როგორც სსიპ საქართველოს დაზღვევის სახელმწიფო ზედამხედველობის სამსახურის უფროსი დავით ონოფრიშვილი აცხადებს, საქართველოში დაზღვევის რამდენიმე მიმართულება თანდათანობით ზრდას განაგრძობს. მისი თქმით, ბოლო წლებში გაზრდილია აგროდაზღვევის მოცულობაც, რომელიც რამდენიმე წლის წინ 8-10 მილიონ ლარს შეადგენდა, დღეს კი დაახლოებით 22 მილიონ ლარამდეა გაზრდილი, თუმცა სექტორი კვლავ გამოწვევების წინაშე დგას და ძირითადად კახეთის რეგიონზეა კონცენტრირებული.

„აგროდაზღვევა მცირედით, მაგრამ მზარდია. რაღაც 22 მილიონამდე იყო პრემია, თუმცა სულ რამოდენიმე წლის წინ ეს იყო 8-10 მილიონი. იზრდება. თვითონ კომპანიები ბევრნი არ დარჩნენ ვინც აგროდაზღვევით არიან დაინტერესებული, რთული სფეროა ზოგადად. ეს ითხოვს შემდგომ როგორ ვთქვათ, როცა უცხოეთში ვთქვათ თურქეთში ან ესპანეთში „აგროსეგუროა“ ესეთი დიდი სადაზღვევო კომპანია, იქ ბევრი რამ არის სავალდებულო და მთელ ქვეყანას მოიცავს.  ანუ დაზღვევის პრინციპი ეს არის, რომ შენ ეხლა ერთეულებს ვერ დააზღვევ - რაც უფრო მეტია ამ პულში, ანუ ერთიანობაში შემოსული თანხა, ის გროვდება, ვისაც მერე სადაზღვევო პრობლემა უხდება, ზარალი იმას ადვილად უხდის. ჩვენთან ისე მოხდა, რომ მხოლოდ კახეთში ვენახებია დაზღვეული, თანაც ყველა არ აზღვევს. სადაც სეტყვა უფრო მოდის, იქ უფრო აზღვევენ, სადაც გამოიხედავს ფერმერი ვთქვათ იტყვის, რომ ჩემთან 10 წელია არ მოსულა და არ აზღვევს. ხანდახან მაინც ყველგან შეიძლება მოვიდეს. ასევე გამოირჩევა აჭარა. კახეთს 80%-ზე მეტი უჭირავს. და თუმცა უნდა ითქვას, რომ ზედიზედ გახსოვთ სერიოზული სეტყვები იყო, დიდი ზარალები იყო რამოდენიმე წლის წინ. ეხლა ბოლო ორი წელია დაახლოებით ზარალიანობა 33%-ის ფარგლებშია, ამიტომ შანსი იმისა, რომ გაიზარდოს შემდეგ წელს უფრო მეტია ეხლა ალბათობის თეორიით, ალბათ შეიძლება ესე განვსაზღვროთ. მაგრამ მეზობელი როცა ხედავს, რომ დაისეტყვა და იმას ჰქონდა დაზღვევა და გადაუხადეს, შემდეგ მეზობელი ფერმერი თვითონაც ფიქრობს, რომ დააზღვიოს. დიდი კომპანიები ისედაც აზღვევენ თავისთავად“, - განმარტავს დავით ონოფრიშვილი.