Tskaltubo Plaza Hotel-ის მაგალითზე, მოთხოვნა გასული წლის ანალოგიური პერიოდის იდენტურია. ამის შესახებ Business Insider Georgia-სთან სასტუმროს მენეჯმენტკომპანია „კა გრუპის“ დამფუძნებელმა, ირაკლი ჭიღლაძემ განაცხადა. მისი განმარტებით, მიმდინარე წელს Tskaltubo Plaza Hotel-ით ისეთი სტაბილური ბაზარიც დაინტერესდა, როგორიც ჩინეთია.

„წინა წელთან შედარებით, შეიძლება ითქვას, რომ მოთხოვნა იდენტურია. ერთადერთი სიახლე ის არის, რომ ჩინეთის ბაზარი წყალტუბოს მიმართულებით საკმაოდ გააქტიურდა, რაც ჩვენთვის ძალიან დადებითი ტენდენციაა, რადგან ჩინეთის ბაზარი სტაბილურობით გამოირჩევა“, - აცხადებს ირაკლი ჭიღლაძე.

Tskaltubo Plaza Hotel-ის მაგალითზე ძირითადად პოსტსაბჭოთა სივრცის ქვეყნები აქტიურობენ: ყაზახეთი, უზბეკეთი და პოლონეთი. ასევე აქტიურია ადგილობრივი ბაზარიც.

Tskaltubo Plaza Hotel-ის გარდა განთავსებისა და ღამისთევისა საკუთარ სტუმრებს სპა მიმართულებებს და სამკურნალო პაკეტებსაც სთავაზობს. სასტუმრო აერთიანებს ასევე რესტორანს, ბარს და ღია აუზს.

„ექვსი ტიპის სამკურნალო პაკეტი გვაქვს. პაკეტები არის 7 დღიანი, 10 დღიანი და 12 დღიანი ძირითადად და ქვეყნები, რომლებიც ინტერესდებიან სამკურნალო პაკეტებით, არის: საქართველო, ყაზახეთი, უზბეკეთი და პოლონეთი“, - განმარტავს “კა გრუპის” დამფუძნებელი. 

იმისთვის, რომ Tskaltubo Plaza Hotel-ისთვის 2026 წელი 2025 წელზე უკეთესი იყოს, სასტუმრო და მისი მენეჯმენტკომპანია საერთაშორისო გამოფენებზე წარდგნენ და გეგმაში კიდევ რამდენიმე გამოფენაში მონაწილეობაც აქვთ.

„ძირითადად ეს არის საერთაშორისო ტურისტული გამოფენები და B2B შეხვედრები. როგორც წესი ტურიზმის ეროვნული ადმინისტრაცია წლის დასასრულს გვიზიარებს ხოლმე მომდევნო წელს რომელ გამოფენებზე იღებს მონაწილეობას, მერე ჩვენ ვირჩევთ ჩვენთვის სტრატეგიულად მნიშვნელოვანი მიმართულებები რომელია და ამის მიხედვით მივდივართ გამოფენებზე თუ B2B შეხვედრებზე. 2026-ში რა მიმართულებებიც გვაქვს, ეს არის ყაზახეთის ბაზარი, GCC ბაზარი, ჩინეთის ბაზარი, ინდოეთის ბაზარი, ისრაელის ბაზარი. ინდოეთში და ისრაელში უკვე ვიყავით, გამოფენები იყო იანვრის ბოლოს და თებერვლის დასაწყისში. მარტში მივდივართ გერმანიის გამოფენაზე, შემდეგ მეზობელი ქვეყნები - აზერბაიჯანსა და სომხეთში არის აპრილში ჩანიშნული საერთაშორისო გამოფენები და B2B შეხვედრები. შემდეგ მაისის დასაწყისში არის დუბაის საერთაშორისო გამოფენა და მაისის ბოლოს არის ჩინეთის გამოფენა“, - აცხადებს ირაკლი ჭიღლაძე.

Tskaltubo Plaza Hotel-ის და ზოგადად წყალტუბოსთვის ყველაზე აქტიური პერიოდი ზაფხულია. 

„ეს მიჰყვება ზოგად ტენდენციას, ანუ მაღალი სეზონი იწყება მაისის დასაწყისიდან და გრძელდება ოქტომბრის ბოლომდე“, - ამბობს „კა გრუპის“ დამფუძნებელი.

Tskaltubo Plaza Hotel-ი 75 სასტუმრო ნომერს აერთიანებს და აქვს ექვსი კატეგორიის ნომრები. სასტუმროს ჯამში189 ადამიანის განთავსება შეუძლია.

„გასულ წელთან შედარებით საფასო პოლიტიკა ეგრეთ წოდებულ დაბალ სეზონზე უცვლელი რჩება, რაც შეეხება მაღალ სეზონზე გვექნება 10-დოლარიანი ზრდა“, - ამბობს ირაკლი ჭიღლაძე.

წყალტუბო კავკასიის ერთ-ერთი ყველაზე ცნობილი ბალნეოლოგიური კურორტია, რომელიც მსოფლიო აღიარებით სარგებლობს. მისი უნიკალური თერმული წყლები 70-მდე სხვადასხვა დაავადების სამკურნალოდ გამოიყენება. კურორტი მდებარეობს ქუთაისიდან სულ რაღაც 7 კილომეტრში, ხოლო თბილისიდან - 250 კილომეტრში. ზღვის დონიდან 100 მეტრის სიმაღლეზე მდებარე წყალტუბო გამოირჩევა ნოტიო სუბტროპიკული კლიმატით, რბილი ზამთრითა და თბილი ზაფხულით.

წყალტუბოს კურორტი შეუდარებელია თავისი სამკურნალო თვისებებით. მისი წყლები უნიკალურია არა მხოლოდ მინერალურ, არამედ თერმულ წყლებს შორისაც. ბუნებრივი წყალი თბილია და ზუსტად შეესაბამება ადამიანის სხეულის ტემპერატურას, რაც საშუალებას იძლევა, იგი გამოყენებულ იქნას ყოველგვარი დამატებითი გაცხელების გარეშე - ამგვარად ნარჩუნდება მისი ყველა ორგანული სასარგებლო თვისება.

წყალტუბოს ბუნებრივი სამკურნალო რესურსები ასევე მოიცავს კარსტულ მღვიმეებს. მათ სპეციფიკურ მიკროკლიმატს წარმატებით იყენებენ ასთმის, სტენოკარდიის, ჰიპერტონიის, პნევმონიისა და ნევროზის სამკურნალოდ. ხელსაყრელი ამინდის პირობებში, სტუმრებს ასევე აქვთ სამკურნალო მზის აბაზანების მიღების შესაძლებლობა.

ამ გამაჯანსაღებელი გარემოს შუაგულში მდებარეობს ფუფუნების კლასის ხუთვარსკვლავიანი სასტუმრო, რომელიც მომხმარებელს სთავაზობს პრემიუმ კომფორტს, გამორჩეულ მომსახურებას და მსოფლიო დონის გამაჯანსაღებელ (Wellness) ობიექტებს დაუვიწყარი დასვენებისთვის.