველ რიგში უნდა ითქვას, რომ უდიდესი ღირებულება ახალი სამუშაო ადგილების შექმნის კუთხით, მშენებლობის პერიოდში შეიქმნება 24 000 ახალი სამუშაო ადგილი გონიოსა და დედაქალაქში. მას შემდეგ, რაც პროექტი ოპერირებაში გაეშვება მუდმივად იქნება შექმნილი ახალი 8 000-ზე მეტი სამუშაო ადგილი”, - განაცხადა მარიამ ქვრივიშვილმა.

ეკონომიკის მინისტრის თქმით, საქართველოს ხელისუფლებამ დიდი რესურსი ჩადო რკინიგზის მოდერნიზაციაში. 

“ეს ნიშნავს იმას, რომ საქართველოს რკინიგზამ უნდა შეძლოს და გააორმაგოს ის გამტარუნარიანობა, რომელიც ამ ეტაპისთვის აქვს ტვირთბრუნვის მიმართულებით და ამავდროულად შეძლოს და შეამციროს ტვირთების გადაზიდვის დრო, რაც უზრუნველყოფს იმას, რომ ჩვენი ქვეყნის პოზიციონირება კიდევ უფრო გაიზრდება, უზრუნველყოფს იმას, რომ ჩვენი ქვეყანა გახდება კიდევ უფრო კონკურენტუნარიანი და ანაკლიის პორტისა და საქართველოს რკინიგზის არსებობით შეგვიძლია ღირსეული წვლილი კვლავ შევიტანოთ და გავზარდოთ საქართველოს როლი შუა დერეფანში”, - განაცხადა ეკონომიკის მინისტრმა.