ჰერბია • Herbia-მ ბაზრისთვის მზა პროდუქციის დიდ შეფუთვებში მიწოდება გაზარდა. როგორც Business Insider Georgia-სთან კომპანიის თანადამფუძნებელმა დავით ჯანელიძემ განაცხადა, აღნიშნული სერვისი „ჰერბიამ“ ბაზარზე კაფეებისთვის, რესტორნებისთვის და ყველა ტიპის კვების ობიექტისთვის 2 წლის უკან დანერგა, თუმცა იმისათვის, რომ კომპანიას მიწოდება გაეზარდა წარმოების გაფართოებაც განახორციელა. 

„აღნიშნული პროდუქტი ბაზარზე 2-3 წლის უკან გამოვიტანეთ, თუმცა ახლა გავზარდეთ წარმოება და დავიწყეთ ერთგვარი მარკეტინგული კამპანიები. დღეს უკვე გვაქვს იმის შესაძლებლობა, რომ ჰორეკა სექტორი მზა პროდუქციით აქტიურად მოვამარაგოთ. ამ ეტაპზე ჩვენთვის მნიშვნელოვანია ახალი ობიექტების მოძიება. ზოგადად HACCP-ის სტანდარტებით ზოგიერთი რესტორნისთვის რთულია პროდუქტის გადამუშავება. ეს რთული პროცესია, ჯერ უნდა გაირეცხოს, დამუშავდეს და ასე შემდეგ. ჩვენ მათ მზა პროდუქტს ვაწვდით, რომელიც ასეთ ობიექტებს ძალიან დიდი ტვირთს აშორებს. მით უმეტეს, რომ დამწყები ობიექტებისთვის „ჰერბიას“ შეთავაზება საკმაოდ საინტერესოა“, - აცხადებს დავით ჯანელიძე. 

კომპანიის თანადამფუძნებელი ამბობს, რომ აღნიშნული პროდუქტისადმი ინტერესი დიდია. 

„მოთხოვნა საკმაოდ მზარდია. ძირითადად მოთხოვნა პატარა და საშუალო კვების ობიექტების მხრიდან არის. გეოგრაფიულად კი ამ სერვისზე ძირითადი მოთხოვნა თბილისშია“, - აცხადებს „ჰერბიას“ თანადამფუძნებელი. 

ცოტა ხნის უკან „ჰერბიამ“  ბაზარს Herbia Delivery-ს სერვისი - Herbiadelivery.ge შესთავაზა. დავით ჯანელიძის თქმით, აღნიშნული სერვისიც საკმაოდ მოთხოვნადი აღმოჩნდა, რადგანაც კომპანია მომხმარებლებს საკმაოდ მაღალი ხარისხის პროდუქციას აწვდის. 

„მოთხოვნა ყოველდღიურად იზრდება, რადგანაც საკმაოდ მაღალი ხარისხის პროდუქტი გვაქვს. სხვა ქალაქების ათვისებას ჯერჯერობით არ ვაპირებთ. უფრო კონკრეტულად, ვფიქრობთ, რომ დაახლოებით ერთი წელი მხოლოდ თბილისის ბაზარზე ვიმუშაოთ და ამის შემდეგ დავამატოთ ისეთი დიდი ქალაქები, როგორიც არის ბათუმი, ქუთაისი“, - ამბობს „ჰერბიას“ თანადამფუძნებელი.

მზარდი მოთხოვნის ფონზე „ჰერბია“ არსებულ გამოწვევებს ადეკვატურად პასუხობს და ფართოვდება. კომპანიის სასათბურე მეურნეობებს, სულ მალე სოფლის განვითარების პროგრამის დახმარებით, 1 ჰა სასათბურე მეურნეობაც შეემატება.

დღეისათვის „ჰერბია“ წყალტუბოს მუნიციპალიტეტში 30 ჰა-ზე გაშენებულ დახურულ სასათბურე მეურნეობას ფლობს, ხოლო ღია გრუნტის მეურნეობა 30 ჰა-ზეა გადაჭიმული.