ლიზინგზე მოთხოვნა საკმაოდ მზარდია, - აცხადებს „ბბ ლიზინგის“ და „ბბ დაზღვევის“ გენერალური დირექტორი კონსტანტინე სულამანიძე. მისი თქმით, 2024 წელს მხოლოდ „ბბ ლიზინგის“ პორტფელის შემთხვევაში ზრდა 79%-ის დონეზე იყო, ხოლო თავად ბაზარი 45%-ით გაიზარდა.

„გასული წელი, რომ შევაჯამოთ ჩვენს კომპანიას ჰქონდა პორტფელის 79%-იანი ზრდა, რაც საკმაოდ დიდი მაჩვენებელია. სექტორიც ძალიან გაიზარდა, დაახლოებით 45%-ი იყო სექტორის ზრდა. მოთხოვნა იზრდება, პროდუქტების დიფერენციაციაც ხდება და უფრო მარტივი ხდება ლიზინგის მიღება. ეს კი მაქსიმალურად ახალისებს ამ მიმართულებას. დამატებით ვიტყვი, რომ ეს ზრდა განპირობებულია ეკონომიკური ზრდით, ვინაიდან ქვეყანაში ეკონომიკური ზრდა მაღალი გაქვს, შესაბამისად სალიზინგო პროდუქტზეც მაღალი მოთხოვნა გაქვს“, - აცხადებს კონსტანტინე სულამანიძე.

მისივე თქმით, 2025 წელზე მოლოდინები პოზიტიურია.

„ბუნებრივია წლის დასაწყისი გამოირჩევა ნელი ზრდით. თუმცა მეორე კვარტლიდან და მესამე კვარტლიდან გააქტიურება ხდება და ზრდა შესამჩნევია. სწორედ იგივე მოლოდინი გაქვს წლევანდელ წელზეც, რომ მეორე კვარტალში უკვე დიდი ზრდა იქნება და ეს დაეტყობა სექტორს“, - აცხადებს „ბბ ლიზინგის“ და „ბბ დაზღვევის“ გენერალური დირექტორი.

მისივე თქმით, მომხმარებელთა მხრიდან წამოსულმა მოთხოვნამ ახალ პროდუქტებთან ერთად ახალი ბაზრებიც გააჩინა.

„ახალი პროდუქტები და ახალი ბაზრები - ასე ვიტყოდი. დიდი ინტერესი წამოვიდა მომხმარებელთა მხრიდან ელექტრომობილების ჭრილში და ახალი ბაზრების მოძიების კუთხით ჩინური ავტომობილები თანდათან უფრო პოპულარული ხდება. სწორედ ეს მიმართულება ხდება ერთ-ერთი მამოძრავებელი, რომ ხალხმა შეცვალოს და განაახლონ თავიანთი ავტოპარკი. ამ მიმართულებით აქტიურად ვმუშაობთ. ამასთან ერთად დაემატა ისიც, რომ ვინაიდან ახალი ბაზარი გამოჩნდა ჩინეთის სახით აქ ემატება უკვე არამხოლოდ ავტომობილების, არამედ სამშენებლო ტექნიკის ბაზრის განვითარებაც. ეს მიმართულებაც საკმაოდ სწრაფად იზრდება და ხდება მომხმარებლების ადაპტირება ჩინური წარმოების ავტომობილებზე“, - აცხადებს სულამანიძე.