სვანური • Svanuri  რძის პროდუქტების მწარმოებელი კომპანიაა, რომელიც 20 წელია ბაზარზე ოპერირებს. კომპანიაში არსებულ სიახლეებსა და სამომავლო გეგმებზე Business Insider Georgia „სვანურის“ დამფუძნებელს გიორგი ლიპარტელიანს ესაუბრა.

„კომპანიამ მიმდინარე წლის ივნისის თვეში დამატებით მიიღო ფინანსური რესურსი საქართველოს ბანკიდან და უკვე დაიწყო გეგმების განხორციელება: ახალი მანქანა-დანადგარების შეძენა და საწარმოო სივრცეების მშენებლობა.

ინვესტიციის ფარგლებში, გაიზრდება მანქანა-დანადგარების წარმადობა, რაც საშუალებას მოგვცემს ქართულ ბაზარზე რძის პროდუქტებზე არსებული გაზრდილი მოთხოვნა დავაკმაყოფილოთ. აღსანიშნავია, რომ "სვანურის" რძის პროდუქტების მოხმარება და შესაბამისად, წარმოება, ბოლო სამი თვის განმავლობაში დაახლოებით 30%-ით არის გაზრდილი, რაც ძალიან პოზიტიური მაჩვენებელია. ჩვენ უკვე გვყავს ლოიალური მომხმარებლები და ვამაყობთ ამით.

იქედან გამომდინარე, რომ რძის პროდუქტები პირველადი მოხმარებისაა, ჩვენ ყოველთვის ვცდილობთ და გამოგვდის, რომ ყველა პოზიციის რძის პროდუქტზე (რძე, მაწონი, ხაჭო, არაჟანი, კარაქი) ფასები იყოს ადეკვატური, ყველამ შეძლოს ყოველდღიურად მათი შეძენა.

უახლოეს მომავალში კომპანიის ასორტიმენტს დაემატება ჭიქის და ბოთლის იოგურტები სხვადასხვა არომატებით, დისტრიბუციას გავუკეთებთ ძალიან საინტერესო დიეტურ და დაბალცხიმიან რძის პროდუქტებს, გვექნება ევროპული ყველიც, თუმცა არა "სვანური"-ს ბრენდის ქვეშ.

გვსურს აღვნიშნოთ, რომ საგრძნობლად გავაუმჯობესეთ საქართველოს მასშტაბით დისტრიბუციის ხარისხიც, პროდუქტის ხარისხთან ერთად, ჩვენთვის პრიორიტეტულია მაღაზიების დროული მომარაგება ყველა სტანდარტის დაცვით. შევიძინეთ ახალი სადისტრიბუციო სამაცივრე ავტომობილები და დავიმატეთ თანამშრომლებიც.

არსებითად გაუმჯობესდა ლაბორატორია, სადაც ყოველდღიურად ჩვენი პროდუქტი წარმოების პროცესშიც და დასრულების ეტაპზეც გადის არაერთ მნიშვნელოვან შემოწმებას, რათა საბოლოო პროდუქტის ხარისხში ვიყოთ დარწმუნებულები.

2026 წლიდან "სვანური" იწყებს ძალიან საინტერესო სოციალურ პროექტებს, რაზეც მოგვიანებით მოგახსენებთ “, - აცხადებს გიორგი ლიპარტელიანი.