Chelti Winery / მეღვინეობა ჩელთი წარმატებული გზით განაგრძობს საქმიანობას. ამის დასტურია კომპანიის ღვინოების ცნობადობის ზრდა და საექსპორტო არეალის კიდევ უფრო ფართო გაფართოება.

სულ ახლახანს „ჩელთის“ ღვინოები London Fashion Week-ის ოფიციალური პარტნიორის სტატუსით იყო წარმოდგენილი მოდის კვირეულზე.

როგორც Business Insider Georgia-სთან „ჩელთის“ კომერციული დირექტორი, ანა მირიანაშვილი აცხადებს, მსგავს ღონისძიებებში მონაწილეობა კომპანიას ეხმარება ცნობადობის ზრდაში, რაც საბოლოოდ დადებითად აისახება „ჩელთის“ გაყიდვებზეც.

არსებული გათვლებით, ევროპაში და მათ შორის ინგლისში „ჩელთი“ 2026 წელს გაყიდვების 10-დან 20%-მდე ზრდას პროგნოზირებს.

„ახლა ჩამოვედით ლონდონის მოდის კვირეულიდან. ვიყავით ერთადერთი ქართული ღვინო, რომელიც იყო London Fashion Week-ის ოფიციალური პარტნიორი. ბრიტანეთის ყველა ცნობილი გამოცემა, დაწყებული Vogue-დან დამთავრებული Elle-ით, იყო წარმოდგენილი ამ ღონისძიებაზე. ღონისძიებას ინდუსტრიის ძალიან მნიშვნელოვანი წარმომადგენლები ესწრებოდნენ. მათ საშუალება ჰქონდათ, ჩვენი ბრენდი დაეგემოვნებინათ და შესაბამისად, ისეთი უკუკავშირი მივიღეთ, რომ ასეთ შედეგს ჩვენც არ ველოდებოდით.

ინგლისში „ჩელთის“ სახელი ძალიან ვაირალ გახდა. ჩვენზე რამდენიმე თვის წინ Vogue-მაც დაწერა და სტატია გააკეთა „ჩელთიზე“ Vogue UK-მა. Vogue კი იცით, რომ ერთ-ერთი ტოპ გამოცემაა მსოფლიოში. ჩვენს შესახებ მან სტატია ბეჭდურ ვერსიაშიც გაუშვა და ონლაინაც დაწერა. დაწერა, რომ „ჩელთის“ აქვს პოტენციალი, რომ ინგლისში ერთ-ერთი წამყვანი ღვინო გახდეს ამ წელს“, - აცხადებს ანა მირიანაშვილი.

London Fashion Week (LFW) არის ერთ-ერთი ყველაზე პრესტიჟული მოდის კვირეული მსოფლიოში, რომელიც ინგლისის დედაქალაქში 2025 წლის 18-22 სექტემბერს გაიმართა. London Fashion Week იმართება წელიწადში ორჯერ:

თებერვალში (შემოდგომა/ზამთრის კოლექციები),
სექტემბერში (გაზაფხული/ზაფხულის კოლექციები).
ორგანიზატორია British Fashion Council (BFC).

მისი მისიაა ბრიტანელი და საერთაშორისო დიზაინერების კოლექციების წარმოჩენა, ახალი ტალანტების წახალისება და ინდუსტრიის განვითარება. ღონისძიებას ესწრებიან მოდის ჟურნალისტები, კრეატიული ინდუსტრიის წარმომადგენლები, გავლენიანი ბაიერები და სელებრითები.