„ტყუპების ღვინოზე“ მოთხოვნა მზარდია. როგორც Business Insider Georgia-სთან „ტყუპების საღვინე სახლის“ მენეჯერმა ელდარ რამიშვილმა განაცხადა, „ტყუპების ღვინის“ 50%-ი ექსპორტზე იყიდება. 

„ტყუპების საღვინე სახლი / Twins Wine House-ს მიერ წარმოებული ღვინის 50%-ი ადგილობრივ ბაზარზე, ხოლო 50%-იც საექსპორტო ბაზრებზე იყიდება. ჩვენი ღვინო ექსპორტზე გადის ჩინეთში, რუსეთში, შვედეთში. მთლიანობაში ჩვენი ღვინო აქტიურად 5 საექსპორტო ბაზარზე იყიდება, თუმცა ყველაზე მსხვილი მაინც ბრიტანეთი და რუსეთია.

წელს ღვინის რეალიზაციის კუთხით ზრდა გვაქვს, როგორც ადგილობრივ, ისე საექსპორტო ბაზრებზე. ადგილობრივ ბაზარზე გაყიდვების დაახლოებით 20%-იანი ზრდაა, ხოლო ექსპორტზე 10%-იანი“, - განმარტავს „ტყუპების საღვინე სახლის“ მენეჯერი.

„ტყუპების საღვინე სახლმა“ 2024 წელს 150 ტონა ყურძენი გადაამუშავა და წელსაც იგივე მოცულობის გადამუშავებას აპირებს, რომლის ნაწილსაც საკუთარი ვენახებიდან იღებს, ხოლო ნაწილსაც იბარებს. 

„ტყუპების საღვინე სახლი“ ამ დროისათვის ბაზარზე 5 დასახელების ღვინითაა წარმოდგენილი. 

დღესდღეობით „ტყუპების საღვინე სახლი“ ყოველწლიურად დაახლოებით 250 000 ლიტრ ღვინოს აწარმოებს. კომპანიის მთავარი ნიშა ქართული ტრადიციული წესით, ქვევრში დაყენებული ღვინოა. 

ტყუპმა ძმებმა გია და გელა გამტკიცულაშვილებმა საოჯახო ქვევრის ღვინის კომერციული წარმოება 1997 წლიდან დაიწყეს. ქვევრის ღვინის დაყენების მეთოდი უძველესი ქართული ტრადიციაა, რომელიც გაეროს განათლების, მეცნიერებისა და კულტურის ორგანიზაციამ (UNESCO, 2013) კაცობრიობის არამატერიალურ კულტურულ მემკვიდრეობად აღიარა. ამ მეთოდს ძმებმა თავიანთი ოჯახური ცოდნაც დაუმატეს და დღეს ერთ-ერთ გამორჩეულ პროდუქტს ქმნიან, რომლის ხარისხსაც ყველაფერი ერთად ქმნის: დამზადების პირობები, ადგილმდებარეობა, ჰავა და განწყობა, რომელიც კომპანიის სულისკვეთებას გამოხატავს.

ტყუპების მეღვინეობა მდებარეობს კახეთის რეგიონში, თელავის რაიონის სოფელ ნაფარეულში. კახეთი, რომ საქართველოში ღვინის სამშობლოა, ეს ყველასთვის კარგადაა ცნობილი. ნაფარეულის ღვინის მიკროზონა განლაგებულია მდინარე ალაზნის ხეობის მარცხენა სანაპიროზე. მას ზომიერი, გაწონასწორებული ჰავა და ისეთი ნიადაგის მახასიათებლები აქვს, რომელიც ყურძენს საოცარ ტონებს ანიჭებს და ტყუპების ღვინოს კიდევ უფრო გემრიელს ხდის.

ქვევრები და სახეობები

მეღვინეობის ტერიტორიაზე 135 ქვევრი ფუნქციონირებს. აქედან ყველაზე პატარა 50-ლიტრიანია, ყველაზე დიდი კი 5 ტონას აღწევს. ტყუპების მეღვინეობა მოიცავს ვენახის 15 ჰექტარ მიწას, 3 ჰექტარი ბიო/ორგანული ვენახის ჩათვლით. ღვინის საწარმოებლად, ტყუპები ყურძენს ადგილობრივი მევენახეებისგან შეისყიდიან, რომლის ხარისხსაც პირადად ამოწმებენ, რათა საუკეთესო გემოები მიიღონ.

ტყუპების ღვინის მარანი ფართო ასორტიმენტს გთავაზობთ. აქ ყენდება საფერავი, ალაზნის ველი, ხიხვი, ქისი, კახური მწვანე, ნაფარეული, როზე, მუკუზანი და ქინძმარაული. ასევე გვაქვს ჭაჭის არაყი და ბრენდი.

პირველი ბრენდული ღვინო იყო „ქვევრის მზე”, რომელსაც სახელი მომხმარებელთა დადებითი შეფასების გამო დაერქვა. ისინი ხშირად აღნიშნავდნენ, რომ მათი ღვინო მზესავით სიხარულისა და სითბოს მომტანია, რაც მათთვის პირველი ბრენდის ინსპირაციად იქცა.

თვინსი

თვინსი, ანუ ტყუპები ღვინის დაყენების ორი სხვადასხვა მეთოდის „შეტყუპებით” შეიქმნა. პირველია უძველესი ქართული ღვინის წარმოების მეთოდი - ქვევრში ჭაჭასთან სამთვიანი დადუღებით (მაცერაციით). მეორე კი ევროპული მიდგომაა - ღვინის დაძველება მუხის კასრებში, რაც „თვინსის” შემთხვევაში 1 წელი მიმდინარეობს. მეთოდების მსგავსი “შეტყუპებით” მივიღეთ უნიკალური ღვინო - დაბალანსებული, ღრმა და ძვირფასი მახასიათებლებით, რაც მას პრემიუმ ხარისხის ღვინოდ აქცევს.

თავანკარა

ის ქვევრის ყველაზე მაღალი ფენის ღვინოს წარმოადგენს, რომელიც 100%-იანი ფილტრაციით მიიღება. სიტყვა „თავანკარა” ქართულად სუფთას ნიშნავს, რაც ამ ღვინის მთავარი ღირსებაა. „თავანკარას” დამზადება გაგვიადვილა ტყუპების ღვინის სახლის უნიკალურმა, გამჭვირვალე ქვევრმა, რაც საშუალებას გვაძლევს, ღვინის წარმოების თითოეული ეტაპი კარგად და სწორად გამოვიკვლიოთ. ეს ქვევრები დიდი ცოდნისა და გამოცდილების ნაყოფია, რომლებიც ინტელექტუალური საკუთრებით არის დაცული.

ფირუზი

ფირუზი კომპანიის ბრენდის ყველაზე ახალი, ბიო/ორგანული ღვინის ბრენდია. ის ოჯახის დიდი წინაპრის, ასევე მეღვინის, ფირუზ გამტკიცულაშვილის პატივსაცემად შეიქმნა. ამასთან, ფირუზი ძვირფას, დაუმუშავებელ ქვას ჰქვია, რომელიც სიბრძნისა და კეთილდღეობის სიმბოლოა და ამით უფრო მეტად ეხმიანება კომპანიის იდეოლოგიას.

„ფირუზი” ევროპული სტანდარტებით მზადდება. ვინიფიკაციის პროცესისა და სულფატების დაბალი შემცველობის გამო ის ნატურალური ღვინის კატეგორიაში შედის.

„ტყუპების საღვინე სახლის“ პროდუქციის შეძენა შეგიძლიათ როგორც კომპანიის ისე პარტნიორი მაღაზიებისა და რესტორნების სივრცეში. მეტი მოქნილობისთვის ტყუპების ღვინის შეძენა ონლაინაცაა შესაძლებელი.