კიბერრჩევები შავი პარასკევისთვის
შავი პარასკევის კვირეულით წლის ყველაზე აქტიური, ექსკლუზიური შეთავაზებებითა და დიდი ფასდაკლებებით დატვირთული ვაჭრობის პერიოდი იწყება.
სწორედ ამ დროს აქტიურდებიან კიბერთაღლითებიც. ისინი სხვადასხვა თაღლითური სქემებით ცდილობენ მომხმარებლებისგან ფინანსური თუ სხვა ინფორმაციის გამოძალვას.
როგორ ვისარგებლოთ სარფიანი შეთავაზებებით უსაფრთხოდ და არ გავებათ კიბერთაღლითობის მახეში?
ეს რჩევები დაგეხმარებათ დაიცვათ თქვენი ფინანსები და ისიამოვნოთ ონლაინ ვაჭრობით:
1. დაუკვირდით ყველა შეთავაზებას: განსაკუთრებით ყურადღებით ვებ-გვერდზე ამომხტარ სარეკლამო შეთავაზებებთან დაკავშირებით იყავით, არ გადახვიდეთ საეჭვო ბმულებზე.
2. გადაამოწმეთ საეჭვო შეთავაზება: თუ ელ-ფოსტაზე, ონლაინ ან სოცმედიაში მიღებული შეთავაზება დაუჯერებლად მიმზიდველია, ნივთის ან მომსახურების ფასი არარეალურად დაბალია, აღნიშნული შეთავაზების ნამდვილობა კომპანიის ოფიციალურ ვებ-გვერდზე ან უშუალოდ კომპანიასთან დაკავშირებით - მაგალითად, ცხელ ხაზზე გადაამოწმეთ.
3. შეცვალეთ პაროლი: თუ დიდი ხანია ელ-ფოსტაზე, სოცმედიის ანგარიშებსა თუ ონლაინ მაღაზიაში შესასვლელი პაროლი არ შეგიცვლიათ, ახლა საუკეთესო დროა 12-ნიშნა ძლიერი პაროლი დააყენოთ (გამოიყენეთ ფრაზები, მაღალი და დაბალი რეგისტრის ასოები და სხვადასხვა სიმბოლოები) და ანგარიში დამატებით ორფაქტორიანი ავთენტიფიკაციის გააქტიურებით დაიცვათ.
4. დააყენეთ განახლებები თქვენს მოწყობილობებზე: აქტიური ონლაინ ვაჭრობის პერიოდს მომზადებული დახვდით და ყველა თქვენს მოწყობილობაზე ბოლო განახლება დააყენეთ, რათა ისინი ვირუსებისგან და მავნე კოდისგან მაქსიმალურად დაიცვათ.
5. ბარათზე შეზღუდული ოდენობის თანხა განათავსეთ: ონლაინ ვაჭრობისთვის საბანკო ბარათზე მხოლოდ შეზღუდული ოდენობის თანხა განათავსეთ, თქვენი დანაზოგი კი სხვა ანგარიშზე შეინახეთ და ბარათზე საჭიროებისამებრ გადაიტანეთ. თუ საბარათე მონაცემები გაუფრთხილებლობით ყალბ ვებ-გვერდზე შეიყვანეთ და ისინი კიბერთაღლითისთვის ხილული გახდა, თქვენი ზარალი მხოლოდ ის მცირე თანხა იქნება, რომელიც ბარათზე გედოთ.
6. ონლაინ ვაჭრობისას ნაცნობი, უსაფრთხო ვებ-გვერდებით ისარგებლეთ: მაქსიმალურად ეცადეთ ვაჭრობისას თქვენთვის კარგად ნაცნობი და შემოწმებული ონლაინ მაღაზიები გამოიყენოთ. თუ თქვენთვის ონლაინ მაღაზია უცნობია, თავად მოძებნეთ ნებისმიერ საძიებო სისტემაში და ამ მაღაზიის ოფიციალური გვერდით ისარგებლეთ.
გაითვალისწინეთ ეს მარტივი რჩევები და უსაფრთხოდ ისარგებლეთ სადღესასწაულო შეთავაზებებით!
სხვა სიახლეები
11.09.2025.10:23
საბანკო ასოციაცია განაგრძობს მუშაობას საქართველოში ღია ბანკინგისა და ღია ფინანსების პროექტის განვითარებაზე. პროექტის მიზანი ფინანსური სექტორის ციფრული ტრანსფორმაციის ახალი ტალღის მხარდაჭერა და მონაცემების გაცვლის სტანდარტიზაციაა. პროექტი ხელს უწყობს ახალი ტიპის ფინანსური სერვისებისა და სერვისის მიმწოდებლების გაჩენას და ამ გზით მთლიანი ეკოსისტემის განვითარებას.
Keepz.me პირველი არასაბანკო ინსტიტუტი იყო, რომელიც ღია ბანკინგში ჩაერთო და დღეს ღია ბანკინგის პროვაიდერია. Keepz.me, როგორც ღია ბანკინგის პროვაიდერი, მომხმარებლებს აძლევს შესაძლებლობას ჰქონდეთ მარტივი და იაფი წვდომა სხვადასხვა საფინანსო ინსტიტუტებში საკუთარ ანგარიშებზე, განახორციელონ გადახდები და მართონ ფინანსები.
2025 წლის დასაწყისიდან საქართველოს საბანკო ასოციაციამ და რამდენიმე კომერციულმა ბანკმა გააფორმეს საერთო შეთანხმება, რომელიც მონაწილეებს შესაძლებლობას აძლევს, მარტივად, უსაფრთხოდ და მომხმარებლის მიერ გამოხატული თანხმობის საფუძველზე გაცვალონ ამ მომხმარებლის საიდენტიფიკაციო მონაცემები. ამ სერვისის დანერგვა ღია ბანკინგის ღია ფინანსების სისტემად გარდაქმნის პირველი ნაბიჯია.
Keepz.me პირველი არასაბანკო ინსტიტუტი და საგადახდო მომსახურების პროვაიდერია, რომელიც ამ შეთანხმებას შეუერთდა, რაც მნიშვნელოვანი მოვლენაა ღია ბანკინგის და ღია ფინანსების განვითარების გზაზე.
შეთანხმება ხელს უწყობს ინფორმაციის გაცვლის პროცესების გამჭვირვალობას, სტანდარტიზაციას და ერთიან ჩარჩოში მოქცევას, რაც მნიშვნელოვნად გაზრდის როგორც საბანკო სექტორსა და Keepz.me-ს შორის ურთიერთქმედების ეფექტიანობას, ისე მომხმარებლებისთვის შეთავაზებული სერვისების ხარისხს, მომხმარებლისთვის გადახდის გამოცდილების გაუმჯობესებასა და პროცესების ოპტიმიზაციას.
Keepz.me ფინანსურ სექტორში საქმიანობას ახორციელებს როგორც საგადახდო მომსახურების და ღია ბანკინგის პროვაიდერი და მომხმარებლებს QR ტერმინალებზე დაფუძნებულ გადახდებსა და დივერსიფიცირებულ გადახდის მეთოდებს სთავაზობს.
არსებული შეთანხმება კიდევ ერთი აღსანიშნავი ნაბიჯია საბანკო და არასაბანკო ფინანსური სექტორის ინტეგრაციის გზაზე, რაც საბოლოოდ მომხმარებელთა სარგებელსა და ფინანსური სერვისების გაუმჯობესებაზეა ორიენტირებული.