არაბთა გაერთიანებული საამიროების ერთ-ერთ უმსხვილეს დეველოპერულ კომპანიას Eagle Hills-ს  საქართველოში უპრეცედენტო მოცულობის, $6,5 მილიარდზე მეტი ღირებულების ორი პროექტის განხორციელება აქვს დაგეგმილი. კომპანია Eagle Hills, რომელიც EMAAR-ის ხელმძღვანელისა და დამფუძნებლის, მოჰამედ ალაბარის მიერ შეიქმნა, მსოფლიოს მასშტაბით ახორციელებს მსხვილ დეველოპერულ პროექტებს. კომპანიის პორტფელში შედის მრავალმილიარდიანი პროექტები 10-ზე მეტ ქვეყანაში, მათ შორის ბელგრადში, ბუდაპეშტში, რიგასა და სხვა ქალაქებში.

როგორც Business Insider Georgia-სთან „ორბი ჯგუფის“ გენერალურმა დირექტორმა, ირაკლი კვერღელიძემ განაცხადა, საქართველოს ბაზარზე Eagle Hills-ის შემოსვლა უმნიშვნელოვანესი მოვლენაა და ერთგვარ დადებით მესიჯსაც წარმოადგენს პოტენციური ინვესტორებისთვის.

„მინდა აღვნიშნო, რომ ეს უპრეცედენტო მოვლენაა ჩვენი ქვეყნისთვის და ჩვენი ეკონომიკისთვის, რადგან Eagle Hills-ის შემოსვლა საქართველოში მხოლოდ რაიმე სამშენებლო პროექტი ან კონკრეტული ობიექტის აშენება არ არის - ეს არის ძალიან მნიშვნელოვანი და მძლავრი სიგნალი იმ მრავალი უცხოელი ინვესტორისთვის, რომლებიც საქართველოში პოტენციურად განიხილავენ ინვესტიციების განხორციელებას.

ჩვენ არ უნდა დაგვავიწყდეს, რომ საქართველო არის პოსტსაბჭოთა სივრცის ქვეყანა და იმ დონის სანდოობის მიღება, როგორიც დღეს Eagle Hills-ს აქვს, იოლი ამოცანა არ არის. Eagle Hills-ის შემოსვლა საქართველოში სიგნალია მრავალი სხვა უცხოური ინვესტორისთვის, დამატებითი ინვესტიციების მოსაზიდად. მინდა ასევე ხაზი გავუსვა იმას, რომ პრაქტიკულად, პროექტის განხორციელების ფარგლებში ათიათასობით სამუშაო ადგილი შეიქმნება, როგორც მშენებლობის პროცესში, ასევე შემდგომი პერიოდის განმავლობაში.

მინდა ასევე მნიშვნელოვნად აღვნიშნო, რომ ბევრი ადამიანი, ვინც დღეს ქვეყნის გარეთაა გასული სამუშაოდ, სწორედ ამ პროექტების მეშვეობით მიიღებს მნიშვნელოვან და მაღალანაზღაურებად სამუშაო ადგილებს, რაც თავის მხრივ შეამცირებს შრომით მიგრაციას და პირიქით - დააბრუნებს ქვეყანაში მოქალაქეებს.

ძალიან მნიშვნელოვანია ასევე, რომ ხაზი გავუსვათ მოცულობას - 6,5 მილიარდ დოლარს, რომელიც ბათუმსა და თბილისში ინვესტიციის სახით უნდა განახორციელოს Eagle Hills-მა. უნდა აღინიშნოს, რომ ეს ინვესტიცია ეკონომიკური ეფექტის თვალსაზრისით ბევრად მეტია, ვიდრე მხოლოდ ციფრი. მარტივი არითმეტიკული გათვლებით, 6,5 მილიარდი დოლარის ფულადი ინვესტიციით შექმნილი ეკონომიკური აქტივობა თითქმის 10–12 მილიარდ დოლარამდე ადის, რაც პრაქტიკულად უტოლდება ჩვენი ქვეყნის მშპ-ს. მომდევნო წლების განმავლობაში მისი ეფექტი თითქმის გააორმაგებს საქართველოს ეკონომიკას, რაც ასევე მნიშვნელოვანი ფაქტორია.

ალბათ, ბევრ დადებით მხარეზე შეიძლება ვისაუბროთ ასეთი დონის კომპანიის მიერ საქართველოში ინვესტიციის გაცხადებასთან დაკავშირებით - ეს ხელს უწყობს უძრავი ქონების ზრდას, ტურისტული ინფრასტრუქტურის შექმნასა და მაღალი ხარისხის სერვისის განვითარებას, რაც ერთობლიობაში ქმნის საკმაოდ მაღალ ეკონომიკურ ეფექტს ჩვენი ქვეყნისთვის და სამუშაო ბაზრისთვის. უმნიშვნელოვანესია ის შედეგი, რომელიც საქართველომ ასეთი ეკონომიკური პოლიტიკისა და მიდგომების შედეგად მიიღო,“ - აცხადებს ბიზნესმენი.

„ორბი ჯგუფის“ გენერალური დირექტორის თქმით, ქართულ ბაზარზე Eagle Hills-ის პროექტის განხორციელება, ეკონომიკის ზრდასთან ერთად, მნიშვნელოვნად წაახალისებს ეკონომიკის სხვადასხვა სექტორის განვითარებას, მათ შორის სამშენებლო და დეველოპერულ მიმართულებებს.

„ეს არამც და არამც არ უნდა განვიხილოთ, როგორც კონკურენცია და კონკურენტის შემოსვლა ქვეყანაში. ერთის მხრივ, კონკურენცია ცუდი არ არის - პირიქით, აუმჯობესებს ხარისხს, სერვისს და, შესაბამისად, ყველა კომპანია მოწოდებული იქნება იმისკენ, რომ კიდევ უფრო მეტი სიახლე შესძინოს დეველოპერულ ბაზარს. მეორეს მხრივ, ეს არის ძალიან კარგი სინერგია ჩვენთვის - ქართული კომპანიებისთვისაც.

ყველა ის საერთაშორისო კომპანია და პარტნიორი, რომელიც დღემდე ჩვენთან თანამშრომლობს და სახელშეკრულებო ურთიერთობაშია, მიიღებს უმნიშვნელოვანეს სიგნალს, რაც ერთი ორად გაგვიმარტივებს მათთან კომუნიკაციას და შეამცირებს შესაძლო კითხვებს ქვეყნის მიმართ. არ უნდა დაგვავიწყდეს, რომ საქართველო რთულ გეოპოლიტიკურ ვითარებაშია. ამიტომ, მიუხედავად ყველაფრისა, 6,5 მილიარდ დოლარიანი პროექტის გამოცხადება საქართველოში ქართული კომპანიებისა და დეველოპერებისთვის ძალიან მნიშვნელოვანი სიგნალია - წახალისება, უფრო მაღალი ხარისხისა და ეფექტურობისკენ სწრაფვის სტიმული,“ - ამბობს ირაკლი კვერღელიძე.

მისივე თქმით, ნებისმიერ ინიციატივას იშვიათად აქვს 100%-იანი მხარდაჭერა, თუმცა Eagle Hills-ის პროექტის შემთხვევაში იმდენად ბევრი დადებითი ეფექტია, რომ ეს ჩვენი ქვეყნის ეკონომიკის გაორმაგების ძალიან კარგი საშუალებაა.

„ვფიქრობ, რომ ნებისმიერ აზრს და ინიციატივას ყოველთვის არ აქვს სრული მხარდაჭერა. ის ნეგატივი ან განსხვავებული აზრი, რომელიც ამ პროექტთან მიმართებით არსებობს, ბუნებრივ მოვლენად უნდა მივიჩნიოთ. თუმცა, თუ ჩემი სუბიექტური აზრი გაინტერესებთ - უცხოური ინვესტიცია უმნიშვნელოვანესი რამ არის, რისთვისაც იბრძვის ნებისმიერი სახელმწიფო და მისი ეკონომიკური გუნდი.

იმაზე დიდი ეფექტი, ვიდრე გარედან შემოტანილ ინვესტიციას აქვს, არც ერთ სხვა ინსტრუმენტს არ გააჩნია. მინდა აღვნიშნო, რომ ასეთი ინვესტიციების ხარჯზე განვითარდა ყველა წამყვანი ქვეყანა. არავინ არ იკიდებს ზურგზე არც მიწის ნაკვეთს და არც პროექტს - ეს რჩება ჩვენს ქვეყანას, ჩვენს ტერიტორიაზე ხორციელდება, ჩვენი მოქალაქეები დასაქმდებიან. ამიტომ, მიუხედავად განსხვავებული მოსაზრებების არსებობისა, ასეთ პროექტებს დიდი სიამოვნებით უნდა შევხვდეთ, რადგან ეს ჩვენი ქვეყნის ეკონომიკის გაორმაგების შესანიშნავი საშუალებაა.

რაც უფრო მეტ ბაზარზე გასვლას და უკეთეს რეალიზაციას შეგვიწყობს ხელი, მით უკეთესი. ამიტომ, ნეგატივთან მიმართებით შემიძლია გითხრათ, რომ იმდენად დიდია ამ პროექტის დადებითი მხარე ჩვენი ქვეყნისთვის, რომ ნეგატივზე საუბარი ზედმეტად მიმაჩნია,“ - ამბობს „ორბი ჯგუფის“ გენერალური დირექტორი.

როგორც ირაკლი კვერღელიძე აცხადებს, Eagle Hills-ის ინვესტიცია უმნიშვნელოვანესია ჩვენი ქვეყნისთვის.

„როცა პირველად გაჟღერდა ამ პროექტისა და ამ მოცულობის ინვესტიციის შესახებ ინფორმაცია, არ დაგიმალავთ - ყველა ეჭვის თვალით უყურებდა. თუმცა მე ღრმად მჯეროდა, რომ ეს რეალობა იყო და გარკვეულწილად ხელს ვუწყობდით პროცესს, როგორც ჩვენი მხრიდან, ასევე საამიროების მხრიდან არსებული ინფორმაციის საფუძველზე.

ეს არის უმნიშვნელოვანესი მოვლენა ჩვენი ქვეყნის ეკონომიკურ ისტორიაში, რომელიც დარწმუნებული ვარ, ძალიან დიდი ეფექტის მქონე იქნება ჩვენი ეკონომიკური ზრდისთვის, რადგან სწორედ ასეთი კომპანიების შემოსვლა იძლევა საუკეთესო მაგალითს სხვა ინვესტორებისთვის - უფრო მეტი ენთუზიაზმითა და ნდობით მოეკიდონ ქვეყანას. მით უმეტეს, როცა საუბარია Eagle Hills-ზე, რომელიც არა მხოლოდ საამიროების ბაზრის კომპანიაა, არამედ ძალიან ძლიერი საერთაშორისო დეველოპერული მოთამაშეა,“ - განმარტავს ბიზნესმენი.

Eagle Hills-ისა და ქართული მხარის შორის გაფორმებული შეთანხმების მიხედვით, საქართველო პროექტების პარტნიორად და კომპანიის 33%-იანი წილის თანამესაკუთრედ განისაზღვრა.

„მომგებიან პროექტში ჩვენი სახელმწიფოს 33%-იანი წილი ნიშნავს პირველ შემოსავალს პროექტიდან ქვეყნისთვის. მეორე მომენტია, რომ იქმნება მრავალმილიარდიანი ეკონომიკური აქტივი, რომელიც ქონების გადასახადის სახით დაუბრუნდება სახელმწიფოს რეგულარული გადასახადების კუთხით. ასევე, სახელმწიფო მიიღებს შესაბამის გადასახადებს პროექტის მომგებიანობიდან გამომდინარე და შემდგომში რეგულარული ოპერირების დროსაც - რაც პირდაპირი შემოსავალი იქნება ქვეყნის ბიუჯეტისთვის.

ძალიან მარტივად და მათემატიკურად რომ დავთვალოთ, იმ რამდენიმე წლის განმავლობაში, რაც ამ პროექტის განხორციელებას დასჭირდება, ჩემი გათვლებით, ეს პროექტი ყოველწლიურად მინიმუმ 3–4%-იან გავლენას მოახდენს ეკონომიკის ზრდის მაჩვენებელზე - იმ დამატებით მაჩვენებელზე, რომელიც ქვეყანას ისედაც შთამბეჭდავი აქვს და გამოარჩევს მსოფლიოს მრავალ სახელმწიფოს შორის,“ - აცხადებს „ორბი ჯგუფის“ გენერალური დირექტორი.