Buna ceramics  არის კერამიკის სახელოსნო, რომელიც ქმნის როგორც საყოფაცხოვრებო ნივთებს, ასევე დეკორაციებსა და სხვადასხვა სახის სუვენირებს. სახელოსნო 3 წელია, რაც ბაზარზე ოპერირებს. მეტი ინფორმაციისთვის, Business Insider Georgia კომპანიის წარმომადგენელს ნინიკო კვარაცხელიას ესაუბრა.

„ჩვენი კომპანია ქმნის კერამიკულ ნაწარმს, რომელიც მოიცავს როგორც საყოფაცხოვრებო ნივთებს, ასევე დეკორაციებსა და სხვადასხვა სახის სუვენირებს. „ბუნას“ ძირითადი ხაზი არის მინიატურული ცხოველის ფიგურები, რომლებიც გულს უთბობენ ოთხფეხა მეგობრების მოყვარულებს. პროდუქცია არის თავიდან ბოლომდე ხელნაკეთი, მაღალი ხარისხის მასალით და ძალიან სუფთად შესრულებული.

კომპანია 3 წელია, რაც ბაზარზე არსებობს და აქტიურად ცდილობს რაც შეიძლება მეტი დადებითი ემოცია და სიახლე შესთავაზოს მომხმარებლებს “, - ამბობს კომპანიის წარმომადგენელი.

კომპანიას არაერთი კონკურენტული უპირატესობა აქვს, თუმცა მთავარი განსხვავებული პროდუქციაა, რომელიც თითოეულ მომხმარებელს დადებით ემოციას ანიჭებს.

„ჩვენი თითოეული ნამუშევარი "ცოცხალია" და თავისი ხასიათი აქვს. შეუძლებელია მომხმარებლებში სითბო არ გამოიწვიოს ფინჯნის ფსკერიდან მოციმციმე ფიგურებმა. ვფიქრობ, სწორედ ეს დადებითი ემოცია რაც ხელიდან გულამდე აღწევს, არის კომპანიის კონკურენტული უპირატესობა “, - აღნიშნავს ნინიკო კვარაცხელია.

„ბუნას“ სამომავლო გეგმა რაც შეიძლება მეტი ადამიანის ჩართვაა საქმიანობაში.

“ბუნას“ სამომავლო გეგმებში შედის, რაც შეიძლება მეტი ადამიანის ჩართვა საქმიანობაში. გვსურს რომ ეს არ იყოს ბიზნესი მხოლოდ საკუთარი თავისთვის. ჩვენთვის მთავარი კმაყოფილი მომხმარებელია, ამიტომ ყველა მარკეტინგული ნაბიჯი ადგილობრივ თუ უცხოურ ბაზარზე, გათვლილია როგორც ჩვენი ასევე ჩვენი მომხმარებლების საკეთილდღეოდ “, - განმარტავს კომპანიის წარმომადგენელი.