კომპანია თოლია - Tolia საქართველოს მასშტაბით სანაყინეების ქსელის გაფართოებას განაგრძობს. როგორც Business Insider Georgia-სთან კომპანიის სანაყინეების მარკეტინგის მენეჯერმა, ბერდია ბედიაშვილმა განაცხადა, მიმდინარე წლის ბოლომდე „თოლია“ კიდევ 3 ახალ ფილიალს დაამატებს.

აღსანიშნავია, რომ რამდენიმე დღის უკან კომპანამ „სითი მოლში“ „თოლიას“ ახალი ფილიალი უკვე გაიხსნა. მანამდე იყო ფილიალის გახსნა  „გორი მოლში“.

ამ დროისთვის „თოლია“ ქვეყნის მასშტაბით 30-ზე მეტ სანაყინეს ფლობს. კომპანიის სანაყინეების მარკეტინგის მენეჯერის განცხადებით, სანაყინეების გაყიდვები გასული წლის ანალოგიურ პერიოდთან შედარებით 38%-ით გაიზარდა.

„თოლია“ დღეს ნაყინის ბაზრის ლიდერია და მისი წარმატება რამდენიმე ფაქტორით არის განპირობებული, მათ შორის გამორჩეული მენიუთი და კონცეფციით, რაც კომპანიას კონკურენტებისგან გამოარჩევს.

„თოლია“ ერთ-ერთი ყველაზე ცნობილი ქართული ბრენდია ნაყინის ინდუსტრიაში. კომპანია, რომელიც ბაზარზე 1997 წლიდან ოპერირებს მომხმარებელს როგორც ინდუსტრიულ, ისე ჩამოსასხმელ ნაყინებს სთავაზობს.

„თოლიას“ სანაყინეები მომხმარებლებს მდიდარ მენიუს სთავაზობენ, თუმცა განსაკუთრებული პოპულარობით მაინც ვანილის ნაყინი სარგებლობს, რომელიც ერთპიროვნული ლიდერია გაყიდვებში. პოპულარობით მას მოსდევს შოკოლადის ნაყინი.

ბრენდის წარმატების ერთ-ერთი მთავარი ფაქტორი მისი ძლიერი იმიჯია, რომელიც წლების განმავლობაში შექმნა. „თოლია“ საქართველოში ნაყინის ერთ-ერთი პირველი მწარმოებელი იყო, რომელმაც 90-იან წლებში მომხმარებელს ხარისხიანი პროდუქტი შესთავაზა, რაც დღემდე ინარჩუნებს მომხმარებლის ლოიალობას.