2021 – 2025 წლებში საქართველოს საშუალო ეკონომიკური ზრდა 9.3%-ს შეადგენდა, მაშინ, როცა ანალოგიურ პერიოდში ევროკავშირის კანდიდატი სხვა ქვეყნების საშუალო ეკონომიკური ზრდა დაახლოებით 3.5% იყო - ვახტანგ ცინცაძე
2026 წლის პირველ ორ თვეში საქართველოში საკმაოდ მაღალი ეკონომიკური აქტივობა დაფიქსირდა - საშუალო ეკონომიკურმა ზრდამ 8.4% შეადგინა. ამასთან ერთად, დაზუსტდა 2025 წლის ეკონომიკური ზრდის მაჩვენებლები და წინა წელს 7.5%-იანი რეალური ზრდა დაფიქსირდა, - განაცხადა ეკონომიკისა და მდგრადი განვითარების მინისტრის მოადგილე ვახტანგ ცინცაძემ.
ამასთან, მინისტრის მოადგილე ყურადღებას ამახვილებს იმაზე, რომ 2021 – 2025 წლებში საქართველოს საშუალო ეკონომიკური ზრდა 9.3%-ს შეადგენდა, მაშინ, როცა ანალოგიურ პერიოდში ევროკავშირის კანდიდატი სხვა ქვეყნების საშუალო ეკონომიკური ზრდა დაახლოებით 3.5% იყო.
„აქვე აღსანიშნავია, რომ 2021 – 2025 წლებში მოლდოვის საშუალო ეკონომიკური ზრდა 2.5% იყო, შესაბამისად, საქართველოს ეკონომიკური ზრდა მას თითქმის 4-ჯერ აღემატებოდა. რა თქმა უნდა, ამის შედეგია, რომ ფაქტობრივად, ერთ სულ მოსახლეზე მთლიანი შიდა პროდუქტი მსყიდველუნარიანობის პარიტეტის მიხედვით საქართველოს შემთხვევაში, მოლდოვის მაჩვენებელს დაახლოებით 60%-ით აჭარბებს“, - აღნიშნა ვახტანგ ცინცაძემ.
რაც შეეხება ეკონომიკური ზრდის პროგნოზს, ეკონომიკის მინისტრის მოადგილის შეფასებით, გლობალური გამოწვევების მიუხედავად, მაღალი ეკონომიკური ზრდის ტენდენცია მომდევნო წლებშიც გაგრძელდება.
„ჩვენი მოლოდინია, რომ საქართველო ეკონომიკური ზრდის თვალსაზრისით ლიდერი იქნება არამხოლოდ რეგიონის და ევროპის ქვეყნებს შორის, არამედ გლობალურადაც“, - განაცხადა ვახტანგ ცინცაძემ.
დღის ტოპ 10 სიახლე
სხვა სიახლეები
დამოუკიდებელი საქართველოს ისტორიაში პირველად შევისყიდით ახალ ლოკომოტივებს - ეს გადაწყვეტილება სრულად გარდაქმნის საქართველოს რკინიგზას, მნიშვნელოვნად გაზრდის სისწრაფეს, საიმედოობას და ქვეყნის ტრანზიტულ შესაძლებლობებს l თამარ იოსელიანი
08.04.2026.16:31
საქართველოს მთავრობის გადაწყვეტილებით, რკინიგზის სექტორის განვითარება ერთ-ერთ პრიორიტეტულ მიმართულებად განისაზღვრა, რადგან ჩვენ მას ვუყურებთ როგორც ქვეყნის სატრანსპორტო და ლოგისტიკური სისტემის საკვანძო ელემენტს. სწორედ ამ ხედვიდან გამომდინარე, საქართველოს რკინიგზამ 2026–2028 წლების განვითარების ამბიციური გეგმა შეიმუშავა, - განაცხადა ეკონომიკისა და მდგრადი განვითარების მინისტრის მოადგილე თამარ იოსელიანმა.
როგორც მინისტრის მოადგილემ აღნიშნა, რკინიგზის განვითარების გეგმის ფარგლებში, პირველად დამოუკიდებელი საქართველოს ისტორიაში ახალი ლოკომოტივების შესყიდვა მოხდება - 50-მდე ახალი ლოკომოტივის შესაძენად მთავრობა დაახლოებით 1 მლრდ ლარის დახარჯვას გეგმავს.
„შედეგად, გაიზრდება სისწრაფე, საიმედოობა და ქვეყნის ტრანზიტული შესაძლებლობები. ამასთან, შევისყიდით 1,500 ახალ ვაგონს და თანამედროვე სარკინიგზო სისტემებს დავნერგავთ, რაც მნიშვნელოვნად გააუმჯობესებს საოპერაციო პროცესებს და პრაქტიკულად, გააორმაგებს რკინიგზის გამტარუნარიანობას“, - აღნიშნა მინისტრის მოადგილემ.
ამასთან, თამარ იოსელიანის განცხადებით, 2026 წელს განსაკუთრებული ყურადღება დაეთმობა სამგზავრო მიმართულებასაც, რაც საერთო ჯამში, საქართველოს რკინიგზას თანამედროვე, ეფექტიან და ახალი შესაძლებლობებით აღჭურვილ სისტემად აქცევს.
„მოდერნიზებული, თანამედროვე რკინიგზა კიდევ უფრო გააძლიერებს საქართველოს, როგორც რეგიონული სატრანსპორტო ჰაბის პოზიციას და მნიშვნელოვნად გაზრდის ჩვენს კონკურენტუნარიანობას“, - განაცხადა თამარ იოსელიანმა.
