პიროტექნიკასთან დაკავშირებული ხმაური ცხოველებში დიდ სტრესს იწვევს, ხოლო ფრინველები ვერ უმკლავდებიან ამ შიშს და კვდებიან. ცალკე საკითხია ეკოლოგიისთვის მიყენებული ზიანი, რაც საახალწლოდ პიროტექნიკის მასიურ გამოყენებას უკავშირდება.

,,ძია ნოდარის ძაღლების ქცევის ცენტრის"  ხელმძღვანელი ნოდარ მანჩხაშვილი ხელისუფლებას პიროტექნიკის აკრძალვისკენ მოუწოდებს და ურჩევს, რომ მისი გამოყენება მინიმუმამდე შემცირდეს.

,,აუცილებელია, ასი პროცენტით ვუჭერ მხარს, პიროტექნიკის გამოყენება აიკრძალოს ან მინიმუმამდე შემცირდეს. ფეირვერკების მასიური გამოყენების გამო ფრინველები იხოცებიან, ეშინიათ ცხოველებს  და განიცდიან სტრესს. არა მარტო მათ, ნეგატიურად მოქმედებს ადამიანებზეც. თუმცა  ვინაიდან ცხოველებსა და ფრინველებზე ვსაუბრობთ, ადვილად წარმოსადგენია,  თუ რა მძიმე განსაცდელში ვაგდებთ მათ პიროტექნიკის გამოყენების გამო,  ფრინველები ამ შიშს ვერ უძლებენ და იხოცებიან, საახალწლო დღეებში კორპუსების მიმდებარედ მკვდარი ჩიტები და მტრედები ბევრს და პირადად მეც მინახავს, რაც მძიმე სანახავია. ჩემი რეკომენდაციაა, სახელმწიფოს ნებართვით პიროტექნიკის გამოყენება შესაძლებელი იყოს ქალაქისგან მოშორებულ ადგილას, რისთვისაც რამდენიმე ლოკაცია უნდა შეირჩეს.   ფეიერვერკების გაშვება დასაშვები იქნება, ისიც იმ რაოდენობით, რომ რისკი ნაკლები იყოს ეკოლოგიის (ჰაერის დაბინძურება) კუთხით და ხმაურის გამო ცხოველები  არ დაიზაფრონ", - ამბობს ნოდარ მაჩხანაშვილი.

როგორც ძაღლების ფსიქოლოგი აღნიშნავს, ერთ-ერთი მოთხოვნადი სერვისია შიშის დაძლევა, რასაც ცხოველები ძნელად უმკლავდებიან და პროფესიონალის დახმარებას საჭიროებენ.

,,ძაღლების  მეპატრონეების დიდი ნაწილი მთხოვს, რომ როგორც გადავაჩვიო მათი შინაური ბინადარი შიშს,  ეს ერთ-ერთი ყველაზე მოთხოვნადი სერვისია. საახალწლოდ პიროტექნიკებისგან ადამიანებიც ვერ იღებენ სიამოვნებას და ცხოველები კი ამ შიშს ძნელად უმკლავდებიან. შეიძლება, ამ დროს მოეფერო, ჩაეხუტო, ნაკლებად ვინერვიულოთ მათი თანდასწრებით და მხიარულად მოვაჩვენოთ თავი, ამით ვაგრძნობინებთ, რომ ეს ხმაური უსაფრთხოა. თუმცა ცხოველები რა მდგომარეობასაც განიცდიან, ეს უნდა შეფასდეს, როგორც სტრესი. შიშისგან კანკალებენ, ყეფენ, იმალებიან, ყველა ძაღლი ინდივიდუალურად გამოხატავს", - ამბობს ფსიქოლოგი.

შეგახსენებთ, რომ ნოდარ მაჩხანაშვილი პირველია საქართველოში, რომელმაც მოსახლეობას ძაღლების შესახებ რჩევა მისცა და მოქალაქეებს ძაღლების სწორად აღზრდაში ეხმარება.

როგორც მანჩხაშვილი Business Insider Georgia- თან ამბობს, საქმიანობა თავდაპირველად მოხალისედ დაიწყო, მერე თანდათან ჰობი პროფესიად იქცა. დღეს პირველი ორგანიზაციაა საქართველოში, რომელიც შინაური ცხოველებს ქცევით უნარ-ჩვევებს უყალიბებს.

როგორც თავად ამბობს, „ძია ნოდარი“ თავისი პაციენტების პატრონების შერქმეული სახელია და ძაღლების მოყვარულთა საზოგადოებაში ძირითადად ასე იცნობენ.