2025 წელს რეკორდული მაჩვენებლები გვაქვს, - ამის შესახებ გადაცემა „იმედის დილაში“, რუბრიკა Business Insider Georgia-ში სტუმრობისას საქართველოს ეკონომიკისა და მდგრადი განვითარების მინისტრის მოადგილემ თამარ იოსელიანმა განაცხადა, რომელმაც 2025 წლის მგზავრთნაკადის და ტურიზმის სტატისტიკა შეაფასა და იმავდროულად TAV Geirgia-სთან გაფორმებულ ახალ ხელშეკრულებაზეც ისაუბრა, რაც საბოლოო ჯამში თბილისის საერთაშორისო აეროპორტში ინფრასტრუქტურის გაფართოებას უკავშირდება. 

„მნიშვნელოვანი დღე გვქონდა წინა კვირაში საქართველოს ავიაციის სექტორისათვის. თქვენ იცით, რომ თანმიმდევრულად ვითარდება საქართველოს ავიაციის სექტორი, შესაბამისად რეკორდული მაჩვენებლები გვაქვს ზოგადად 2025 წელს. ძალიან მნიშვნელოვანი დღე იყო, რადგანაც ჩვენ ხელი მოვაწერეთ გაუმჯობესებულ პირობებს TAV-თან - TAV Geirgia შედის ფრანგული ჰოლდინგის ქვეშ, ფრანგული სახელმწიფო ჰოლდინგის ქვეშ, ADP ჯგუფის ქვეშ, რომელსაც, რა თქმა უნდა, ასევე თურქული კომპანია TAV Airports ფლობს.

აქედან გამომდინარე, TAV Airports საქართველოში წარმოდგენილია 2006 წლიდან. მათ უკვე საქართველოში განხორციელებული აქვთ დაახლოებით 260 მილიონის ინვესტიცია და შესაბამისად დამატებით 150 მილიონის ინვესტიციას განახორციელებენ მომდევნო ხუთი წლის განმავლობაში და ჩვენ ძალიან მასშტაბური და მნიშვნელოვანი განვითარებები გველის თბილისის საერთაშორისო აეროპორტში რომელიც ქვეყნისთვის, რა თქმა უნდა, ასე ვთქვათ, პირველ შთაბეჭდილებას ქმნის ტურისტისთვის, ქვეყანაში ვიზიტორისთვის და აქედან გამომდინარე ჩვენ მზად ვართ, რომ TAV-თან ერთად გავაუმჯობესოთ ქვეყნის მთავარი საავიაციო ინფრასტრუქტურა და შესაბამისად 50%-ით გაიზრდება თვითონ ტერმინალის ტერიტორია, გარე ტერიტორიებიც, რა თქმა უნდა, განვითარდება - რაც შეეხება საპარკინგე სივრცეს, ასაფრენ-დასაფრენ ზოლს და ასე შემდეგ.

რა თქმა უნდა, განვითარდება ის სერვისები, რაც ძალიან მნიშვნელოვანია იმისათვის, რომ ჩვენ 5 მილიონიდან 10 მილიონ მგზავრამდე გავზარდოთ გამტარუნარიანობა. თქვენ იცით, რომ ჩვენ 2025 წელს უკვე მოვემსახურეთ დაახლოებით ქვეყნის სამივე აეროპორტში 8 მილიონ 500 ათასზე მეტ მგზავრს. შესაბამისად ტურისტული ვიზიტორების კუთხითაც გვაქვს რეკორდული მაჩვენებელი - 5 მილიონ 500 ათას ტურისტს ვუმასპინძლეთ.

რა თქმა უნდა, მათ შორის დიდი ბრიტანეთიდან და ევროკავშირის წევრი ქვეყნებიდან რეკორდული მაჩვენებლების ვიზიტორები გვყავს 2025 წელს და რაც მთავარია ყველა მიმართულებით, ეს იქნება ავიარეისების შესრულების, პირდაპირი ფრენების მიმართულებით, ჩვენ რა თქმა უნდა რეკორდული მაჩვენებლები გვაქვს. დამატებით უნდა აღინიშნოს, რომ 125 პირდაპირი მიმართულება გვაქვს, 77 ავიაკომპანია ასრულებს აღნიშნულ ფრენებს და ესეც ძალიან მნიშვნელოვანი ციფრებია. ჩვენ TAV-თან ერთად შევძელით, რომ ქვეყნის საავიაციო სექტორი მიგვეყვანა იმ ნიშნულამდე, რა ნიშნულამდეც დღეს არის

ეს არის ოცწლიანი ძალიან მნიშვნელოვანი თანამშრომლობა. ეს არის ქართულ-თურქული, ასე ვთქვათ, სტრატეგიული პარტნიორობის შედეგი, რა თქმა უნდა ქართულ-ფრანგულიც. აქედან გამომდინარე, ისიც ძალიან მნიშვნელოვანია, რომ თურქული ინვესტიციები საქართველოში ძალიან მზარდია. 2025 წლის მაჩვენებლებით, სამი კვარტალის მაჩვენებლით, პირველ ადგილზეა თურქეთი პირდაპირი ინვესტიციების კუთხით. თუ 2024 წელს 110 მილიონი აშშ დოლარის ინვესტიციები განხორციელდა, სამი კვარტალის მაჩვენებლით 2025 წელს უკვე 150 მილიონის პირდაპირ ინვესტიციებზეა საუბარი. რა თქმა უნდა, ეს მაჩვენებლები არის ჩვენი ეკონომიკის ძალიან მნიშვნელოვანი საყრდენი“, - აღნიშნა თამარ იოსელიანმა.