ქართული ღვინის კოსმეტიკურ ბრენდი „ზარბაზანი“ რითეილ სექტორში პარტნიორობას აფართოებს. ამის შესახებ, Business Insider Georgia-ს კომპანიის დამფუძნებელმა ალექსანდრე ბოლქვაძემ განუცხადა. მისივე თქმით, კომპანია „ავერსისა“ და „პსპ“- ს სააფთიაქო ქსელში შევიდა.

რაიმე განსაკუთრებული სიახლე ხომ არ აქვს კომპანიას მიმდინარე ეტაპზე?

გვაქვს ორი მთავარი სიახლე. პირველი არის ის, რომ აქტიურად ვმუშაობთ რითეილ სექტორთან და განსაკუთრებით ფარმაცევტულ კომპანიებთან. თავდაპირველად, ჩვენ წარმოდგენილი ვიყავით მხოლოდ „ფარმა სახლში“. ახლა წარმოდგენილები ვართ „ავერსისა“ და „პსპ“-ს სააფთიაქო ქსელებში. თითოეული ქსელის 30 ფილიალში. რა თქმა უნდა, დროთა განმავლობაში  უფრო მეტ ფილიალს დავფარავთ. აგრეთვე, მოლაპარაკება გვაქვს სხვა მონაწილეებთან, როგორიც არის „გეფა“ და რითეილის სხვა სექტორები. კერძოდ, „სუფთა სახლი“ და „კარფური“. ვიმედოვნებთ, რომ ძალიან მალე სასარგებლო კონტრაქტებს მოვაწერთ ხელს.

მეორე სიახლე კი არის ის, რომ ჩვენ განვაგრძობთ პროდუქციის დივერსიფიკაციას. მიმართულება უფრო მეტად წავა მამაკაცის ხაზისკენ. ვფიქრობ, რომ ჩვენი სეგმენტი უფრო მეტად არიან მამაკაცები და შესაბამისად პროდუქციის დივერსიფიკაციასაც მოვახდენთ მაგ მიმართულებით. ახლა თუ გვაქვს დასაბანი საშუალებები ვაპირებთ, რომ განვავითაროთ წვერის მოვლის საშუალებები, როგორც გაპარსვის კრემი, გაპარსვის შემდგომ გელი, აგრეთვე ჰიგიენური საშუალებები და ა.შ ამასთან ერთად, ურთიერთობა გვინდა დავამყაროთ და ვაპირებთ სპორტულ სამყაროსთან და მაგ მიმართულებით ნაბიჯები გადაიდგმება.

რას მიიჩნევთ კომპანიის კონკურენტულ უპირატესობად?

ჩვენ ვმუშაობთ მთავარ ქართულ პროდუქტზე და ჩვენს უდიდეს მემკვიდრეობაზე ყურძენზე. თავდაპირველად,  „ზარბაზანი“ აწარმოებდა ღვინოს და შემდეგ გადავიდა კოსმეტიკურ საშუალებებზე, მაგრამ ყურძენს არ დავშორდით. დავშორდით კი არა უფრო დავახლოვდით. იმ თვალსაზრისით, რომ ყველა პროდუქტში მონაწილეობს ყურძნის წიპწის ზეთი, თავისი სასარგებლო თვისებებიდან გამომდინარე. აგრეთვე, ჩვენი, ქართველების მთავარი პროდუქტია ყურძენი, ჩვენი მემკვიდრეობაც ყურძენზეა და შესაბამისად, ჩვენი მომავალიც გვინდა, რომ ყურძენზე დავამყაროთ. კომპანიის მთავარი კონკურენტული უპირატესობა სხვებთან შედარებით იგივე დასავლურ პროდუქტებთან შედარებით, არის ის რომ მთლიანად მთელი საწარმოო ციკლი არის ყურძნის წიპწის გარშემო დამყარებული, რომელიც ვიმედოვნებ მომავალში ყურძნის წიპწის ცალკე ზეთის დამზადების პოპულარიზაციასაც შეუწყობს ხელს. ჩვენ გვაქვს ყურძნის წიპწის ზეთი, როგორც ინგრედიენტი, მაგრამ აგრეთვე მნიშვნელოვანია ყურძნის წიპწის ზეთი, როგორც ცალკე პროდუქტი რომ განვითარდეს. ჩვენც ვფიქრობთ ამის შესახებ, თუმცა უნდა აღვნიშნო რომ სხვა სექტორია. ზოგადად ვფიქრობ, რომ საქართველოში ეს მიმართულებაც უნდა განვითარდეს.

როგორია კომპანიის სამომავლო გეგმები?

სამომავლო გეგმები რა თქმა უნდა არის პირველ რიგში ლოკალური გაფართოება, როგორც ფარმაცევტული ქსელების, ასევე ზოგადად რითეილ სექტორის თვალსაზრისით. გარდა ამისა, სასტუმროები რა თქმა უნდა ერთ-ერთ პრიორიტეტად რჩება. დღეს ვართ 72 სასტუმროში წარმოდგენილი. სიხარულით აღვნიშნავ იმ ფაქტს, რომ აპრილიდან მოიმატა შეკვეთების რაოდენობამ სასტუმროების მხრიდან, რადგან ალბათ ტურისტულმა დატვირთვამაც იმატა. აგრეთვე, ჩვენ რა თქმა უნდა ქვეყნის ფარგლებს გარეთ გასვლაზეც ვფიქრობთ. ჩინეთს განვიხილავთ, მაგრამ ასე სწრაფად არ ხდება გარკვეული გეოგრაფიული თუ მენტალური ფაქტორებიდან გამომდინარე, თუმცა ნელ-ნელა გადავლახავთ ამ ყველაფერს და იმედია გავალთ მაგ ფაზაზე.

ცნობისთვის, კომპანია „ზარბაზანის" კოსმეტიკური ხაზი გაყიდვაში 2021 წლის ნოემბერში ჩაეშვა. საწარმო თბილისთან ახლოს, წავკისში მდებარეობს.