ძალიან ბევრმა კომპანიამ გამოთქვა მზადყოფნა, რომ საქართველოსთან კიდევ უფრო აქტიურად განაგრძონ თანამშრომლობა, - აღნიშნულის შესახებ Business Insider Georgia-ს ლონდონში, EBRD-ის შეხვედრაზე მყოფმა ფინანსთა მინისტრმა განუცხადა. ლაშა ხუციშვილის თქმით, საქართველოსადმი ინტერესი ძალიან დიდია.

„EBRD-ის წლიური შეხვედრების ფარგლებში შეხვედრები გაიმართა ბანკის ხელმძღვანელობასთან, მის ვიცე-პრეზიდენტთან, მენეჯმენტის სხვა წარმომადგენლებთან. ჩვენ განვიხილეთ ბანკის მიმდინარე საქმიანობა საქართველოში. ბანკი საკმაოდ ძლიერადაა წარმოდგენილი კერძო სექტორში, კერძო სექტორის დაფინანსების მიმართულებით. გასული წელი იყო ერთ-ერთი ყველაზე დიდი დაკრედიტების წელი ბანკისთვის და ზოგადად EBRD-ი საქართველოში ერთ სულ მოსახლეზე ქვეყნების მასშტაბით ერთ-ერთი ყველაზე დიდი დამფინანსებელია, სხვა ქვეყნებთან შედარებით რეგიონში. ამ მიმართულებით ბანკი განაგრძობს კერძო სექტორის დაკრედიტებას და ბანკის წვლილი ძალიან დიდია კერძო სექტორის განვითარებაში. ასევე, ჩვენ შეხვედრები გავმართეთ საინვესტიციო ბანკებთან, სადაც განხილული იყო ქვეყანაში არსებული ეკონომიკური მდგომარეობა, მაღალი ეკონომიკური ზრდა და ის მიზეზები, რამაც გამოიწვია აღნიშნული მაღალი ეკონომიკური ზრდა საქართველოში. ამ მიმართულებით საქართველო ნამდვილად გამორჩეულია მსოფლიოში. საქართველოში ფიქსირდება ერთ-ერთი ყველაზე მაღალი ეკონომიკური ზრდა იმ პირობებში, რომ სრულად არის შენარჩუნებული მაკროეკონომიკური სტაბილურობა, როგორც დეფიციტის დაბალი მაჩვენებელი, ასევე ვალის დაბალი მაჩვენებელი. რა თქმა უნდა ინფლაციის დაბალი მაჩვენებელი. შეხვედრები გაიმართა JPMorgan-ის, Bank of America-ს, Société Générale-ს და Citi-ს საინვესტიციო ბანკებთან და მათ კლიენტებთან. უნდა აღინიშნოს, რომ ძალიან დიდია დაინტერესება საქართველოს მიმართ, საქართველოს ეკონომიკის მიმართ და ამ მიმართულებით ძალიან ბევრმა კომპანიამ გამოთქვა მზადყოფნა და მზაობა, რომ საქართველოსთან კიდევ უფრო აქტიურად განაგრძონ თანამშრომლობა“, - განაცხადა ლაშა ხუციშვილმა.