"ჯულსი" არის ხელნაკეთი ფეხსაცმელების, ჩანთებისა და საფულეების მწარმოებელი ბრენდი, რომელიც მომხმარებელს აქსესუარებთან ერთად საავტორო მასტერკლასებსაც სთავაზობს. მეტი ინფორმაციისთვის Business Insider Georgia ბრენდის დამფუძნებელს, ჯულიეტა ადანაიას ესაუბრა.

„ბაზარზე ოპერირება დავიწყეთ 2017 წელს. მომხმარებელს ვთავაზობთ მამაკაცის, ქალისა და ბავშვის ხელნაკეთ ტყავის აქსესუარებს. 2024 წლიდან კი მომხმარებლებს ძველი და საყვარელი ნივთების რესტავრაციის სერვისიც შევთავაზეთ.

გარდა ამისა, გვაქვს ერთჯერადი მასტერკლასები ტურისტებისთვის და ერთთვიანი საავტორო კურსი, სადაც ნებისმიერ მსურველს ჩვენს სახელოსნოში შეუძლია ტყავზე მუშაობის სწავლა და საკუთარი ხელით ნივთების შექმნა. აღნიშნულ კურსს მომხმარებლებს უკვე 5 წელია ვთავაზობთ. ჩვენ ვიყავით პირველები, ვინც მსგავსი მიმართულება შექმნა, მანამდე მსგავსი კურსი არ არსებობდა. შედეგად, ბაზარზე მეტი კონკურენციაც გაჩნდა. მე თავად ვასწავლი, ხოლო ჩემი მოსწავლეები ჩემგან ინსპირაციას იღებენ, ბევრმა მათგანმა საკუთარი ბიზნესი და კურსიც შექმნა.

თბილისის გარდა, სახელოსნო გვაქვს ქალაქ გორშიც, სადაც ასევე აქტიურად მიმდინარეობს სასწავლო კურსი.

მოთხოვნა კურსებზე სტაბილურად მზარდია. მოსწავლეებს ვიღებთ 12 წლიდან, ასაკის შეზღუდვა არ გვაქვს “, - აცხადებს ჯულიეტა ადანაია.

ბრენდის მთავარი კონკურენტული უპირატესობა მაღალი ხარისხია.

„ჩვენი მთავარი კონკურენტული უპირატესობა მაღალი ხარისხია, რის შედეგადაც გვყავს მრავალი ლოიალური მომხმარებელი, რომელიც ყოველწლიურად ჩვენთან ყიდულობს საჩუქრებს “, - ამბობს ბრენდის დამფუძნებელი.

„ჯულსი“ სამომავლოდ გაფართოებას და ქუთაისში სახელოსნოს გახსნას გეგმავს.

ჩვენი სამომავლო გეგმები ექსპორტს უკავშირდება, რაზეც აქტიურად ვმუშაობთ. გარდა ამისა, კურსების მიმართულებით ქუთაისში სახელოსნოს გახსნას ვგეგმავთ, რომლის ამოქმედებას გაზაფხულიდან ვაპირებთ და მსურველებს აქტიურად შევთავაზებთ სასწავლო კურსს “, - აღნიშნავს ჯულიეტა ადანაია.

ინფორმაციისთვის, პროდუქციის შეძენა შესაძლებელია ონლაინ.