აქტიურად ვმუშაობთ, რომ შიდა ფრენების კუთხით ახალი მიმართულებები დავამატოთ, სიხშირეები გავზარდოთ, უფრო მეტი სერვისი და კომფორტი შევთავაზოთ მგზავრებს, - ამის შესახებ რადიო „სივრცის“ ეთერში გადაცემა Business Insider Georgia-ში სტუმრობისას საქართველოს აეროპორტების გაერთიანების ხელმძღვანელმა ლევან მოსეშვილმა განაცხადა.

მოსეშვილის განმარტებით, შიდა ფრენებზე მოთხოვნა ყოველწლიურად იზრდება. საქართველოს აეროპორტების გაერთიანების ხელმძღვანელი ფიქრობს, რომ სამომავლოდ შესაძლოა შიდა ფრენები ისე განვითარდეს, რომ სუბსიდია საჭირო აღარც კი გახდეს.

„წლებია საქართველოში შიდა ფრენები ხორციელდება და მოთხოვნაც ყოველწლიურად მზარდია. დღესდღეობით ჩვენს ფრენებს ვასრულებთ სახელმწიფოს დახმარებით და სუბსიდიით. საკმაოდ ძვირი სიამოვნებაა და მგზავრს, რომ არ დააწვეს ბილეთის თვითღირებულება სახელმწიფო გვეხმარება, რომ პირველ ეტაპზე განვავითაროთ. როდესაც გაძლიერდება და ფეხს მოიკიდებს შიდა ფრენები თავის თავს შეინახავს. ჩვენ აქტიურად ვმუშაობთ იმაზე, რომ ზაფხულში გავაორმაგოთ სიხშირეები მესტიის მიმართულებით.მესტია ძალიან აქტუალურია. მახსოვს მესტიის აეროპორტის პირველი დღეები, როდესაც მესტიის აეროპორტის განვითარება დავიწყეთ ცოტა სკეპტიკურად იყო განწყობილი მოსახლეობა. დღეს რადიკალურად სხვა სურათი გაქვს. მესტიაში აბსოლუტურად სხვა სეგმენტის ტურისტი გვაქვს. ძალიან მოთხოვნადია. ვმუშაობთ იმაზე, რომ ახალი მიმართულებები დავამატოთ. ვმუშაობთ იმაზე, რომ ტურისტებს შევთავაზოთ უფრო მოქნილობა. ტურისტისთვისაც მომხიბვლელია საჰაერო გადასვლა, საჰაერო მიმოსვლა, რაც თავისთავად დროს ზოგავს. წარმოიდგინეთ თბილისიდან მესტიაში საშუალოდ 8 საათი გვჭირდება ავტოტრანსპორტით, რომ წავიდეთ. მაგრამ როდესაც ფრენა შესრულდება მგზავრობას 1-1,15 საათი სჭირდება. დროის დაზოგვა ძალიან მნიშვნელოვანია.

ბათუმის მიმართულებითაც. კი ავტობანი მნიშვნელოვანია, მაგრამ როდესაც საათზე ნაკლებ დროში იქ აღმოჩნდები ეს უკვე ძალიან დიდი კომფორტია“, - აღნიშნა ლევან მოსეშვილმა.

საქართველოს აეროპორტების გაერთიანების ხელმძღვანელის თქმით, შიდა რეისებით საქართველოს მოქალაქეების გარდა აქტიურად სარგებლობენ უცხოელი ტურისტებიც. მათი პროცენტული გადანაწილება კი ამ შემთხვევაში 50/50-ზეა.

„გვაქვს იმის მოლოდინები და ჩვენს გუნდთან ერთად აქტიურად ვმუშაობთ, რომ ახალი მიმართულებები დავამატოთ, სიხშირეები გავზარდოთ, უფრო მეტი სერვისი და კომფორტი შევთავაზოთ მგზავრებს და უფრო ცნობადი გავხადოთ შიდა ფრენები მოსახლეობაში. ამ დროისათვის შიდა ფრენები ნატახტრის აეროდრომიდან სრულდება. თუმცა გვინდა, რომ თბილისის საერთაშორისო აეროპორტში გადმოვიტანოთ, იქიდან გამომდინარე, რომ ჩამოსული მგზავრისთვის უფრო მოსახერხებელია, რომ პირდაპირი კავშირი ჰქონდეს. და თბილისის აეროპორტიდან ნატახტარში წასვლა ავარიდოთ და პირდაპირ დედაქალაქის აეროპორტიდან მოხდეს დაკავშირება სხვადასხვა ქალაქებთან. ამ საკითხზე აქტიურად ვმუშაობთ და მომავალში მივიღებთ ალბათ ახალ სურათს“, - აცხადებს საქართველოს აეროპორტების გაერთიანების ხელმძღვანელი.