წელს საქართველოში 10%-ით მეტი თხილის მოსავალს ელოდებიან. როგორც Business Insider Georgia-სთან საქართველოს თხილის მწარმოებელთა ასოციაციის აღმასრულებელი საბჭოს თავმჯდომარემ მერაბ ჭითანავამ განაცხადა, მოსავლის რაოდენობასთან ერთად წელს საქართველოში თხილის ხარისხიც გაცილებით მაღალია. 

„მოსავლის რაოდენობა შარშანდელთან შედარებით გაზრდილია. რაოდენობრივად ზრდა დაახლოებით 7-10%-ით მაღალია. წელს მოსავლის ხარისხიც უკეთესია, რადგანაც ამინდებმაც ხელი შეგვიწყო და მოსავლის აღებაც მეტ-ნაკლებად ხელსაყრელ პირობებში მიმდინარეობს. ფაროსანასთან დაკავშირებით ამ ეტაპზე რა მონაცემებიც გვაქვს ზიანი შედარებით ნაკლებია და შესაბამისად წელს თხილის უკეთესი ხარისხი გვექნება. თუმცა დეტალური სურათი 10-15 დღეში გვექნება, როცა მოსავლის დიდი ნაწილის დაბინავება და გაშრობა მოხდება. სველ მოსავალზე ძალიან ძნელია ზუსტი ხარისხის განსაზღვრა. თუმცა ამ მომენტისთვის მაქსიმალურად პოზიტიური მოლოდინი გვაქვს“, - განმარტავს ჭითანავა.

მისივე განმარტებით, წელს გაზრდილია თხილის ფასიც, როგორც ადგილობრივ, ისე საექსპორტო ბაზრებზე. 

„მნიშვნელოვანია, რომ თხილის ბაზარზე მნიშვნელოვნად მაღალი ფასები ფიქსირდება. შარშანდელთან შედარებით ხარისხიანი პროდუქციის ფასი გაზრდილია. დღეისათვის სველი თხილი 4,5-5 ლარად იყიდება, მაშინ როდესაც შარშან 3-3.5 ლარი ღირდა. მოლოდინია იმისა, რომ საექსპორტო ბაზრებზე ხარისხიანი პროდუქცია შარშანდელთან შედარებით გაცილებით მაღალ ფასებში გაიყიდება. ეს გამოწვეულია იმითაც, რომ თურქეთის ბაზარზე ნაკლების მოსავლის პროგნოზია და შესაბამისად ეს ბაზრის რეაქციაცაა. თურქეთის ბაზრიდან არაერთგვაროვანი გზავნილებია, რამაც გამოიწვია დიდი უნდობლობა და პანიკა მსოფლიო ბაზარზე. ამ მონეტისთვის ცალსახაა, რომ თურქეთში ნაკლები მოსავალი იქნება, და შედარებით ნაკლები ხარისხიც, რაც ავტომატურად პოზიტიურ გავლენას იქონიებს ქართულ ბაზარზე“, - ამბობს საქართველოს თხილის მწარმოებელთა ასოციაციის აღმასრულებელი საბჭოს თავმჯდომარე მერაბ ჭითანავა. 

აღსანიშნავია, რომ საქართველოდან თხლის მთავარი საექსპორტო ბაზარი ევროკავშირია. ქართული თხილი აქტიურად იყიდება გერმანიასა და იტალიაში. საერთაშორისო ბაზარზე 1 კგ თხილის ღირებულება უკვე 8 ევროა.