საერთაშორისო გადამზიდავი კომპანია Inex Group-ისა და ​თურქული სავაჭრო ონლაინ პლატფორმა Trendyol-ის ურთიერთობები ახალ ეტაპზე გადავიდა, რომელიც სამომავლოდ კიდევ უფრო გაღრმავდება და კომპანიები ქართველ მომხმარებელს მათზე მორგებულ სერვისებს შესთავაზებენ. როგორც Business Insider Georgia-სთან საუბრისას Inex Group-ის გენერალურმა დირექტორმა გიორგი კაპანაძემ განაცხადა, ჩინური პლატფორმების საქართველოს ბაზარზე გააქტიურების შემდეგ გააქტიურება და ბაზრის ძველი წილის დაბრუნება გადაწყვიტა Trendyol-მაც. 

„Inex Group-ი და  Trendyol-ი რამდენიმე წელია თანამშრომლობენ, თუმცა მას შემდეგ რაც ქართულ ბაზარზე Taobao და Pinduoduo საკმაოდ გააქტიურდა Trendyol-მაც დაინახა საჭიროება და საქართველოში ეძებდნენ სანდო პარტნიორს. ამ მიმართულებით ჩვენ დიდი უპირატესობა გვაქვს, რადგანაც Inex Group-ი  Trendyol-ს ისეთ მომსახურებას სთავაზობს, რასაც სხვა კომპანიები ვერ სთავაზობენ. ჩვენ თურქეთში გაქვს ჩვენი კომპანია.  მომხმარებლებს Trendyol-ი ​სთავაზობს არჩევანს, რამდენიმე ქართულ კომპანიას და მომხმარებელი თავად არჩევს ვისი სერვისით სურს კონკრეტული ნივთის გამოწერა. ჩაწერს საკუთარი ოთახის ნომერს და შემდეგ ავტომატურად ემატება მისამართი. თუმცა ეს არის პირველი ეტაპი. Taobao-სგან განსხვავებით პირდაპირ ქართული მისამართის მიბმა არ ხდება“, - აღნიშნა გიორგი კაპანაძემ.

Inex Group-ის გენერალური დირექტორის თქმით, Inex Group-ი საქართველოში Trendyol-ის გენერალური პარტნიორი იქნება.

„Trendyol-თან სიტყვიერი შეთანხმება გაქვს, რომ ჩვენ ვიქნებით ერთმანეთისთვის გენერალური პარტნიორები საქართველოში და ამ პარტნიორობის ფარგლებში შემდგომ განხორციელდება სხვადასხვა პროექტები. პირველ ეტაპზე მე რამდენადაც ვიცი გადაწყვეტილია, რომ პლატფორმას დაემატოს ინგლისური ენა. 

როდესაც  Trendyol-ის დელეგაცია ჩვენთან იმყოფებოდა, მათ ავუხსენით ის სირთულე, რასაც ქართველი მომხმარებელი აწყდება. ვუთხარით ისიც, რომ როდესაც ახალი მომხმარებელი მისამართს ამატებდა სმს იგზავნებოდა მხოლოდ თურქულ ნომერზე. ახალი სისტემით, რომელიც უკვე ჩაშვებულია აღარ სჭირდება ტელეფონი და სმს, უბრალოდ მომხმარებელი აირჩევს Inex Group-ს, მიუთითებს ოთახის ნომერს და ავტომატურად დაემატება მისამართი. ეს იყო ის ერთ-ერთი სირთულე, რომელიც Trendyol-ს ავუხსენით და გაითვალისწინა. მეორე პრობლემას წარმოადგენდა ენობრივი ბარიერი. მათ ავუხსენით, რომ შესაძლოა ბევრი მომხმარებელი დავკარგოთ იმის გამო, რომ ვერ გაიგონ თურქული ენა. თუმცა ისინი დაგვპირდნენ, რომ ეტაპობრივად დაიწყება და  Trendyol-ის ინგლისური ვერსიაც ჩაეშვება“, - აცხადებს გიორგი კაპანაძე.

Inex Group-ის ​მაგალითზე თურქული ამანათებიდან უშუალოდ Trendyol-ის წილი დაახლოებით 80%-ია. თუმცა  საქართველოში Pinduoduo-სა და Taobao-ს გააქტიურების შემდეგ ქართველი მომხმარებლების დიდი ნაწილი ჩინურ პლატფორმებზე საშოპინგოდ გადავიდა. ამას დაერთო ისიც, რომ თურქეთში პროდუქციის ფასები გაძვირდა. 

თუმცა Trendyol-ს ახალი პოლიტიკის იმედი და ქართველი მომხმარებლების დაბრუნების იმედი აქვს. 

„ეს ყველაფერი კეთდება არის პირველ რიგში მომხმარებლისთვის. იმიტომ, რომ მათ უკვე გაუადვილდათ მისამართის დამატება. პლუს ამას Trendyol-მა ახალი მომხმარებლებისთვის ერთჯერადი 40%-იანი ფასდაკლებაც გააკეთა. აღნიშნულის შესახებ ინფორმაცია ჩვენს სოციალურ ქსელებში განთავსებულია. ეს არის კოდი, რომლის გამოყენებაც ახლად დარეგისტრირებულ მომხმარებლებს შეუძლიათ.

აღსანიშნავია, რომ გარკვეული პერიოდის უკან თურქეთიდან გამოწერილი პროდუქციის ფასები ჩვენი მომხმარებლებისთვის მისაღები იყო, რადგანაც იქ ლირა გაუფასურდა. ახლა ლირა ისევ გაუფასურებულია, თუმცა თავად პროდუქციის ფასმა მოიმატა. გაძვირდა თავად თურქული პროდუქცია“, - აცხადებს Inex Group-ის გენერალური დირექტორი.

მისივე თქმით, Inex Group-ისა და Trendyol-ის პირდაპირმა თანამშრომლობამ უკვე შედეგი გამოიღო და ბოლო 2 კვირის განმავლობაში გამომწერები გაზრდილია, ასევე დამატებულია ახალი მომხმარებლებიც. ამის ფონზე კი კომპანია თურქეთიდან სიხშირეების გაზრდას გეგმავს. 

„ამ ეტაპზე თურქეთიდან რეისი კვირაში ერთხელ სრულდება, თუმცა აუცილებლად გაიზრდება. ერთი წლის წინ გვქონდა 3 რეისი და ვინაიდან შემცირდა ტვირთების რაოდენობა ჩვენც შევამცირეთ რეისები. თუმცა ზრდის ტენდენცია უკვე შესამჩნევია, მიუხედავად იმისა რომ პასიური სეზონია. ვფიქრობთ, რომ აგვისტოს ბოლოსთვის სიხშირეებს გავზრდით“, - აცხადებს გიორგი კაპანაძე.