ULC Terminal-მა დაასრულა თანამედროვე ონლაინ პორტალის შექმნა. პლატფორმის ოფიციალური პრეზენტაცია უახლოეს დღეებში გაიმართება. კომპანია აცხადებს, რომ ერთწლიანი ინტენსიური მუშაობის შედეგად შეიქმნა პროდუქტი, რომელიც მომხმარებელს საშუალებას მისცემს ონლაინ რეჟიმში აწარმოოს დეკლარაციების შევსება და მართვა.

რას სთავაზობს ახალი პორტალი?

პორტალის შექმნა უკიდურესად შრომატევადი პროცესი აღმოჩნდა. პროექტში ჩაიდო უზარმაზარი რესურსი — როგორც ადამიანური, ისე ფინანსური. თუმცა, შედეგი თავისთავად მეტყველებს.

„შევქმენით პლატფორმა, სადაც მომხმარებელს შეუძლია ონლაინ აწარმოოს ტრანზიტული დეკლარაციების შევსება. სისტემა სრულად ავტომატიზირებულია და მაქსიმალურად გამარტივებული — პირი ატვირთავს დოკუმენტებს, ხოლო პორტალი ავტომატურად ამუშავებს მთლიან დოკუმენტაციას და ამზადებს გაფორმებისთვის, რაც მნიშვნელოვნად აჩქარებს პროცესებსა და პროცედურებს,“ — განმარტავს კომპანია

პორტალის მთავარი უპირატესობა ისაა, რომ მომხმარებელს აღარ სჭირდება რთული პროცედურების ხელით შესრულება. დოკუმენტაციის ავტომატური დამუშავება ამცირებს შეცდომის რისკს და მნიშვნელოვნად ზოგავს დროს. საერთაშორისო კომპანიებისთვის ეს ნიშნავს ნაკლებ ლოდინს და დაჩქარებულ პროცესს.

საპილოტე ფაზა და მომავალი მომსახურებები

ამჟამად პორტალი საპილოტე რეჟიმში იწყებს მუშაობას ტრანზიტული დეკლარაციების მიმართულებით . თუმცა, კომპანიის გეგმები ამით არ შემოიფარგლება.

„ტრანზიტული დეკლარაციები მხოლოდ დასაწყისია. საბოლოოდ პორტალს დაემატება სხვა მნიშვნელოვანი მომსახურებებიც. ჩვენი მიზანია, რომ მომხმარებელმა ერთი პლატფორმიდან შეძლოს ყველა საჭირო საბაჟო პროცედურის წარმოება,“ — აღნიშნავს ULC Terminal-ის ხელმძღვანელობა.

ახალი შესაძლებლობა რეგიონის საერთაშორისო გადამზიდავი კომპანიებისთვის

პორტალი განკუთვნილია არა მხოლოდ ქართული, არამედ მთელი რეგიონის საერთაშორისო კომპანიებისთვის. სისტემა მიმზიდველია ყველასთვის, ვინც საქართველოს გავლით ახორციელებს სატრანზიტო გადაზიდვებს.

„ჩვენი მიზანია, რომ რეგიონის საერთაშორისო გადამზიდავმა კომპანიებმა საქართველო აღიქვან როგორც კომფორტული და სწრაფი სატრანზიტო დერეფანი. ონლაინ პორტალი სწორედ ამას ემსახურება — ამარტივებს საბაჟო პროცედურებს და ზოგავს დროს,“

წვლილი აბრეშუმის გზის განვითარებაში

„ეს პირდაპირპროპორციულია საქართველოს, როგორც აბრეშუმის გზის სატრანზიტო დერეფნის, განვითარებისთვის. რაც უფრო მარტივი და სწრაფია საბაჟო პროცედურები, მით უფრო მიმზიდველია ჩვენი ქვეყანა საერთაშორისო გადამზიდავი კომპანიებისთვის. თანამედროვე ინფრასტრუქტურა ზრდის ნდობას და ხელს უწყობს ტვირთნაკადების ზრდას საქართველოს გავლით,“ — აცხადებს კომპანია.

მადლობა გუნდს

„გვინდა კომპანიის ყველა თანამშრომელს მადლობა ვუთხრათ გაწეული შრომისთვის. ეს პროექტი თითოეული მათგანის წვლილითა და თავდადებით შეიქმნა. ერთწლიანი შრომა ადვილი არ ყოფილა, მაგრამ შედეგი თავისთავად მეტყველებს — შევქმენით პროდუქტი, რომლითაც შეგვიძლია ვიამაყოთ,“ — ასეთია ULC Terminal-ის გზავნილი თავისი გუნდისადმი.

ULC Terminal-ის თანამედროვე ონლაინ პორტალის პრეზენტაცია უახლოეს დღეებშია დაგეგმილი. ახალი პლატფორმა შესაძლებლობას მისცემს როგორც ადგილობრივ, ისე რეგიონის საერთაშორისო კომპანიებს, ისარგებლონ თანამედროვე გადაწყვეტით სატრანზიტო დეკლარაციების მართვისთვის.