„საქართველოს მთავრობის დეკლარირებული ხედვა არის, რომ გრძელდება ასოცირების ხელშეკრულებით ნაკისრი ვალდებულებების შესრულება“, - აღნიშნულის შესახებ „იმედის დილაში“ რუბრიკა Business Insider Georgia-ში სტუმრობისას შრომის ინსპექციის ხელმძღვანელმა ბექა ფერაძემ განაცხადა. აღნიშნული ფარგლებში კი ერთ-ერთი ახალი რეგლამენტი მთავრობის მხრიდან რამდენიმე დღის უკან დამტკიცდა.

„ტექნიკური რეგლამენტი მთავრობამ უკვე მიიღო, რომელიც სამუშაო სივრცეში მანქანა-დანადგარების უსაფრთხოებას და გარკვეულ სტანდარტებს გულისხმობს. თუ როგორ უნდა მოხდეს მისი უსაფრთხო ექსპლუატაცია და მინიმუმამდე იყოს დაყვანილი ის საფრთხეები და რისკები, რომელიც სამუშაო სივრცეში არსებობს. გუშინ იქნა მიღებული აღნიშნული ტექნიკური რეგლამენტი და ჩვენ უკვე მომდევნო კვირიდან გვექნება აქტიური კამპანია, ცნობიერების ამაღლებს კამპანია იმისთვის, რომ მივაწოდოთ დაინტერესებულ პირებს აღნიშნული რეგლამენტის შესახებ მოთხოვნები. თუმცა აღსანიშნავია, რომ ვიდრე მივიღებდით ჩვენ არაერთი შეხვედრა გვქონდა ბიზნეს ასოციაციასთან, სხვადასხვა ბიზნესის წარმომადგენლებთან, პროფკავშირთან და ზოგადად სამმხრივ ფორმატში გვქონდა რეგლამენტის განხილვა და ყველა ის შენიშვნა, რომელიც ბიზნესის მხრიდან იქნა გამოთქმული გავიზიარეთ, ისევე როგორც დასაქმებულთა მხრიდან. უნდა ითქვას, რომ რეგლამენტი არის აბსოლუტურად კონსენსუსით მიღებული ერთის მხრივ და ის მეორეს მხრივ აკმაყოფილებს საერთაშორისო სტანდარტებს“, - აღნიშნა ბექა ფერაძემ.
მანვე Business Insider Georgia-ში სტუმრობისას მიმდინარე სტატისტიკური მაჩვენებლებიც მიმოიხილა და თქვა, რომ გასულ წელს შრომის ინსპექციის მხრიდან 5 ათასზე მეტი ინსპექტირება განხორციელდა.

„გასულ წელს 5 ათასზე მეტი ინსპექტირება განხორციელდა ჯამურად შრომის ინსპექციის მხრიდან, არამხოლოდ უსაფრთხოების, არამედ როგორც მოგეხსენებათ ჩვენ რამდენიმე მსხვილი მანდატი გვაქვს, როგორც შრომის უფლებების მიმართულებით, ასე მიგრაციის და ასე შემდგომ. უშუალოდ შრომის უსაფრთხოების კუთხით 3200-ზე მეტი ინსპექტირება განხორციელდა და შეეხო ეკონომიკური საქმიანობის ყველა სექტორს. სტატისტიკურ მონაცემები ყველაზე მეტად ცხადყოფს შედეგებს, ამიტომ აღსანიშნავია, რომ მას შემდეგ რაც შრომის უსაფრთხოების შესახებ ორგანული კანონი ამოქმედდა, 44%-ით არის შემცირებული ფატალური, უბედური შემთხვევების მაჩვენებელი სამუშაო ადგილზე. და უშუალოდ გასულ წელთან შედარებით უნდა ითქვას, რომ სხვადასხვა სიმძიმის უბედური შემთხვევები შემცირებულია საშუალოდ 24%-ით.

ჩვენ თუ შევედრებით ევროკავშირის წევრ ქვეყნებს, ამ დონეზეც კი კარგი სტატისტიკა გაქვს. თუმცა უნდა გვახსოვდეს, რომ ამ ქვეყნებში არის ასწლეულზე მეტი ინსპექტირების პრაქტიკა და ზოგადად კულტურის ნაწილია და ჩვენ სულ რამდენიმე წელია დავიწყეთ სრული ინსპექტირების პროცესი და სრულყოფამდე კიდე რაღაც ნაბიჯებია გადასადგმელი. მისაღები გაქვს დაახლოებით 18 დირექტივა, რომელიც სხვადასხვა სექტორული მიმართულებით საბოლოოდ ჩამოაყალიბებს უსაფრთხოების სტანდარტებს“, - აღნიშნა ბექა ფერაძემ.