თურქული ელექტრონული კომერციის გიგანტი Trendyol საქართველოზე ფოკუსირდება, - ამის შესახებ Business Insider Georgia-სთან საუბარში Inex Group-ის ბიზნესის განვითარების ხელმძღვანელმა მიშა ბაბუნაშვილმა განაცხადა. მისი თქმით, კომპანია უკვე ახორციელებს კონკრეტულ ნაბიჯებს, რომლებიც ქართველ მომხმარებლებს პლატფორმაზე შოპინგს გაუმარტივებს.

„Trendyol-მა და Inex Group-მა რამდენიმე თვის წინ დაიწყეს თანამშრომლობა. დღეს კომპანია სერიოზულადაა დაინტერესებული საქართველოს ბაზრით და ქმნის პირობებს, რომ ქართველ მომხმარებლებს პლატფორმაზე სერვისით სარგებლობა კიდევ უფრო მარტივად შეეძლოთ,“ - ამბობს ბაბუნაშვილი.

წლების განმავლობაში Trendyol მხოლოდ თურქულ ენაზე ფუნქციონირებდა, თუმცა უკვე დამატებულია ინგლისური და არაბული ენები. ამასთან, არსებობს პერსპექტივა, რომ Trendyol ქართულ ენაზეც ხელმისაწვდომი გახდეს.

„საიტის თარგმნა ტექნიკურად რთული პროცესია - პოზიციები მუდმივად იცვლება, პროდუქცია ემატება და იშლება. თუმცა, Trendyol-ის 2025 წლის სტრატეგიულ გეგმაში საქართველო უკვე შეტანილია და ენის ლოკალიზაციაც განიხილება,“ - აცხადებს Inex Group-ის ბიზნესის განვითარების ხელმძღვანელი.

პარტნიორობის შედეგად, დღეს Inex Group-ის მომხმარებლებს Trendyol-ის ვებსაიტზე პირდაპირ შეუძლიათ აირჩიონ Inex გადამზიდავად, მონაცემები ავტომატურად ივსება და ამანათი პირდაპირ მომხმარებელთან მოდის. ამასთან, პარტნიორობის ფარგლებში ეტაპობრივად მოქმედებს ექსკლუზიური შეთავაზებები. მაგალითად, ახალ მომხმარებლებზე 30%-იანი ფასდაკლება.

მიშა ბაბუნაშვილის განცხადებით, Trendyol-ის გააქტიურებამ თურქეთიდან გამოწერების რაოდენობის ზრდა გამოიწვია, რაც კვირაში 2-3 სიხშირით გადაზიდვებს საჭიროებს. თუმცა მოთხოვნის გაზრდის პარალელურად გაიზრდება სიხშირეების რაოდენობაც. 

კომპანიას სურს სამომავლოდ ქართულ ბიზნესსაც მისცეს შესაძლებლობა, Trendyol-ზე საკუთარი პროდუქცია განათავსოს.

„ეს არის ჩვენი ინიციატივა, როდესაც ვესაუბრებით და ხელშეკრულებას ვაფორმებთ საერთაშორისო პლატფორმასთან. Trendyol-ის შემთხვევაში ჯერჯერობით ეს სერვისი არ არის, მაგრამ ზუსტად მაგაზე ვმუშაობთ, რომ სამომავლოდ ქართველებსაც შეეძლოთ აღნიშნული ქმედების განხორციელება“, - აცხადებს Inex Group-ის წარმომადგენელი.